《生活e5台语，台语e5生活》

 | | | 转寄

林俊义教授，阮感谢你！

作者 《绿色短评》李南衡 2011.09.25

　　　　　 　　美国留学tńg来台湾了后四十外年来，林俊义教授一方面伫东海大学教册、裁培一批一批ê学生伫台湾环保工作顶面用心尽力；一方面伊本人chhōa头为台湾环保拍拚。受tio̍h今年三月十一日本大地动所引起ê核能发电厂灾难，kah民进党总统候选人蔡英文提出「2025非核家园计划」ê刺激，已经退休ê林俊义教授决定beh koh徛出来作志工，为台湾chit块土地来贡献心力。

　　林教授足清楚，若是干单讲「非核家园」，有可能会变作一句口号；照蔡英文所提出有时间性ê「2025非核家园计划」，才会变作一个理想。理想beh按怎达成？除了the̍h tio̍h政权用行政力推动以外，伊认为上重要是教育，按怎hō͘全台湾ê人了解啥物是核能发电厂，对台湾chit块土地会有啥影响？kah生活伫台湾两千三百万人有啥关系？伊采取上传统、上有效ê教育方法：培养种子教师。

　　八月三十一，林俊义教授接受「主妇联盟」ê邀请，举行「打破核安神话」系列讲座，向环保志工说明「你m̄知影ê恐怖核电真相」。伊问环保志工：「你敢知影事后处理核灾ê费用，至少是起一座核电厂费用ê七倍，甚至悬到七百倍！」核电是无kā人准作人ê科技，核废料内底ê钸，半衰期是两万四千七百年，完全无害tio̍h爱二十五万年！伊讲，伊m̄是thiau故意讲hō͘人惊。林教授用日本福岛核灾作例，目前福岛核电厂半径六十公里范围内ê土地差不多拢受污染，人类beh食ùi污染土地生长出来ê动物植物，一定mā拢会受tio̍h污染。根据日本公布ê数据，福岛ê铯137 ê量是当年广岛原子弹释放ê一百六十八倍。马政府kah台电一再向人民宣导核电真安全。伊讲「根据外国经验，一旦有人为操作无拄好，足容易发生核灾，特别是反应炉出问题，tio̍h有炉仔心熔毁ê危险。」伊讲核四厂一旦正式运转，就是万年bē死ê怪兽。万一台湾若发生亲像福岛ê核灾，m̄-nā股市房屋拢会毁无去，人ê死伤koh-khah无法度估计，siáng都无地走。林教授一再提醒逐个：「人类一定爱khah谦卑一丝仔！」

　　台湾基督长老教会总会举办「非核家园」种籽讲师人才训练会，八月二二、二三，伫台东新港教会开始，邀请林俊义教授去上课，ùi生态理论、核能发电真相、再生能源等，来探讨「非核家园」ê迫切性。续落去九月初五、初六，伫台南富强教会。预定beh伫全台湾巡回培训反核讲师，伊希望学员会tàng运用伊所讲ê课程内容kah所发ê资料讲义，伫教会、团契、社区来宣传非核家园理念。

　　林教授所做美好ê工，一定会伫全台湾湠开，「流目屎掖种ê，beh出欢喜声收割！」相信台湾会伫2025年进前变成「非核家园」。林俊义教授，阮感谢你！