《生活e5台语，台语e5生活》

 | | | 转寄

公投

作者 Tân Chheng-chùn 2008.02.10

台湾tī今年(2008)三月22日有总统ê选举，同时也有两件「公投」ê案件。就是「入联公投」kap 「返联公投」。公投是全体「公民投票」，chit遍ê公投ê案件有特别ê意思，就是全民向世界ê人士来 “tâu”―阮ài入(á是倒tńg去)联合国。

台湾话chit字 “tâu”字真有意思。当两个gín-ná冤家、相争、受冤屈，á是khah输khah弱ê一方，就去向父母tâu，讲出伊ê冤枉，委屈。父母用公平公道来判断来处理。

台湾，以前是「亚西亚ê孤儿」，现在「进一步」成做「世界ê孤儿」，因为世界中只有chhun台湾受拒绝bōe-sái加入联合国。为甚么？因为有一个pháiⁿ厝边―中国ê阻挡。台湾ê国际空间受束缚，beh入联合国也受拒绝。受tio̍h chit种ê冤屈，咱beh去tó位讲？beh去tó位tâu？向联合国，人无ài chhap。所以就是tio̍h向世界所有ê人tâu。Án怎tâu？就是用「公投」。无管中国国民党á是民主进步党，lóng有提出beh入联合国ê 「公投案」。真希望chiah-ê案lóng会通过。公投是表示咱台湾人所有ê人民全体ê意见，向全世界来表达咱ê意爱，也表达讲出所受ê冤屈。希望世界ê人会伸出公义ê手来完成咱全体台湾人ê心意。

咱tī世界ê情形也是án-ni，受中国大大ê欺负，委屈无tè tháu，beh án怎？「入联公投」á是「返联公投」就是咱ê表示。咱所beh向世间人tâu ê表示。表示咱ê委屈。希望世界正义人士主持公道。特别ài每一个人lóng出来「公投」。亲像中央选举委员会所讲：「北有北投，南有南投，公民ài公投。」。「入联公投」kap 「返联公投」lóng是表现台湾人民beh入联合国ê心声kap意愿。拜托！拜托！大家出来tâu，「向全世界tâu」，hō͘ chit两案lóng通过。因为台湾ê公投àn通过ê条件khah koân，需要大家努力。Chiah会达成。拜托！Tī 3月22日ài会记得出来公投。Án-ni咱ê心声tī国际beh有听tio̍h。Tùi台湾ê前途有帮助。Jú chōe赞成jú有力，赞成ê比率jú-koân，声量就jū大，jú有力量。大家相鼓励，相招来去「公投。」将咱ê冤屈tâu出来。世界正义人士会听tio̍h，「人助天助」。上帝，á是天公也beh行动。「天佑台湾」！代价phah拚来达成。