《生活e5台语，台语e5生活》

 | | | 转寄

人生下半场

作者 林元生 2008.08.17

我一生中siōng大ê褔气就是：iáu tī母腹内底ê时，就已经是基督徒ah。自细汉我对信仰虽然m̄-bat怀疑过，却mā m̄是一开始就热心追求，无像现在摸会tio̍h神，伊讲ê话每一句lóng深深感动我。我一直认为：chit-ê信仰就是我决定如何经营人生下半场ê siōng主要因素。

大部分人认为宗教lóng是劝人向善ê,但我boeh讲，真正ê信仰是人kap神建立关系。今á日我boeh用「真、善、美」三个字来诠释我所信仰ê神，分享伊如何hō͘我ê生命，koh真、koh善、koh美。

真
劝善是宗教起码ê条件，假使宗教无劝善，就会kā人类带入去万劫不复ê境地。基督教ê信仰就是「Chhōe-tio̍h真神」。基督徒所认知ê魔鬼，就是ná乌社会ê人，只要你拜过魔鬼，伊就会掌握你ê 把柄。Á基督徒所信ê是koh真koh活ê真神，ē-tàng救咱脱离所有ê凶恶；只要你愿意追求，就一定chhōe会tio̍h。

真神无所不知、无所不在，人mā无法度用家己ê理性去理解真神。长老教会tī台湾已经有140 gōa年ê历史，巴克礼来台60年，á马偕tī chit所在娶bó͘生kiáⁿ、建立长老教会，一生lóng献hō͘台湾。Ē-sái讲是，大多数长老教会ê信徒lóng已经bē记得巴克礼kap马偕ê精神，á kan-ta会用理性来理解神。其实，神ê作为常常是出人意料之外ê,ē-tàng做你做bē到 ê事ê神，chiah是真神。所以，你kám iáu-beh去拜人手所雕刻ê偶像？信奉真神就无错！你ē-tàng无kap基督徒仝款称伊为上帝，但是，当你chhōe-tio̍h真神ê时，你一定ē-tàng拥有一个丰盛ê生命！

善
善是宗教ê另外一基本条件。旧约圣经内底对「善」ê诠释真chē;á耶稣降世了后，tī新约内底对「善」ê描写koh-khah彻底，其中一项是：thang为敌人祈祷！若咱每一个人lóng ē-tàng接受chit份善ê信仰，世上ê纷争就ē-tàng化解，冤仇就ē-tàng消弭。

可能你mā bat听过旧约圣经内底ê十诫，耶稣将伊「简化」为二项：疼上帝kap疼人如己。若你ē-tàng掌握疼人如己，就ē-tàng明白基督教内底疼ê真谛kap善ê定义。

美
好ê信仰，真正ē-tàng为你ê生命带来「美」。假使你ê信仰hō͘你终日目头结结，án-ne你to̍h mài去传褔音lah,因为人会感觉：若伊kap你同信一个信仰，he kám m̄是就变kah目头结结？好ê信仰会hō͘你体会tio̍h:世上虽有苦难，但耶稣降生了后，伊beh为咱带来喜乐kap平安。

基督徒ê肉体mā会破病，但当你去探病ê时，真正ê基督徒m̄-nā bē向你诉苦，颠倒会kap你分享神藉tio̍h病痛所赏赐ê恩典；即使重病临终，mā会感谢神ê同在。

人生上半场
30年前我kap几位朋友创业，创业有点á成绩了后，公司ài我作总经理。我个人对高位无兴趣，但因为需要，tùi án-ne我向公司讲三年就好。无phah算，三年了后竟然因为市场因素soah「骑虎难下」。

