《陈雷文选》

 | | | 转寄

太武山魂

作者 陈雷 2007.09.16

Tī chia，全排湾散赤ê庄落，伊上盖老，bē输玛家koh入去hit chōa秃头ê旧山，老kah人bē记得伊ê名，拢叫伊“长老”niā -niā，古早番社时代tō按呢称呼。无人知影确实几岁，老一辈ê讲，日本人森丑之助来北叶社访问调查hit年，有hip着伊ê相。社头阿助身边，ku tī土脚hit个长头鬃ê gín-á tō是伊。照按呢算来，上盖无也有一百岁a。四kho͘围散乡ê山内，近近hn̄g-hn̄g，真chē人来请教伊，问生问死。减彩一方面是尊敬伊活一百年ê智慧，我想主要是有信仰伊，亲像in有信仰山hit款。因为tī排湾ê庄落玛家、泰武、春日chia、看会着ê拢是粘作一伙ê山岭，一棱一棱thia̍p koân起lah，上内面入去神teh tòa，不时 tah雾、giâ云ang，tī山顶尖hia。

“为啥物beh生肚脐？”伊拢总问二摆遍，因为m̄ bat听过这款龟怪ê请求。阿妹khiā tī伊面前，裙掀起来hō͘伊看，讲：“因为我无肚脐。”m̄信家己ê目睭，长老用火chhiō，用指头á尾摸，pak肚皮若金瓜滑溜溜，无khî也无chōa。成实一世人m̄ bat看过这款无肚脐ê!

阿妹出世了，满月才落肚脐蒂。Pak肚皮规粒金金滑滑，老母chhōe无肚脐，抱去问医生。医生讲，无要紧，gín-á勇健tō好。Khah大汉ê时，看阿姊有肚脐，问老母：“阿姊pak肚thài破一空？”老母喜ā m̄爱伊问siūⁿ chē，chhìn-chhái应：“阿姊出世ê时，无细字去割着。”khah大汉了，kap隔壁锦a chhit-thô“老母生kiáⁿ”。阿妹问：“作老母beh按怎生kiáⁿ？”锦a讲：“我生hō͘你看。”衫le̍k起来，比hit粒肚脐：“ùi chia生。”阿妹看pak肚中央一粒圆圆pok-pok，若糖kâm-á，问：“你细汉无细字割--着？”锦a应：“m̄是割着。Che是我ê肚脐。”“肚脐是啥？”“Tō是老母生kiáⁿ用ê。”阿妹讲：“我无肚脐。”锦a骂伊：“你乌白讲。大家mā有肚脐。来，我教你生kiáⁿ。”掀伊ê裙起来，chîn一晡，chhōe无肚脐，hoah：“你无肚脐！你bē生kiáⁿ！”Chông leh走，转去tâu in老母，阿妹无肚脐。老母骂：“乌白讲！ná有人无肚脐！”koh四界去宣传，厝边隔壁ê gín-á拢知影阿妹无肚脐，无人beh kap伊chhit-thô，kan-an创治伊。“无肚脐，无肚脐，阿妹ùi tó来？青狂bē记带肚脐。…”kā伊笑。去学校读册了后，阿妹写作文“我ê第一个愿望”，tō是beh生一个肚脐。老师拍点数丙下，批一chōa字：“乌白想，乌白写。”

阿妹爱唱歌，kā老母讲，大汉beh表演唱歌，上台作歌星。老母知影阿妹有天份，chhōe一个老师kā教。第一课教发声，老师讲：“声ài ùi肚脐发出来。”阿妹无肚脐，m̄敢koh去学唱歌。

伊kā老母讲，beh生一个肚脐，老母讲，che kan-na长老有发法度。因为伊有信伊，亲像信山hit款。阿妹来玛家chhōe长老，请求伊：“我爱beh生一个肚脐。”长老问二摆：“为啥物beh生肚脐？”因为m̄ bat听过这款龟怪ê要求。阿妹掀pak肚hō͘伊看，讲：“因为我无肚脐。”成实长老看无肚脐，摸也无肚脐，雄雄phak落去kā伊拜，嘴里ki-ki ku-ku念一大堆，tō是排湾人祈祷敬拜ê话。阿妹听无。问伊：“为啥物拜我？”长老才讲：“我tī chia等真久a。我知影你会来。Chit-má你来a，请你chhōa我转去。”阿妹问：“chhōa你转去tó位？”“太武山。上内面tah雾、giâ云ang hia。”阿妹问：“为啥物太武山？上内面tah雾giâ云ang hia。”

