《生活e5台语，台语e5生活》

 | | | 转寄

《历史上ê主耶稣》推荐序

作者 Raphael Gamzou /甘若飞台表 2019.11.24

真荣幸，本人ta̍k年tùi台北受邀请落南去到台南参加基督教会举办ê Poâⁿ过节暗顿礼拜á是到台南神学院举办以色列音乐家音乐会ê时，有机会认bat一位热爱以色列ê杜英助牧师，而且tiāⁿ-tiāⁿ tùi伊听tio̍h伊亲自去以色列考察、研究圣经史地现场ê见识、经验kah心得。同时分享伊ê巨着《圣地宝迹精览》图书ê见证kah解说，非常欣慰。

事后，杜英助牧师koh kā伊多年来tiāⁿ-tiāⁿ去以色列实地hip ê真chē彩色相片带来台北我ê办公室，欢喜开讲伊旅游以色列ê趣闻kah感想。本人tī观赏杜英助牧师亲手所hip ê以色列ê历史图片了后，大大tio̍h惊hiah-ê图片是我看过ê图片中siōng有专业摄影水准ê作品，非常值得推荐hō͘ ta̍k位一向关心热爱以色列ê朋友，尤其是tī iáu未前往圣地参观旅行ê基督徒，当做tī出发前应该事先浏览kah研究ê珍贵资料。Ǹg望杜英助牧师最近几年来所编着ê《历史上ê主耶稣》新册，ē-tàng顺利出版，提供hō͘ 大家参考kah分享。

本人确信：以色列国ê土地是耶和华上帝赐hō͘ 阮偤太人ê列祖亚伯拉罕、以撒kah雅各，以及伊ê kiáⁿ孙tī世上定居ê一块「应允之美地」（申命记6：23），tú亲像摩西所讲：「Hit-ê súi ê地，hit-ê地有溪，有水泉，有深渊，tùi山谷kah山顶流出来。是出小麦、大麦、葡萄树、无花果树kah石榴树ê地，mā是出橄榄树kah蜜ê地。」（申命记8：7、8），直到chit-má，以色列肥koh súi ê土地iáu是仝款盛产五谷、菜蔬、果籽、蜂蜜kah牛奶等等，充分证实上帝应允之地「he是流奶kah蜜之地」（申命记11：9），是偤太人有权利tòa ê乐土，mā是全世界基督徒心内ê信仰kah属灵ê家乡。

旅居国外ê偤太人siōng大ê心愿，to̍h是ta̍k年lóng有一pái机会koh再tńg去到耶路撒冷，kah乡亲喜相逢。我衷心ǹg望台湾ê基督徒朋友，一生中间至少mā有一pái机会来到以色列，跟tòe主耶稣ê传道行踪，行遍圣地，分享上帝ê赐福。耶路撒冷圣城，顾名思义to̍h是上帝赐「平安ê城」，凡来到耶路撒冷朝圣ê人，一定会体验tio̍h「以色列ê上帝kā气力kah权能赏赐hō͘他ê子民。」（诗篇68：35）

人类信仰史迹ê现场真相，「用耳听讲」不如「眼见为凭」重要，本人谨代表以色列国家诚心欢迎凡若心中想beh认bat「历史上ê主耶稣」，而且渴慕来耶路撒冷「朝见上帝」ê所有台湾国内外ê朋友，美梦成真！愿上帝tī基督里tùi锡安赐福hō͘ 你健康、喜乐和平安！

ISEO驻台湾以色列经济文化办事处
甘若飞代表
Raphael Gamzou
Representative