「若是我断断 m̄ 夸口别项,只有夸口咱 ê 主耶稣基督 ê 十字架 nā-tiāⁿ;tùi chit-ê 就世间 ǹg 我钉十字架,我 ǹg 世间也是 án-ni。」(加拉太 6:14)
有人 ài 独立生活,in 有理想、期待、梦想,主也答应 in ê 祈求。In 求悔改 ê 心,无惜代价,伊 hō͘ in 忧伤。In 求纯洁,主 hō͘ in 痛苦。In 求温柔 ê 心,主 hō͘ in ê 心破碎,伤心。In 求 tùi 世间 ná 死一般,主除去 in ê 生活希望。In 求亲像主,主就 khǹg in tī 火中,「锻炼 in 亲像金银」(玛拉基 3:3) 直到能反射伊 ê 形象。In 求帮忙背伊 ê 十字架,总是当伊 the̍h hō͘ in ê 时,十字架伤 tio̍h in ê 手。
In 并无充分了解 in ê 所求,伊是照 in ê 话答应 in 全部 ê 请求。In bōe 肯定是 m̄ 是会远远跟 tè 伊,á 是 kap 伊接近来作伙。In 惊惶,亲像雅各 tī Pek-te̍k-lī 梦见「有梯 khiā tī 地里,梯顶抵天,」(创世记 28:12) á 是 Í-lī-hoat「tùi 暝时异象 ê 思想」(约伯记 4:13) á 是亲像耶稣 ê 学生 hiah-nih 惊,「掠做所看见 ê 是神。」(路加 24:37) m̄ 知是耶稣。学生惊 kah 想 ài 求伊离开 in,á 是将伊 ê 荣光 chhàng 起来。
In 发见顺服比食苦 khah 快,工作比放弃 khah 容易,背十字架比钉十字架 khah 轻松。总是 in 现在已经 bōe-thang 回头,因为 in 已经想接近 in 灵性生活中所看 bōe tio̍h ê 十字架 lah。十字架 ê 美德 kap 力量已经深深进入 tī in ê 内面。主也实现伊对 in ê 应允「我若受举起离开地,就 beh 引 chhōa 众人就近我。」(约翰 12:32)
现在 in ê 机会来 lah,以前是 kan-taⁿ 听讲,taⁿ in 实际感觉 tio̍h lah。伊将伊疼 ê 目睭 ǹg tī in ê 身上,亲像对马利亚 kap 彼得看一样,in 只有选择跟 tè 伊。伊十字架奥秘 ê 光,一点 á 一点 á,不时 teh 照 in,in 看伊 tùi 地上 hông 举起,看伊圣 koh 善 ê 受苦受伤 ê 孔嘴射出荣光。In 看伊,in 渐渐接近伊,变做有伊形象 ê 人。主基督 ê 名 tùi in 身上照出来,因为伊已经 tòa tī in 内面。In ê 性命 kap 天里 ê 主进入一种无言 ê 契合。In 甘愿生活 tī 无别人所有 ê 物,放弃 in 本来所有 ê 物,因为 in ài ná 亲像主 ê 款。
这就是 chōe-chōe 世代以来所有「chiah-ê 人是 tè 羊羔,无论 tá 落去」(启示录 14:4) ê 模式。假使 in 若自私选择家己,á 是由朋友为 in 来选择,in 可能选择别 ê。Án-ni in tī 地上可能 beh khah 辉煌,总是 tī 天里就 kiám 真 chōe 光辉。In 所留落来 ê beh 亲像罗得 hiah 缺乏,无亲像亚伯拉罕 hiah 丰富。假使 in tī 路中停落来,á 是上帝徙开伊 ê 手 hō͘ in 迷路,in ê 损失是 jōa-chiâⁿ 大 ah! In tī koh 活 ê 日 iáu 有甚么 thang 失去 ah?
上帝 hō͘ in 力量,保护 in,无受伤害。伊常常 tī 慈爱中扶持 in,hō͘ in 无跋倒。Tī 今世,in 知伊 ê 所做 lóng 是为 in 好。In 也知 tī 地上受苦,beh tī 天顶掌权,tī 下面背十字架,beh tī 顶面 tì 荣光 ê 冕旒。Koh 知所做 ê,m̄ 是 thàn in ê 意思,是上帝 ê 旨意 chiah-tio̍h in 来实现出来。