约伯对伊受苦难得 tio̍h 福份,伊受考验来证明伊做人完全。Siâng 款,我受 ê 困难是 beh 坚强我 ê 品格,hō͘ 我得 tio̍h 前所无 ê 恩赐、才能。因为 siōng 熟 ê 果子是生 tī siōng 粗 piak-piak ê 墙围顶,必须 ài 经历过谦卑、流目屎、死亡, chiah 会得 tio̍h 荣耀。亲像约伯 ê 苦难 hō͘ 伊 tùi 上帝进一步 ê 认识,hō͘ 家己 koh-khah 谦卑。最后伊 chiah 会 án-ni 大声讲:「Taⁿ 我 ê 目睭看见你。」 (约伯记42:5)
假使通过痛苦、损失,我 thang 到庄严上帝 ê 面前,仆拜 tī 伊 ê 面前祈祷讲:「愿你 ê 旨意得成。」 (马太6:10) Án-ni 我所得 tio̍h ê 是何等 ê 大 ah。上帝 hō͘ 约伯看 tio̍h 伊未来 ê 荣华,因为 tī hiah-ê 苦难困苦 ê 日子,上帝 hō͘ 伊认识 tio̍h 上帝 ê 奥秘,chiah 会诚恳讲:「因为我知救赎我 ê 是活 ê。」 (约伯记19:25)所以「耶和华赐福约伯 ê 尾景赢过伊 ê 起头。」――tùi「默想」 困难 bōe 来见人,除非伊 ê 手中带一条金条。
表面 ê 逆境 tùi 正直 ê 人是有利 ê,只要愿意继续服事,耐心等待。回想过去有成就 ê 人,in lóng 有坚定 ê 信心,好胆向前无惊困难!咱若无愿意接受 koh 忍受困难,真 chōe 福份得 bōe tio̍h。有 ê 喜乐是通过忧伤 chiah 有 ê,有时上帝真理 ê 启示是 tī 地上 ê 光失去后 chiah 产生。收成是 tī 有耕作种作 ê 后面。
有史以来,siōng 坚强 ê 人是 tùi 苦难来产生,siōng 伟大 ê 人物身上 lóng 带苦痛 ê 伤迹。千年百世以来 ê 殉道者,穿荣光 ê 袍,顶面有金 sih-sih ê 光环,是通过 in ê 目屎 kap 受伤中看 tio̍h 天国 ê 大门。――Chapin
Tùi 所 phoa̍h ê 金链,知你疼 ê 精练,
Tùi 疼心 ê 表现,知你经过火 ê 试炼, 真实心 ah,继续进展,光 sih-sih 勇 ê 金链, 有静化火 ê 恩典,kap 苦难炉 ê 锻炼。――Adelaide Proctor