《生活e5台语，台语e5生活》

 | | | 转寄

Tio̍h＝To̍h；Tō≠就(Chiū)

作者 Chuniok 2006.01.01

以前我一直认为 “tō=就(chiū)” ，真chē台语文文章mā是lóng án-ne。最近帮忙整理李勤岸教授ê文集出版，我起先lóng kā伊原来ê “to̍h”改作“tō”，伊kā我讲伊最近chiah发现“tō ≠就(chiū)”。我就去查《台日大辞典》，结果是：

1) To̍h [着] ＝[着(tio̍h)]ê(4)(5)(6)(7)(8)(9)kap (11)ê场合mā有发chit-ê音；但泉州系khah chē。 2) Tio̍h [着] ......(4)需要。例：~ 力；beh过去厦门 ~ 一暝一日；起一间厝 ~ 一千银。(5)表示命令。例： 你 ~ 去！~ 紧来！~ 起--来！lóng ~ 洗！你 ~ khah骨力--leh!你 ~ m̄-thang讲！(6)(kap[才(chiah)]对用)若...才...。例：~ 你去才有chhái-kang;~ 先phah定才有稳当；~ 有涵养ê人才有窗做先生。(7)表示他动词ê动作结果。例： 扭(láu) ~ 筋；犯 ~ 规矩；拾 ~ 银；thàn ~ 大钱；掠 ~ 贼；得 ~ 家伙。(8) 表示自动词ê动作结果。例： 接 ~ 伊ê phoe;船靠 ~ 砂；沃(ak) ~ 雨；tú ~ 朋友；见 ~ 头家。(9)主要khǹg tī副词、形容词ê顶面或说明动作ê结果koh附带条件ê假定。例： 讲 ~ lóng是无影；穿 ~ 碍gio̍h碍gio̍h;看 ~ 真súi;食 ~ 真苦；听 ~ 不止心适。(11)(kap[就]ê(3)(4)(5)仝意思来使用)(a)表示某动作结束真久ê意思。例：未领台以前我 ~ 有kap内地人teh来往；早起天未光我 ~ 来；自古早 ~ 有。(b) 某动作结束了马上ê场合。例：你tńg--去伊 ~ 来；食一杯酒面 ~ 红。 (c)说明假定某一项代志个结果。例： 无顾身命 ~ 会破病；无细腻 ~ 会跋倒；koh一个银hō͘你 ~ 够额。

我koh查手内所有ê字典，kan-ta陈修编ê《台湾话大词典》chiah有 “tō=就(chiū)”，莫怪一kóa台语文ê前辈讲：「陈修ê词典虽然有真chē错误ê所在，但对现此时ê台语文运动mā有相当ê帮助。」 台语文受外来政权迫害百外冬，taⁿ需要khah chē人来研究台语方面ê语言学，渐渐除去错误ê部分，紧来恢复咱台语ê原貌。