十一月初八(十一月八日)
「耶稣带彼得、约翰、雅各相 kap 上山祈祷。祈祷 ê 时,伊 ê 面貌有各样,伊 ê 衫白,koh 光 nà-nà。...彼得 kap 同 tī-teh ê 人...看见耶稣 ê 荣光。」(路加9:28-29,32)
「我 taⁿ 若 tī 你 ê 面前得 tio̍h 恩典,求你将你 ê 路指示我。」(出埃及记33:13)
耶稣 chhōa 三个学生上山,hō͘ in kap 伊有亲密 ê 交陪,in 「看见伊 ê 荣光,」koh 讲:「咱 tī chia 真好。」(路加9:32-33) Tùi hiah-ê 跟 tè 主 tī 山顶 ê 人,天堂永远是 bōe 真远。
咱中间有甚么人 tī 默想,祈祷 ê 是无看 tio̍h 天国 ê 门 ah?有甚么人 kap 上帝单独沟通 ê 时,无感觉 tio̍h 内心大激动,tam tio̍h 受祝福喜乐 ê 滋味 ah?
主 kap 伊 ê 学生安静 ê 交谈 lóng 是 tī 特别 ê 时间 kap 地点。有一 pái tī Hek-bûn 山,koh- khah 常是 tī 橄榄山。每一个基督徒 lóng 应该有伊家己 ê 橄榄山。今 á 日,大多数 ê 人,特别 tòa tī 都市 ê 人,生活紧张,tùi 透早到暗,无闲 chhih-chhih,真少有机会 thang 默想、读经、祈祷,心灵 kap 主 ê 沟通。
但以理 tòa tī 崇拜偶像 ê 巴比伦 ê 喧闹中,有伊本身 ê 橄榄山 tī 伊 ê 房间;彼得 tī Iok-phàⁿ 有一个 thang 祈祷 ê 厝顶;路德马丁(Martin Luther) 有一间楼顶 tī Ui-tin-bó (Wittenberg) thang 灵修、祈祷;到现在,hit 所在受认定做圣地,teh hông 参观。
十九世纪英国公理会牧师 Joseph Parker bat 讲:「假使咱做教会,无灵性 ê 异象见 tio̍h 天国,无想 khah 大 ê 荣光 kap 性命,咱会失去咱 ê 信仰,án-ni 咱 ê 圣坛只是 chit-tè 冰冰冷冷,空空 ê 石头,得 bōe-tio̍h 天来 ê 祝福。」现今世界所需要 ê 就是有看过主 ê 人。――tùi《失去默想ê艺术》
亲近主!可能伊今日带你到山顶,就是伊带容易出错 ê 彼得,kap 雅各、约翰,就是「雷 ê kiáⁿ」(马可3:17)常常误解主 kap 伊使命常常去 ê 所在。伊无理由 m̄ 带你去,所以 m̄-thang 拒绝家己讲:
「Hiah-ê 主 ê 奇妙异象 kap 启示是为别人,m̄ 是为我!」其实 chiah-ê lóng 是为 tio̍h 你!――John Thomas McNeill