十月二五(十月二十五日)
「Lín 到 taⁿ 未 bat tī 我 ê 名求甚么;lín tio̍h 求就会得 tio̍h,hō͘ lín ê 欢喜满满。」 (约翰16:24)
美国内战 ê 时,有一个 kiáⁿ 去参加联合军。伊 ê 老父是银行家,虽然伊同意 kiáⁿ 去参军,总是 hō͘ kiáⁿ 出征相 thâi 却会真伤心。
Kiáⁿ 出征了后,伊对军人 ê 处境真关心真注意。看 tio̍h 穿制服 ê 士兵,伊 ê 心就跳出去,ná 亲像看 tio̍h 伊 ê kiáⁿ 一样。常常放下 seng-lí 无做,用钱用时间照顾受伤 ê 兵。朋友劝伊 m̄-thang 无顾家己 ê 事业,伊就听朋友 ê 苦劝,完全停止 koh 放弃救济伤兵 ê 工作。
总是有一工,一个少年士兵穿旧旧退色 ê 军服行入银行。对伊 ê 面 kap 手所受 ê siong,知伊 tú-tú tùi 陆军野战病院出来 ê。银行家看见 hit-ê 可怜 ê 少年兵 tú 伸手 tī 袋 á 内 jîm 甚么物 ê 时,银行家家己掠做明白伊 ê 意思,就讲:「少年人,我今 á 日特别无闲,bōe-thang 帮赞你,你 ài 去陆军总部,tī hia 有官员会照顾你。」
Hit-ê 可怜 ê 伤兵犹原 khiā teh,ná 亲像听无伊 ê 意思。伊继续 tī 裤 ê la̍k 袋 á chhē,chhiau 出一张 lah-sap lah-sap ê 纸条 á,伊将 hit 张乌乌 ê 纸条 hē-tī 银行家 ê 面前,hō͘ 伊看,顶面写:
亲爱 ê 父亲: 伊是我 ê 朋友,tī 顶 pái 相战 ê 时受伤,tùi 病院出来看你。请你接待伊亲像接待我一样。 你 ê kiaⁿ Chha-lī
银行家 chit-ē 看 tio̍h chit 张纸条 ê 内容,伊暂时放下工作,带伊到家己 ê 大厝,将 kiáⁿ 儿 ê 房间 hō͘ 伊用,食饭 ê 时,也是坐 tī kiáⁿ 所坐 ê 椅 á 位。照顾伊 ê lim 食,亲像照顾家己 ê kiáⁿ 一样。伊得 tio̍h 充分 ê 歇困 kap 疼护,紧紧恢复健康,chiah koh 送伊回到伊原来服务 ê 单位继续为国效劳。