你 bat 祈祷,koh 祈祷,thèng-hāu koh thèng-hāu,lóng 无得 tio̍h 回应 mah? 无反应,致到心神 lóng 软落去。致到 teh-beh 放弃 ah?真可能,是 tī 你所等 ê 方式有错误,所等 ê 所在无 tio̍h,应该是 tī 会 tú-tio̍h 天父 ê 所在来等,来 thèng-hāu。
圣经讲:「吞忍 thèng-hāu。」(罗马8:25)原来吞忍,á 是忍耐,ōe-thang 克服忧虑。主基督答应伊会 koh 来,伊讲,就一定实行。忍耐、吞忍会克服忧伤。为甚么忧愁艰苦,soah 灰心失志 ah?伊比你 khah 知你 ê 需要,伊 thèng-hāu ê 目的是 beh 得 khah 大 ê 荣耀。忍耐、吞忍 thang 克服肉体 ê 活动。圣经讲:「信,就是上帝 ê 工。」(约翰福音6:29)只要信,一切就 beh 成就,无靠家己 ê 功劳。忍耐、吞忍 thang 克服一切 ê 需要,你可能希望为家己所 ài ê 求真 chōe,khah 少求上帝 ê 旨意。
忍耐、吞忍 thang 补足一切 ê 软弱,无将 thèng-hāu 看做浪费时间,认清楚 tī thèng-hāu 中天父有时间预备资源,加强你 ê 力量。忍耐、吞忍 thang 克服一切 ê 徬徨不安。圣经讲:「伊就摸我,扶我起来 khiā。」(但以理8:18)天父是坚固 ê 基石,只要心存伊 ê 忍耐,咱 thang 坚定 khiā-chāi thèng-hāu 伊。忍耐、吞忍会 thang 发出敬拜 ê 心。Siōng 好 ê 部分是带 o-ló ê thèng-hāu,欢欢喜喜 teh 忍耐,「欢喜吞忍宽容。」(哥罗西1:11)当你忍耐吞忍 ê 时,「独独吞忍 tio̍h hō͘ 伊到成功,hō͘ lín 完全齐备,无所欠缺。」(雅各1:4)Lí 就有大大丰丰富富 ê 报答。-- C. H. P.
火 to̍h ê 时 tio̍h khiā 定, 这是内心学习 ê 心声,
Chit 条路看是无回行, 耐心来完成完美 ê 工程。――L. S. P.