《生活e5台语，台语e5生活》

 | | | 转寄

埃及蒙恩记（4/5）

作者 陈凤翔 2011.03.20

后来顺利出埃及进入以色列，好友听了chit段，sńg笑讲伊也tio̍h讲： “I have kids, Don't kill me. “ 我bē了解就问讲：「你黄金罗汉脚，thái有gín-á？」伊讲：「Lín有两个，bē晓分我一个ah？」 平安了，就ē-tàng大讲sńg笑，当时ē-sái讲是一点á mā笑bē出来。

捱到第三工早起。仝旅馆有真chē外国团lóng决定搭机tńg来国内，因为阮ê签证问题，无法度提早去以色列，但苏伊士运河hit条公路暴动mā小khóa平息，交通管制开放，tùi án-ne照第三日ê行程，坐巴士前往埃及杳无人烟ê西奈旷野，去hip西奈山：耶和华上帝tī-hia kap摩西讲话，并kā两块法版交hō͘伊ê圣山。上帝感动院长做了chit-ê极佳ê决定，若无阮一阵人就会像新闻播ê一堆旅客挤tī机场坐tiàm土脚苦候。

巴士tùi吉萨路经过开罗市区，ǹg西奈旷野驶去。沿途lóng是hông phah破毁坏ê店面，每条街口lóng设哨站，并有荷枪实弹ê军人teh看守，iáu有民间家己组成ê守望相助军，防止有人趁火phah劫。连gín-á lóng the̍h棍棒加入！一整排ê装甲运兵车守tiâu重要ê政府机关，电影chiah看会tio̍h ê重军备kui排，全履带配置、有两栖能力、thang高速行驶ê M113装甲运兵车、M60坦克车。Jú驶近郊区，边界驻守ê则是siōng大台ê主力坦克车，甚至iáu有大型军用运输车kap卡车。终其尾tio̍h出埃及，竟然kap当年以色列人出埃及ê心情一般，挡bē-tàng赶紧远离成群ê埃及军。

Tùi埃 kap西奈半岛荒漠tio̍h进入埃及热闹ê市镇，lóng一一受tio̍h严格盘查。每台车lóng会被cha̍h落来彻底搜查，看起来可疑ê份子lóng会 被详细盘问。阮方向相反，前往郊区西奈半岛，所以检查松散。车顶，院长带阮读圣经以赛亚册十九章21节：「耶和华beh hō͘埃及人bat他；tī hit日埃及人的确bat耶和华，… 」先知以赛亚预言耶和华赐福埃及，in将来mā仝款是上帝ê人民。大家纷纷为chit-ê土地求平安祈祷。