人生 ê 风台忽然临到咱,亲像亲人死失 ê 打击,痛苦 ê 失望,伤心 ê 失败。有时灾难是慢慢来,ná 来 ná 强,强 kah teh tī 心头,气 lóng 喘 bōe 出来。
Chiah-ê 风台灾难是上帝用来培养咱来服事伊 ê 方法。上帝若需要一丛强 koh 勇 ê 橡树,就会种 tī 狂风暴雨 ê 所在,树 tī 风雨中 ê 奋斗,树身 chiah 会勇壮,成做上等 ê 木材。
上帝训练一个人出来事奉伊,也是经过满满 ê 奋斗 kap 艰苦 ê 操练。Tī 狂风暴雨打击中,会晓祈祷讲:「主 ah,我全心归你,phah 我,槌我,nóa 我,再造我,成做你完全 thang 用 ê 材料。」
有一幅图描写世界各种 ê 天才大人物,有 gâu 讲话 ê 演说家,有哲学家,有殉道者,每一个 lóng 是 tī 某一方面有非常 ê 成就,chit 幅图 ê 了不起 ê 所在,就是每一人 lóng 是经过极大苦难 ê 人。有 bōe-thang 入去所应允地 ê 摩西,有青瞑 ê 诗人 Hô-má (荷马,Homer)摸 teh 行。有一个身材高大 ê 主耶稣,伊特别 ê 所在,就是伊 ê 面受损伤比别 ê 人 lóng khah 厉害。Chit-ê 画图家可能 kā 图号做「暴风雨」。
大自然经过风吹雨淋后,koh-khah 美丽,大山 ê súi 也是受风雨 ê 致荫。人生 ta̍k 路英雄人物 kiám lóng m̄ 是有满满风浪、奋斗 ê 痕迹 mah?
你一定经历过风雨 ê 打击,你是 m̄ 是受伤,困苦倒落去;á 是风雨将你提升到满有太阳 ê 山顶,成做性命 khah 丰盛,khah 坚固,信心 khah 坚定 ê 人 mah?经过风雨以后,是 m̄ 是 koh-khah 会同情受风雨打击,伤迹满身 ê 人?
树头 khiā 有在,m̄ 惊树尾做风台
上帝所栽 ê 树,
M̄ 惊狂风吹 koh giú,
Ǹg 东剖,ǹg 西 khiú, 树叶摇来摇去 hàiⁿ 千秋。 上帝所栽 ê 树, 根 ná 深,枝叶 ná 上, 枝 e ná 阔,出 tī 上帝 ê 手,
Lóng 是树 á 所需求。
上帝所疼 ê 树栽, 无甚物力会 kā 伤害, 雷 kòng、sih-ná 电、雨冲、风台, 过了,犹原自在。 上帝所疼 ê 树栽, 每 pái 风雨后,犹 khiā 在在,
Tùi 头日到末世界, 时时 teh 长大。