Tī上代先创始ê时， 山内面有百步蛇， 生活真艰苦。规日土脚sô，chhōe无食ê物。蛇kā创造者请求，hō͘伊作人，通好用二脚行，用双手拍猎。创造者同情伊，hō͘伊作人。用双脚行，m̄免用pak肚土脚chhê，用弓箭拍猎，M̄免pak肚iau。Koh kā伊吩咐：“你ài永远会记得，你原本是蛇。”蛇问：“Beh按怎永远会记得？”创造者讲：“我hō͘你人ê名，叫你排湾，你永远tio̍h会记得。”蛇讲：“我ê名叫排湾。我永远会记得。”创造者讲：“我hō͘你无肚脐，因为蛇本来无肚脐。你永远才会记得。”蛇应：“我永远会记得。我无肚脐，因为蛇原本无肚脐。”创造者讲：“我hō͘你太武山tòa，因为山是永远ê。你tō是太武山ê灵。”蛇欢喜，感谢讲：“Che tō是我今á日ê chiù-chōa。我永远会记得。我ê名排湾，我无肚脐，我tō是太武山ê灵。”Tō是排湾ê开始。Hit个以后，排湾人tòa太武山岭，用双脚行，用双手拍猎，看活过日。Soah渐渐bē记得in ê chiù-chōa，也离开太武山，也有生肚脐，kan-na chhun一个名排湾。

长老讲：“单单你无bē记得。”阿妹问：“为啥物？” “因为你来a，你无生肚脐。”Koh kā伊拜，请求伊：“你ùi太武山来。请你chhōa我转去。”阿妹想，taⁿ害a。我来求你hō͘我生肚脐，你soah kā我拜，叫我chhōa你去peh山。Lú想lú无妥当，着惊走，转去kā老母讲长老ê话。老母才想起，生阿妹进前，有梦去tī山内hō͘百步蛇kā着，无外久tō有身。心内郁闷bē清景。想讲大概长老siuⁿ老a。

入山听着chhan-chhan ê水声，头前一chōa浅浅ê溪流，ùi koân-kiā ê山岭出去，chông对下面ê坑(kheⁿ )谷。Tòe溪行，oat一个湾，顶头溪岸一个查甫人，tîⁿ头巾、hâ桶裙， poak一枝薰吹嘴， khiā tī hia teh等伊，叫：“我chhōa你去。”阿妹tòe伊行，lú peh lú koân，问查甫人：“Che是啥物溪？”查甫人应：“太武溪。山内出来ê。”koh行一chām，阿妹嘴ta。查甫人挽树顶ê果子，红口tìm 紫，芳贡贡，若火龙果hiah大粒。食落去，nâ喉甘，thàng心凉，嘴tō bē ta。阿妹问：“Che 啥物果子？m̄ bat看过。”“太武梨。Kan-na chia有。”Koh行半晡，中昼到，日当kiā。阿妹pak肚iau，查甫人liâu落去溪里，伸手hô͘一尾鱼，白siak-siak虱目鱼hiah大尾。Liah鱼肉hō͘阿妹食，幼koh tiⁿ-but，食了精神iû-ia̍h，人也bē thiám。阿妹问：“Che啥物鱼？以前mā bat食过。”“太武鱼。Kan-na这chōa溪有。”阿妹问：“Koh外久会到？”查甫人用薰吹比he清标ê溪流：“Tòe溪起--lih，koh半晡tō到。”阿妹tòe伊认真行，lú行lú敏掠。Bē记得行外hn̄g a，来到一tah koân-kia ê坑崁，双旁石壁直直chhêng-koân tú到天。中间一chōa细phāng，e̍h-e̍h tú好一个人kheh会过。风sù-sù透，soah teh tah茫，四kho͘围giâ云ang，白茫茫无看路。临时ùi山壁ê空phāng日生脚nǹg过来，照着雾，tō清去。头前一tah平坦ê空地，已经是山顶尖òaⁿ-òaⁿ ê黄昏a，满天云霞艳彩牵金丝，若新娘房ê网罩kún-kún iaⁿ-iāⁿ。He日ùi天尾斜过来，对对照着石像，一身红赤赤khiā-khiā chhāi tī空地中央，二个人koân，头顶tîⁿ二只百步蛇，hīⁿ á一旁挂一只羊，亲像teh等伊。阿妹问：“伊是啥人？”查甫人讲：“伊是排湾。”Kā伊拜一下，查甫人tō无去a。这时两旁有日落ê歌声，四个勇壮ê查甫人，tîⁿ头巾，顶面插一排山鸡ê毛，胸前phāiⁿ阔阔ê肩带，挂银挂珠。Koh四个查某人红彩乌裙，tì大帽，胸前一大排phoa̍h链，mā是挂银挂珠，óa来牵伊ê手，围tī伊中央，se̍h kho͘ á ná唱ná跳。In一个人唱一款，八款歌tîⁿ作一伙若虹，liâm-mi飞koân hō͘鸟听，liâm-mi落kē hō͘鱼听。阿妹m̄ bat听过这款歌，m-kú感觉真熟似，soah也会晓唱，kap八个人跳舞。查某人捧酒出来，拢lim酒koh唱koh跳，唱到日无去，月出来。山顶尖ê月lú近lú白，bē输水底ê玉，伸手摸会着。Iā tī土脚ê soān 石tō是大细粒ê星无人khioh。Soah酒醉困去。