终结红包文化
「红包文化」tī商场上kah-ná消灭bē-liáu,我mā真gông-gia̍h,为何谈seng-lí一定ài送红包leh?虽然m̄是人人lóng贪，但有kóa商家若无送红包就有困难。我作总经理ê时就常耳闻有6-10家公司ê采购kap品管一定ài送红包。但我kā幕僚讲，chit项事一定tio̍h停止。虽然幕僚讲，若无送红包seng-lí可能就会无去，但我iáu是坚持，我boeh照我ê信仰来行事。因为我看tio̍h另外一个层面，真chē人认为送红包ē-tàng解决问题，实际上是将公司带入去灾难。

头家ài kā公司经营、管理好，特别是基督徒，就ài学习jú来jú圣洁、jú符合神ê旨意，圣经所教导ê,一定tio̍h勉力去行。因为人会犯罪，所以神kā耶稣赐hō͘世人，hō͘咱有悔改ê机会，有权柄得tio̍h神ê赦免。

后来阮停止送红包了后，seng-lí并无减少。但mā因为án-ne,公司服务ê品质就koh-khah提升、比别人koh-khah好。我对做业务ê讲，若咱ê服务已经chiah-ni̍h好ah,á对方若iáu无满意，án-ne咱mā m̄免遗憾，因为将来后悔ê会是in。

建立制度・奠好基础
我想beh强调：做了六年ê总经理了后，照基督ê信仰行事，公司ê seng-lí m̄-nā无落，颠倒tī六年内底成长了四倍，á内部该建立ê制度mā tī hit段时间中建立好势，奠定了未来ē-tàng做得koh-khah好ê基础。

换句话来讲，制度好，成长就bē有siuⁿ大ê问题。Hit时阮将内部ê品管、生产线等制度lóng以国际化ê标准来订定，甚至聘请国际性ê企管公司来帮忙企划工厂kap公司ê管理（tī hit当时iáu无流行chit种ê事）。

服事神从来m̄-bat停过
等公司真正稳定进入轨道了后，我开始思考如何tī 50岁chìn前ē-tàng有koh-khah chē时间服事神。Tī chia我想kā众基督徒讲，我并m̄是等到50岁chiah开始服事神。事实上，即使平日无闲事业，tī工作ē-tàng负荷ê情况下，我iáu tī教会作了14年半ê主日学校长。Chit十gōa年中间虽然比较khah无闲，mā付出了代价，但我kap神ê关系kap对圣经ê认bat却深入bē少。因为身为主日学老师，就有「催逼」家己好好á研习kap预备教材ê责任，á神mā hō͘我透过圣经ê知识，hō͘神kap我ê生命有khah súi ê连结。

服事tio̍h 趁早开始，随时lóng thang进行
服事tio̍h 趁早开始，随时lóng thang进行。若一个gín-á从来m̄-bat hō͘伊做家事，长大了后ài伊做就无容易loh。服事亦是án-ne,对基督徒来讲，无论身分或年纪，服事kap传褔音ná亲像phah篮球或siû水，lóng是基督徒ê基本动作。基本动作养成了后，什么时什么所在lóng thang传褔音，无一定tio̍h等到进入人生下半场后chiah着手。

什一奉献
圣经ê话语hō͘我回想起早年ê人生。玛拉基书内底提起基督徒ài做「什一奉献」（薪水拨出十分之一作为奉献），我tī领第一份薪水时就已开始什一奉献，但只是照圣经ê教导做，无想kah真清楚。后来chiah发现，神讲，你只要奉献十分之一，伊就beh phah开天窗来祝褔你。感谢神！我án-ne做了后，神真是大大地赐褔hō͘我！守神ê诫命是无条件ê,只要神tio̍h用ê,就应当奉献。以上是我人生上半场ê思维。

人生下半场
我因为基督信仰来行入社会。但为何我boeh调整人生ê下半场neh?30年前我teh创业ê时，就立落来一个志愿：只要我thàn tio̍h钱，就一定会为社会做kóa tāi-chì,但我无希望tī老眼昏花、口齿不清ê时chiah献身hō͘上帝。
　　有人规划家己人生ê下半场是去读神学院，将来ài做牧师。但我boeh提醒：你ê身躯况状kám良好？你是因为世俗ê工作无顺利chiah想beh「换走道」mah?我m̄是反对人读神学院，却是心态有争议。Tī调整人生下半场ê时，需要思考以下几点：

