《生活e5台语，台语e5生活》

 | | | 转寄

E世代ê网路福音事工

作者 Lîm Chùn-io̍k 林俊育 2010.06.27

「Tio̍h从福音传hō͘万民听」kap「福音tio̍h传到天边海角」，基督徒lóng抱tio̍h chit两个异象kap决心，koh常常祈祷讲：「主ah, 我tī-chia, 求你差遣我！」，但因为不得要领soah tiāⁿ-tiāⁿ有挫折感。

听人祈祷ê上帝回答我ê祈祷讲：「我知每一人ê能力有限，所以我hō͘人类有够额ê聪明智慧来发展电脑网路科技，这是siōng好ê传福音管道。」有影to̍h-tio̍h, 我无读神学院m̄是牧师，我bē晓唱歌无参加圣歌队，但我学会晓kā牧师传讲ê信息kap圣歌队献诗录影制片上网，就是将传统ê传福音方式记录落来，tī网路顶面延伸出去，「传到天边海角」去「hō͘万民听」。

感谢上主ê引chhōa带领，2001年tī哈佛大学台语课李勤岸教授指导下，我开始学白话字，白话字圣经kap圣诗是我现成ê教材。续落来koh参加台湾罗马字协会，chit-ê协会是一阵郑儿玉牧师ê白话字班学生所组成ê,in 97%是热爱台语ê非基督徒。协会会友tiāⁿ-tiāⁿ提起「大部分文字ê圣经lóng有上网，独独无看tio̍h台语文圣经上网」。我也bat hō͘协会监事kí我ê鼻孔责备讲：「Lín长老教会除了郑儿玉牧师以外lóng无效！」（指白话字ê推广）。我详细检讨了后发现有影to̍h-tio̍h,台湾长老教会ná亲像郑儿玉牧师所讲ê败家子，kā咱信仰前辈留hō͘咱宝贵ê白话字资产败kah kiōng-boeh无去。我chit-ê人bē堪得人刺激，从án-ne下性命整理白话字圣经kap各种文献ê资料上网。

Hit时阮波士顿台湾基督教会ê陈清俊长老，将伊用六年半时间kā巴克礼白话字圣经phah字做成电子档案hō͘我。我欢喜kah随时kā伊整理做网路thang用ê白话字格式，交hō͘ hit当时ê圣经公会总干事并请伊上网，但是一拖koh再拖lóng无boeh上网。协会会友想讲《红皮圣经》未出版就被国民党政府没收所以无版权问题，阮就koh请陈清俊长老phah字，我也kā伊ê白话字版翻写做汉罗，由「暗光鸟ê厝」网站店主Henry处理上网。

台语圣经上网了后，引起信望爱网站 （http://fhl.net ）来kap我连络，ài我提供《红皮圣经》ê电子档案thang hō in上网。阮见面讲无两句话就「一拍即合」，我hō͘ in全部ê电子档案，in也一声to̍h答应开设台语信望爱，后来koh用仝模式来开设客语信望爱（ http://hakka.fhl.net ）kap思罗安信望爱（台语点字 http://sloan.fhl.net ）。

2005年四月初版（试用版）ê《红皮圣经》附录有叫我写「台语圣经上网loh」，可惜2009年一月初版ê时无通知我更新内容，因为「暗光鸟ê厝」已经关门，《红皮圣经》网站也早to̍h 徙来台语信望爱（ http://taigi.fhl.net ）。Hit时因为巴克礼圣经ê版权也已经结束，白话字版kap我翻写ê汉罗版同时上网，ē-tàng kap其他圣经版本并列来读，方便读者做各版本ê比较研究。

为tio̍h对hiah-ê 97%热爱台语ê非基督徒，除了丰盛台语/客语ê灵修资源以外，阮也开发真chē工具（如华语转台语/客语、全罗转汉罗、汉罗转全罗等等）kap信望爱台语客语输入法。为tio̍h方便学习台罗ê人士，网页ē-tàng随时切换做台罗版来读。根据学者统计，台湾约有97% ê台语文盲，所以阮制作真chē有声、有影ê台语教材kap资讯。因为篇幅ê关系，若有机会chiah koh来一一详细绍介。

最后诚恳邀请有心人士来参与chit-ê E世代ê台语（包括客语kap盲人点字）网路福音事工。