目睭thí金，已经天光，日头iāⁿ-iāⁿ。石像khiā tī空地中央，无半滴声。才注意着hit头一间kē厝，石板thia̍p ê。正面一tè大石壁，顶面画八身ang-á，kap伊平koân。四个查甫、四个查某，拢tì súi帽穿súi衫，挂银挂珠，kap昨暗唱歌跳舞ê仝款。厝边一个棚，kē-kē mā是石板tah ê。顶面齐齐一chōa人头壳骨，日pha̍k kah白siak-siak，雨洗kah清气气。雄雄人头开嘴讲话：“你来a！”着一惊soah精神起来。

倒tī病院四工，大困bē醒，m̄知病因。第五工才雄雄退烧，精神过来。伊kā老母讲，山顶尖八身ang-á跳舞唱歌。老母想，可怜我这个阿妹，bē堪得大病五工，头壳烧pháiⁿ去a。

M̄知啥物原因，这个以后，阿妹soah真gâu唱歌。He歌真无仝款，玛家、泰武、春日ê人m̄ bat听过，m̄-kú拢真熟似，概成早tō会晓唱。Mā有时一条歌八个人唱、一人唱一款，和声tîⁿ作一伙nā配色ê彩虹，别位m̄ bat有这款唱法。Lú来lú时行、连市内屏东、高雄也唱阿妹ê歌。无外久，电视台请伊去唱，一下手大成功，少年ê上盖爱。阿妹tī电视台唱，大舞台大乐队，koh穿断一koe̍h ê té衫，làu一节ê牛裤，e̍h-e̍h cha̍t-cha̍t，美国歌星ê场面，超现代ê打扮。Hit chām台湾tòe美国á kha-chhng流行，新型牛á裤làu肚脐，裤头làu到kha-chhng头齐齐。肚脐现现，肉感、皮感兼骨感，人讲是三感，bē输目睭食三层(sam-châm)。阿妹台á顶唱歌，热情放火烧，青春无teh惜，胸前乌白hàiⁿ，kha-chhng chhin-chhái摇。M̄-kú肚脐hia拢tah一尾ia̍h-á，金金sih-sih，有时tah红ê，有时tah绿ê，有时tah花ê。少年ê m̄知hit个原因，误会是Bretney Spears ê新打扮，Hollywood ê好出头，结果人tī台á顶tah肚脐，咱tī台á脚tòe流行。Hia ê穿làu肚脐牛á ê少年辈，大家街á行，无彩一个肚脐好好拢tah起来，也有tah尾ia̍h，也有tah田婴，也有khàm花，也有khàm草…。