1. 对家己kap社会有帮助
服事神ê态度一定会真清楚，m̄是toh一pêng做了无好chiah beh来做另外ê事。Tī公司chiah-ni̍h chē年来，同仁因贪污á hō͘我「请行路」ê约有三、四人，á我会做chit-ê决定，其实是帮助in,mā是teh帮助社会。无论做任何tāi-chì,即使tī规划调整人生下半场ê时，mā应该持守chit种ê心态――ài对家己、对社会有帮助。

有了chit种ê理念，我想我就ē-tàng帮企业或机构做调整。若kā企业管理ê原则以及欧美公司管理ê理念带到教会，必定ē-tàng帮助台湾教会ê宣教kap服务机构ê慈善工作。

2. 学习boài/mài掌声
位居高位ê人有真chē机会hō͘别人ê奉承kap扶tháⁿ，但he lóng是虚无ê。将总经理ê位á交棒了后，我并无想beh参与siuⁿ-chē公司ê事务，但董事长却希望我koh担重任。我kā伊讲，应该hō͘新人有机会起来；而且我想beh做服事神ê工作，若负责siuⁿ-chē事务，就无时间服事神loh。

3. 过简朴ê生活
人thàn tio̍h ê钱无一定tio̍h全部花完，会晓过简朴生活（simple life)chiah会晓感恩。真chē人tùi职场第一线退落来了后，lóng会面临退休症候群，无法度适应。Á基督徒siōng-súi ê所在就是：随时随地lóng ē-tàng感恩，用感恩ê心来面对各样ê困难。

4. 设定优先kap授权
虽然我现在挂名副董事长，但每三个月chiah kap干部开一pái会，年度计划有总经理kap幕僚teh筹策，我就充分授权，hō͘ in尽情发挥。 我真重视服事ê优先次序，因为chhōe我捐款ê人kap活动相当chē,á人ê时间、金钱kap能力实在真有限，不得不tī特定ê范围内去排出优先顺序。会晓排出轻重缓急，生活chiah bē burn o͘t(耗竭）。基督徒mài惊面对问题，只要kā优先次序定好，一定ē-tàng tī神ê应允内底成就kap解决。

5. 适时地讲ＮＯ！
只要无tī你优先范围ê事，lóng thang选择暂缓或不做。「忠仆团契」ê异象kap聚会hō͘我愿意kā时间khǹg tī kap未信ê朋友分享人生kap信仰。即使只有一人因为听我ê分享á信耶稣，我lóng感谢神！

各位iáu未信ê众朋友，thang知lín ê生命对神来讲有jōa重要？圣经内底有记载：有一个人被鬼附身，去求耶稣赶鬼。Hit阵鬼beh被赶出来ê时，看见边á有一大阵猪teh食物件，鬼就要求耶稣讲：「若kā阮赶出去，就打发阮进入猪群pah。」耶稣讲：「去pah。」鬼就出来，进入猪群，忽然全群猪闯落去山崖，lóng投入海里淹死去。

神藉tio̍h chit段故事kā咱讲：神看重你，ài hō͘你成做新造ê人，生命更新，有新ê生活kap坚定ê信仰。

6. Chhōe志同道合ê朋友　　
Ē-tàng kā人生下半场安排得好，有赖志同道合ê朋友同齐工作，无论是从事社会褔利、教会宣教或灵命更新，只要hō͘神改变，生命一定会无仝款；á chit中间一定会有志同道合ê朋友，tī软弱ê时、困难ê时，thang互相支援kap扶持。Siōng重要ê是：这是神hō͘咱ê诫命―kap人和好，kā事做tio̍h,有好见证。

　　神疼你，tī你未出生chìn前，伊对你ê生命就已经有安排。你相信他就无m̄-tio̍h!