《生活e5台语，台语e5生活》

 | | | 转寄

台湾 「爱玉á」(之1）

作者 黄庆三 2011.01.23

爱玉á (Jelly Fig，学名 Ficus awkeotsang Makino) 是台湾特有植物 (to̍h是原来只有台湾chiah有ê植物)。伊属tī桑科 (Moraceae Family)，无花果属或榕属 (Ficus genus)，是常绿多年生藤本植物。日本人牧野富太郎 (T. Makino) tī 1904 年发表爱玉á是一个新种，chiah订出伊ê学名。台湾ê俗名有枳á、玉枳、草枳á、枳蒲、天抛子等等。伊ê天然生长地以台湾中央山脉海拔 1,000 到 1,800 公尺，多雨、潮湿ê阔叶林内。主要产地是嘉义县，有「爱玉王国」ê好名声。续落来是南投县。

讲到同属无仝种ê薜荔 (Climbing Fig，学名 Ficus pumila)，会结爱玉冻ê成分极少，并无食用ê商品价值。台湾各地区、南加州、佛罗里达州等，1 lóng常kā薜荔当做绿化桥墩、水泥墙、砖墙、庭院ê用途；或以篱树修剪法 (Topiary)，而且常用模型支架，做成动物、飞鸟、景观等等造型。

「爱玉」chit-ê名称ê由来，根据连雅堂 1921 年ê「台湾通史」ê「农业志、果之属」中ê记载，2清朝道光初年 (道光元年是 1821 年)，有福建同安商人常来嘉义采购土产。有一个日头赤iā-iā ê日，行路经过大埔乡，伊真嘴ta，tùi án-ne用手捧起来lim山溪ê水。却见水面坚冻，lim了后心凉脾土开。伊真奇怪，án-ne日头赤iā-iā ê日为什么溪水会结冰？细看之下，chiah看tio̍h水中有树子落kah满四界，k?伊揉有浆。Tùi án-ne拾一kóa树子带tńg去厝里，用水洗了后无jōa久就坚冻。若加糖水，口味koh-khah chán。Chit位商人有一个 15 岁、生做kó͘-chui得人疼ê cha-bó͘-kiáⁿ叫爱玉，伊就用chit种树子做成果冻来卖，真受欢迎。Tùi án-ne chiah-ê顾客就kā伊叫做「爱玉冻」。但是连雅堂所讲：「按爱玉子，即薜荔」并无正确。

因为多年来台湾阔叶林hō͘人大量锉掉，野生爱玉á大大减少，所以发展人工栽培。Siōng早人工栽培成果无好，因为它常tī果实成熟以前，便产生果实i?u未熟就落现象。经行政院农业委员会苗栗农业改良场多年ê研究，chiah知影原来是减少「爱玉小蜂」 (Fig Wasp，属tī膜翅目榕小蜂科 Hymenoptera：Agaonidae) ê传送花粉交配，造成爱玉雌果iáu未成熟就脱离树枝来来来。「爱玉小蜂」约二毫米 (mm) 长，小kah ē-tàng穿过针孔。

爱玉雌、雄异株，必须靠顶面所讲ê「爱玉小蜂」来传送花粉交配。咱食用ê「爱玉冻」是ùi雌株生产ê雌榕果制成 (to̍h是雌爱玉果)，á雄株生产ê雄果则成做爱玉小蜂产卵、孵育成虫ê温床。雄果中ê「虫瘿花」(Gall Flower) 提供爱玉雌小蜂产卵、孵化，á发育成「虫瘿」(或叫「树瘿」) (Gall)。

所谓「虫瘿」是一kóa种类ê小动物，会tī植物体 (比如叶子、枝桠) 注入一kóa化学物质，刺激植物产生组织增生á膨大。Chiah-ê造瘿ê小动物，khah大面会bih-tī增生ê组织里面，吸食植物ê汁液 (养分)。常常看见橡树顶乒乓球形ê五倍子或无食子 (Oak Gall 或Oak Apple) 就是一例。Chiah-ê小动物m̄-nā得tio̍h虫瘿ê保护，而且mā取得食物ê来源。通常只有chiah-ê小动物受益，所以是一种「片利共生」(Communalism) ê现象。但爱玉小蜂kap爱玉则是「互利共生」 (Mutualism)，因为爱玉小蜂tī爱玉雄果内产卵、生湠下一代，但雌爱玉小蜂则负起为爱玉雌果传送花粉交配ê任务。因为两个互相依赖，bē-ōe chhōe求替代ê对象，所以特别koh叫「义务性」互利共生 ( Obligate Mutualism)。

因为极大多数ê无花果，包括人类食用ê无花果 (Edible Figs)，lóng靠chit种义务性互利共生ê各种无花果专属ê特别小蜂，比若加州出产、非常香甜ê Calimyrna Fig，需要靠Ficus carica 雄无花果中ê Blastophaga psenes Wasp 3来传送花粉交配；而且无花果是热带雨林靠果实是生动物siōng重要ê食物来源，所以借机就kā这奇妙ê、tùi白垩纪 (Cretaceous Period, 70 到130 百万年前) 就开始ê无花果kap小蜂之间，义务性「互利共生」ê情况，借爱玉果说明一下。
雄爱玉果内孵化ê爱玉小蜂，当然雌、雄lóng有。雄小蜂因为kui世人lóng tī乌暗ê雄爱玉果内，伊ê主要任务是交配生湠下一代。所以雄小蜂无目chiu或翅，但嗅觉、交配器官特别发达。成长ê雄小蜂会chhōe、并咬开雌小蜂成长ê虫瘿，先行交配了后，koh再kā开嘴咬kah koh-khah大，hō͘雌小蜂ē-tàng爬出来 (雌小蜂无法度家己咬开虫瘿)。雄小蜂tī交配数次了后就死亡了。雌小蜂则有翅，当伊爬过雄花区、粘tiâu花粉了后，tùi爱玉底部ê小孔钻出，飞离雄爱玉果，chhōe新ê爱玉果产卵。