《陈雷文选》

 | | | 转寄

飞车女

作者 陈雷 2007.04.15

一

阿英出世hit日，风台凯蒂扫过台湾南部，时速160公里。Hit暗in老母pak肚痛，teh beh生。In老pē出去chhōe产婆，可怜规个佳里作水，风台雨息电，beh去tó chhōe人？

In老母家己一个，tī厝里等到半暝，等无人。Pak肚大痛bē等得，点一枝蜡条家己生。Ná知影che查某gín-á出世就行m̄ tio̍h头，倒头生，kha-chhng先出来。In老母艰苦生，真久才生出来。Gia̍h ka刀家己转脐，流血流伤chē soah昏昏去。

后来hit位开汉药店ê大姑婆，小khoah bat时也运也命也hit款ê代志，kā阿英in老母讲，查某gín-á出世倒头生，将来m̄好，会k„u代志。所以阿英国中毕业了，in老母惊伊出代志，留伊tòa厝里，m̄ hō͘ 伊出门去外地。M̄-koh佳里虽然是真好ê所在，小小草地ná有啥物大前途？阿英乖乖tiàm厝里两年，chhōe无头路，ta̍k日食饱êng-êng，chia坐hia坐做小姐。In老母想想leh m̄是办法，姑不而将，kā阿英讲：「Ah无你去台南chhōe恁阿姊看māi!」

三年前，人绍介阿菊去台南三裕纺织厂做女工，一月日几lãa千kho͘。阿菊食头路了，ta̍k遍转来厝里chhit-thô，拢是一遍一领新衫。阿英常常听阿母讲kā汉药店ê姑婆讲：「阿菊趁钱真chē，无输in老pē。」后来过年hit日，阿菊穿一领e̍h-e̍h、siuⁿ细领ê牛á裤转来，khiâ一台o͘-to-bái爆爆叫，全新名流牌150c.c.，tī大姑婆面前pok薰hō͘伊看。自hit时起，in老母嘴就tiām-tiām合起来，无讲起阿菊gâu趁钱ê代志。

所以，in hō͘阿英去台南chhōe头路，实在是姑不而将ê bē放心。M̄-koh阿英像鸟á放出笼ê欢喜，kā老母讲：「阿母你m̄免烦恼，我会听阿姊ê话。我食头路趁钱买新衫转来hō͘你穿。」

He阿姊看草地来ê小妹，头鬃一簇直直ka到hīⁿ á头，乌裙一领阔阔拖土脚像b¡ng罩，也好气也好笑，骂伊讲：「你穿按呢m̄惊人笑？」Chhōa伊去远东百货公司五楼买一领新裙，青色ê koh有真chē蕾红花，短短穿起来，脚头u看现现。

阿英穿脚头u看现现ê新裙出去chhōe头路，市内市外ta̍k位去。一目nih久三礼拜，chhōe无半项，心内tio̍h急。阿姊ka伊讲：「免烦恼，beh趁钱免惊无，头路不时来chhōe mā有。」每暗khiâ o͘-to͘-bái载伊四界去，chhōe朋友chhit-thô。

阿菊ê朋友lok-kò-sok-kò真chē。阿英上熟sāi ê就是khiâ两只o͘-to͘-bái ê明山。这个明山今年十八岁，体格好，m̄爱读册。高中已经转学四遍，犹teh读高一。伊常常kā人讲，读册是为in老母读ê。另外一位朋友阿良，sán-sán猴猴，ta̍k日来chhōe。这位阿良以前tī铁工厂做工，兵做了转来无头路。M̄-koh阿菊对阿良上好，伊kā小妹讲，这位嘴pok一枝薰ê阿良m̄是普通人。伊o͘-to͘-bái是光阳135c.c.改装，时速200公里，人叫做白狐狸。Kap人拚车，有赢无输，趁钱若趁水，比食啥头路拢khah好。阿英看hit只白狐狸，tiāⁿ-tiāⁿ停tī门脚口，规身躯白白，头尖尖，尾翘翘，真实是完全现代化ê流线型。斟酌看，车头前有一只thí翅ê乌bit-pô，实在有影，che m̄是普通ê。

Hit阵tī台南市，若是khiâ车小khóa有成就ê人，自称骑士，招招来结作一党。这种骑士党有大有小，有好有bái，若是市内自来上chhèng就是乌bit-pô。Bit-pô头阿林，你m̄通看伊é-é猴猴，讲一句话吞一嘴nōa，慢钝钝。两年前，有一队台北来ê玫瑰骑士，专工来chhōe伊拚车。Tī凤山战备公路顶面，阿林一个拚五个，无人拚伊会过。连一只BMW也挡伊bē tiâu。He台北来ê玫瑰骑士，hō͘伊削kah片甲不留，转去以后，无面子，名改掉。自hit遍以后，风声传出去，北部南部无人敢koh来招伊拚车。有人hoah讲伊hit只红火狐狸，用一万kho͘改装过，若是驶上车，像teh透风台，时速240公里，纵贯公路台湾头到台湾尾，三点半钟走了了。

