正月十七(一月十七日)
「永活上帝 ê 奴仆,但以理 ah,你 ê 上帝,你所常常服事 ê,会救你脱离 hiah-ê 狮 mah?」(但以理6:20)
圣经中讲「永活 ê 上帝」真 chōe pái,但是咱常常 soah 忽略去 chit-ê 事。咱知影写「永活 ê 上帝」,总是日常生活 ê 时,soah 无想上帝是「永活」,是「活活」,bōe 记得三四千年前 ê 上帝,tī 今 á 日伊 iáu 有 siāng 款 ê 权柄,siāng 款对疼伊、服事伊 ê 人施恩惠。几千年前伊所做 ê 事,今日伊也会做 tī 咱 ê 身上,因为伊是永活无改变 ê。Tī 咱人生乌暗 ê 时,咱 tio̍h 确信 chit-ê 事实,伊 tī 现今,tī 将来,永远是「永活 ê 上帝。」
你 kap 伊同行,仰望伊,ǹg 望伊 ê 帮赞,伊 lóng bōe hō͘ 你失望。有一个信主超过四十年 ê 老信徒,对阮 án-ni 干证讲:「上帝 m̄-bat 一 pái hō͘ 我失望。Tī 我极困难,试炼 siōng 深,siōng 困苦,siōng 需要人帮忙 ê 时,伊 m̄-bat 无 chhap 我。因为我靠伊 ê 恩惠信靠伊,伊永远是我 ê 帮赞。我掠称颂伊 ê 名做快乐。」――George Mueller
路德马丁(Martin Luther) tī 伊性命极危险 ê 时,切切 ài 掠 tio̍h hit-ê 看 bōe tio̍h ê 大能,有人看伊用指头 á tī 桌顶写「伊活 teh!伊活 teh!」这是咱 ê ǹg 望,也是对真理,全人类应该有 ê ǹg 望。人生,人死,英雄人物,教师,哲学家,讲一大堆,存在一时久,了后就无去,但是上帝是永活 ê,in 死去,上帝 iáu 长长活 teh。
In ê 光照一 chūn,会消灭。In 本是 tùi 上帝 ê 真光得 tio̍h 光,上帝 ê 光永远 teh 照。――Alenxander Maclaren
美国作家 Chhoán-bū(Charles Galludet Trumbull)án-ni 写:「我 tú-tio̍h 亚当博士(Dr. John Douglas Adam),对伊学 tio̍h,伊伟大属灵 ê 力量,是对伊明白,耶稣本身确确实实,实实在在 kap 伊同在。伊讲,知影耶稣真真实实经常 kap 伊同在,是伊 ê 力量 ê 最大来源。Chit 种 ê 体验,m̄ 是用感觉伊 ê 价值、地位、观念,á 是伊 ê 推理来知‘耶稣 án-chóaⁿ kap 人同在’所 ē-thang 明白。」
Koh 讲:「基督是伊思想 ê 中心,不管时伊就是想 tio̍h 基督本身。不管时,伊单独 ê 时,无论 tī tó 位,伊大声 ǹg 基督讲话,亲像 kap 朋友讲话一样,真轻松、自然。这就是伊所讲,耶稣真正经常 kap 伊同在 ê 体验。」