《赖永祥讲书》

 | | | 转寄

巴克礼推动白话字

作者 赖永祥 2006.04.30

赖永祥讲书(020)

台湾ê南北基督长老教会，过去真chē年lóng使用罗马拼音ê白话字。Chit种白话字是用ABC字母，将台语ê声音kap语调拼出来ê。白话字不但ē-tàng正确将圣经或其他ê意思传达hō͘读者，beh学会晓也m̄免用gōa-chē时间。

推动白话字最力者是巴克礼牧师(Thomas Barclay,1849-1935)。伊回忆讲：「自我来到台湾，taⁿ beh五十年，我一直坚信三项事。第一，若beh有健全koh有活命ê教会，每一个信徒不分男女，lóng tio̍h研读圣经。第二，chit-ê目标使用汉字是无法度达成。第三，使用罗马拼音ê白话字，ē-tàng达成这目标。白话字适合妇女、儿童kap未受过汉字教育ê人使用；读册人(士人)只用汉字，就是对白话字ê轻视。所以我决心以身作则，用白话字来代替汉字。我一生只有一pái讲道用汉字圣经，为tio̍h hit-pái我感觉遗憾。我当然知影，只用白话字会hō͘人误会做无学问ê人，但想到可能带来ê利益，我就不在乎loh。」(Edward Band. Barclay of Formosa,1936, p.67)

巴克礼牧师tī 1885年7月(光绪11年6月)，创办白话字ê刊物 ―― “Tâi-oân-hú-siâⁿ Kàu-hōe-pò”，用汉字写出就是《台湾府城教会报》。伊tī发刊词讲：「Lín本身看圣经，会受圣灵ê感化，虽然无人来教示，lín iáu-kú会明白上帝ê旨意。可惜lín本国ê字(汉字)真oh(难)，少少人看会晓得，所以阮有设法别物ê法度，用白话字来印册，hō͘ lín众人看khah快bat(懂)。最近tī府城阮有设一个印册ê器具，thang印字亲像chit号ê 款式。Taⁿ阮ǹg望lín众人beh出力学chiah-ê白话字；后来阮若印什么册，lín lóng会晓得看。人m̄-thang phah算因为伊bat孔子字(汉字)，所以m̄免学白话字, 也m̄-thang看轻伊，讲是gín-á所读ê。两样ê字lóng有路用，不过因为chit号白话字khah快也khah明, 所以人tio̍h代先学伊，后来若beh续读孔子字是真好；总是白话字tio̍h khah tāi先，惊了若m̄读白话字，lín bē晓得阮别日所印ê。所以阮苦劝lín众人、入教以及听道理ê人，男女老幼bat字kap m̄ bat字ê人，lóng总tio̍h紧紧来学。亲像án-ni，lín 就会晓得读chit号ê教会报、外册kap圣经。Ńg望lín ê道理ná深，德性ná齐(chiâu)备。」《台湾府城教会报》，就是《台湾教会公报》ê前身，白话字公报最后一期是1049/1050期合刊，时1969年3月。

十七世纪荷兰人tī台湾ê宣教，有相当ê成绩，但是荷兰政权hō͘郑成功赶走，基督教也真快就失落。其原因neh？巴克礼牧师认为是无将圣经译成本地语言，因为án-ni，无有人ē-thang得看圣经来保守其信仰。实在可惜ê是，当in tī荷兰印好台湾本地语言ê福音书ê时，已经慢(迟)loh。(Band. Barclay of Formosa, 1936, p.68)。按宣教师倪但理(Daniel Gravius)译出ê新港腔马太福音(Het Heylige Euaugelium Matthei.....)是tī 1661年刊行，隔tńg年2月，荷兰人就投降loh。(《教会史话》020话改写)