《生活e5台语，台语e5生活》

 | | | 转寄

透早ê素描――Khō͘ si-á送报纸ê少年家

作者 翔铃 2005.07.01

天气lú来lú寒冷（hân-léng）！逐工透早，可能真济人若想tio̍h ài tùi sio-sio ê 棉被内底爬起床，就感觉teh beh起ka-léng-sún（打哆索），心肝内可能想讲：「若会当kiu ti烧烙ê棉被里面，m̄免起来tàng冷风，不知beh jōa好leh？」

「Bōe（勿会）当koh nòa tī（赖在）眠床顶啦，为着顾三顿，顾一家伙ê腹肚，吃、穿、用，天气koh khah寒（kôaⁿ），嘛是要爬起来，kap伊拚落去！」这是大部分ê人ê心声。一种有责任感ê阿莎力，但是，ká-ná减一kóa欢喜、快乐ê热情。

●快乐e kho͘ si-á声

最近，逐工透早差不多固定ê时间，tī我头壳iáu浑浑沌沌、iáu未完全清醒ê时，就听见轻松、快乐ê kho͘ si-á声。每一工hit-e kho͘ si-á ê歌曲拢无仝款，不过，拢是hō͘人听了真轻松ê旋律。听到hit-ê「美妙」e kho͘ si-á，就想到细汉ê时，老爸kap阿兄、阿姊tî厝里kho͘ si-á，作伙合音ê闹热气氛，hō͘我原本浑浑沌沌ê头壳，随时清醒，kui-ê人精神起来。

「到底是sím-mi̍h人 teh kho͘ si-á？」为着beh看hit-ê人ê庐山真面目，hit日，我特别khah早起床。面洗洗leh、衫换换leh了后，就爬起去楼尾顶。

打开楼尾顶ê门，一káng（股）风吹过来，清凉透心肝，kui-ê人精神清爽起来。虽然日头尚未完全出来，不过天色已经光iāⁿ-iāⁿ。街仔路，有几个头毛已经白kah泛光e欧巴桑及欧吉桑，穿着整齐、同款ê运动衫，有讲有笑往附近学校ê方向行过去。我想，in应该是beh去学校练太极拳抑是练气功吧？真正是注重养身之道ê「快乐银发族」。除了chit-kóa beh去运动ê老大人以外，街仔路看起来淡薄仔冷冷清清，无看见半个少年人。少年人拢bih --khí 叨位？我想，可能拢koh kiu tî棉裘被里面；in-ūi chit-chūn离学生囡仔上课，抑是吃头路上班ê出门e时间还koh真久leh。

●骑着小绵羊ê庐山真面目

时间iáu真早，我一面做运动，háiⁿ手、伸脚、旋ām-á-kún……，一面斟酌注意听hit-ê从远远传来e kho͘ si-á声。 Hit-ê熟似5e旋律从远远ê所在传来，代先亲像轻声细说，后来渐渐接近，转做热情有力ê快乐声调。平平是对同一人ê嘴所kho͘出来ê，互人ê感觉竟然hiah-nih-á不同，真是稀奇！

Kho͘ si-a ê是一个粗勇、亲像「相扑选手」ê少年家，穿一件青蓝色ê hiû仔，骑着一台红色50cce「小绵羊」。「小绵羊」ê后座两边，报纸载khah tīⁿ满满。一种真趣味ê对照。我tī心里暗暗仔偷笑，也联想起中古世纪hit-ê追逐自己ê梦、为着beh打倒对敌，不惊面对艰难及危险ê西班牙浪漫英雄――唐吉诃德。这位粗勇ê送报纸ê少年仔，好亲像是用他e kho͘ si-a声，大声喊讲：「我来了！」 看chit-ê粗勇e少年家，一边kho͘ si-á ，kho͘出快乐ê乐曲；同时阵，手伸到后壁，用mé-lia̍h ê速度，抽一份报纸出来，然后，细腻仔将报纸áu作三áu（折成三折）。Áu好了后，轻轻仔将报纸khǹg入去阮厝边门脚口ê乌绿色ê信箱。了后，油门一催，「小绵羊」噗噗噗……ê声音，koh伴着他ê kho͘ si-á声，渐渐远去……。

●工作中得到满足快乐

Tī无tiuⁿ-tî ê时听tio̍h轻松快乐ê kho͘-si-á 声，引起我ê好奇想beh看chit-ê声音是出自何方人士。Hit工ê透早，看着chit-ê送报纸e一举一动，我ê心中tùi伊产生极大ê敬意。每一工，他不nā将全世界e好消息或是歹消息，带hō͘每一个订报纸ê人，也将轻松、快乐ê心情，透过si-á声带出来，感染ho͘每一个听到他ê kho͘ si-á声ê人。

对真济现代人来讲，若无赚大钱、住好厝、得到khah好ê地位、有互人欣羡ê名声，生活实在是快乐不起来。但是，tī这个逐日kho͘ si-á teh送报纸ê少年家身上，我发现，快乐是用金钱买不到ê；人ê品格是高尚或是卑贱，更加不是会当用金钱来chún-chat（衡量）ê。假使，一个人真努力去做一项他所欢喜ê代志，就算hit项代志tī别人ē目睭中实在没什么，甚至看做卑贱，但是他犹原真拍拚去做，并且心存欢喜，他所做ê代志，就是一项伟大ê代志。他tī工作中散发出来e活力与快乐，也会感染ho͘在他四围ê人。

Hit工透早，我从一个kho͘ si-á ê派报生身上，看见一个tī工作中得到满足快乐ê热情，也学习到一项人生ê功课！