不过经理讲，若是beh唱也beh跳，犹是肚脐现现才会大成功，像美国大歌星Madonna按呢。阿妹ê老母有时想起，梦着蛇有身ê代志，心内闷闷不安，mā劝伊，你chit-má有名有钱，tō是欠一个肚脐。Hit年寒人，暗静kap老母二人去美国，tī Hollywood hia chhōe一个phu-la-su-ti-khuh塑胶整容医生，手术作肚脐。Pak肚中央ó͘一空，thīⁿ一个新肚脐。欢欢喜喜愿望完成得着宝，转来台湾，上台演唱。Mā是穿牛á làu肚脐，第一回pak肚无tah彩，规粒肚脐现现，圆圆膨膨，金龟á hiah大个。双旁挂一对钻石hīⁿ钩，台á顶灯光照着，金金闪闪，五彩kún-iāⁿ。少年ê看kah tah心sahN khùi，青狂火烧chông，kho͘ si-á ná peh起来跳，khiā起来chàm，也hoah也hiu，koh háu koh笑，厝kòa beh giâ去，歌也无顾听，会使讲比美国 Jennifer Lopez khah“khu” khah siáu。 Tō是这chām见若台á顶演唱，tō会看着一身石像，头顶二尾蛇，hîⁿ á一只羊，khiā tī伊面前nā像beh kā伊讲话，阿妹心内知影。专工转来玛家，家己一人入山，chhōe着hit chōa chhan-chhan ê溪流，无看着咬薰吹ê查甫人。溪岸树头顶koân-koân hioh一只飘撇ê lāi-hio̍h，看伊来，phia̍t 一si̍t ，叫一声tō飞走--去。Tòe溪行，lú peh lú koân，来到hit位坑崁，双旁石壁直直tú到天。Mā是teh tah雾giâ云-ang。报头风透，人行风顶，bē输lāi-hio̍h 掠起来飞。雄雄雾清--去，头前一tè平坦ê空地，已经是山顶尖òaⁿ-òaⁿ ê黄昏，四界ê云涌若多情ê台湾海洋kún-iāⁿ。天尾日斜西过--来，照着石像，面红赤赤，雄雄讲大声话，若雷tân:“你bē使来chia！”阿妹惊一tiô，问伊：“为啥物bē使来？”石像应：“有肚脐eb5ë使来。”“为啥物？”“因为bē记得a。”“Bē记得啥？”阿妹koh问。石像无koh应，也无听着人唱歌。行去石厝hia，八身ang-á穿súi衫、tì súi帽khiā tī壁顶，也无跳舞。斟酌看，上边á hit身查某ang-á，pak肚中央mā有一粒肚脐，金龟hiah大。Kan-na伊有，chhun-ê ang-á拢无。阿妹问伊：“为啥物kan-na你有？”Ang-á无应，二粒kian冻ê水珠ùi ang-á面滴落来。又koh听着有人大声嚷，若雷tân:“你bē使来chia！”Nih一个目，八身ang-á拢无去 ，厝也无去。Iā tī土脚几lōa粒圆圆ê人头壳骨，liàn来liàn去。紧oa̍t头看， 石像犹tī hia，走去kā拜，已经bē赴a。即时雷公tân，he古老ê石像雄雄phia̍k一下，ùi面到pak肚pit作二旁。才听着查甫人、查某人又koh和声唱歌， he歌lām着太武山顶ê彩霞， se̍h山尖一liàn，变作一chhok乌云飞无去。

阿妹转来见长老，长老会认得伊，讲：“请你唱歌hō͘我听。”阿妹唱电视顶上时行ê“摇头á歌”，ná唱ná siak头，hàiⁿ kha-chhng。长老讲：“M̄是che。”阿妹挺胸khiā直，改唱太武山顶ê歌，歌声chhèng-koân起lih， 若lāi-hio̍h teh飞，lú飞lú koân，强beh tú 着天。唱了，长老摇头讲：“Che歌死去a。”阿妹惊一tiô，问：“为啥物歌死去？”长老双目kheh，身躯坐直，念：“…上盖代先天地创始ê时，山内有百步蛇，生活艰苦，用pak肚chhê土脚，…”阿妹会记得这节排湾ê传说，也祈祷敬拜， tòe伊续落去念：“…我hō͘你作人，…我hō͘你人ê名，叫作排湾，你tio̍h永远会记得。 …我hō͘你无肚脐，因为蛇原本无肚脐，你着永远会记得。…我hō͘你太武山tòa，因为山是永远ê。你tō是太武山ê灵。…”念了，阿妹问：“为啥物bē使转去太武山？”长老流目屎，若冻露ê水珠滴落来。阿妹àⁿ 头，看家己ê pak肚，滑溜溜中央一粒塑胶整容ê肚脐，圆圆膨膨，双旁挂一对钻石金hīⁿ钩。到这时，真正chhun一个名排湾，因为in ê歌死去a，唱bē出来，太武山魂无tī hia。