十三岁ê时，in老pē买一只o͘-to͘-bái，伊半暝偷牵出去驶。Hit时民族路无像chit-má hiah闹热。Tī公园路口，就是chit-má远东百岁公司对面，有一条大水沟，桥脚有一个真大空乌乌ê夜婆洞。黄昏暗ê时，就有几lō百只夜婆飞出飞入，出来食báng。Gín-á时常tī hia用索á吊石头掠夜婆chhit-thô。阿林ta̍k暝招朋友阿良偷驶车，tùi夜婆洞peh kiā去到台南病院，才koh落kiā冲落来。后来阿林做头出身了后，想着che以前艰苦奋斗ê日子，受夜婆神ê保庇，号名作乌bit-pô，一律禁止gín-á掠夜婆。所以in两人khiâ车ê技术kap工夫，拢是自细汉家己苦练出来-ê，kap别人无像，正港第一流，人人看in上有够重。

二

风台戴安扫过台湾南部，风台尾犹m̄走。Tī高速公路顶面，风sù-sù叫，雨落bē停。In四人坐两只o͘-to͘-bái，公路两旁ê田里，一簇一簇ê电火tòe车走。He车亲像两只拍青惊ê野马teh相jiok，掠bē tiâu，向南一直去。

一路无车，来到半屏山ê所在，hn̄g-hn̄g有看头前四只o͘-to͘-bái走真紧，tī路中央liâm-piⁿ结结作一伙，liâm-piⁿ散散排一排，冲来冲去teh相jiok。阿菊对阿良ê后壁khiā起来，大声嚷：「Kā jiok过！」

阿良ia̍t一下手，hit两只车顺风做一伙走。阿英目睭放kheh-kheh，kā明山ê身躯lám leh，m̄敢t›n动。He车lú走lú紧，伊lú lám lú ân，身躯像火teh烧。代先有听着碰碰叫ê车声，雄雄无听见，hīⁿ á内hú-hú叫，亲像无着土，已经轻轻飞起来按呢。

不知lōa久才koh慢落来，阿英目睭thí金，看着正旁两只o͘-to͘-bái，tò旁也两只，排齐齐kheh tī中央，做伙teh走。In走紧，in也走紧，in走慢，in也走慢。Hit四位骑士拢真勇m̄惊风台雨，thǹg-theh无穿衫。上正旁hit个头壳有一顶扁扁ê拍鸟帽，oa̍t过来一一直看。阿菊hō͘伊看到烽火to̍h，大声嚷阿良：「Kā jiok过！」

Hit个戴拍鸟帽ê ia̍t一下手，四只车kheh óa来，tī路中央横横排一排，kā in遮leh m̄ hō͘ in过。M̄-koh in是乌bit-pô骑士，ná有hiah简单。看真真，顺hit阵风，忽一下冲过去。油放尽磅，放一pû青烟，走kah无看--去。Hit四位骑士bô想着会hō͘ in冲过去，放一pû臭烟，喷kah kui面kui身躯拢是土，真衰siâu，无法度，车停落来，目睭金金看hit两只车一直走无去。

半暝过了，阿菊in四个倒转来到半屏山ê时，风有khah tiām，雨愈落愈大，kui路暗眠摸，雄雄头前四pha真光ê电火直直照来，四只o͘-to͘-bái póng-póng叫，遮tī路中央m̄ hō͘ in过。He足光ê电火照着bô停ê雨水，反射入去in目睭内，一时soah青暝无看去。有听人hoah一声：「干！」，闪bē赴，人挂车冲出去公路外，péng两liàn，poa̍h落田里去。

阿良一枝脚hō͘ o͘-to͘-bái teh leh，倒tī淹水ê田里，kui身躯痛kah bē tín动。目睭金金看着四个thǹg-theh ê人影，横横排一排，一步一步行óa来。暗暗中间，伊偷偷伸手去摸正脚ê脚肚，摸着pa̍k tī脚肚ê尖刀，刀柄挂土ân ân gīm leh，tiām-tiām等in行óa来。

做头hit个戴一顶歪歪ê拍鸟帽，koân-koân khiā tī伊面前。阿良看伊正手gīm一枝长长翘翘ê铁槌，一个拳头母四枝指头á，尾指切无去。伊tō是虎头蜂ê阿鸡，注死m̄死，tō是in ê死对头。He电光hō͘人影遮去，阿良无看着伊ê面，有听着伊ê声，sih-sih-soaihN-soaihN，亲像无食油ê破牛车lián。

「干…恁…娘！m̄成gín-á，kap恁pē拚车！…」话讲一半，铁槌á gia̍h koân起来，相真真kòng落去，连续七八下，一台光阳135c.c改装，kòng kah mi-mi-mauh-mauh。阿良嘴齿筋kā leh，刀柄gīm hō͘ ân，beh póe刀á出来kap伊拚。Hit时阿鸡oa̍t一个头，停手无koh kòng。两脚大步行去明山hia，仝款铁槌á五六下，hit只车kòng hō͘ pháiⁿ。

按呢才放in soah，四个骑士khiā tī公路边排一排，lān鸟á掠出来，一人顺风soān一pû尿，车khiâ leh做in去。

隔转日，m̄成gín-á阿呆来公园机车行chhōe阿林，the̍h一个塑胶袋á hō͘伊，讲是in头家beh送伊。阿林讲真多谢，恁头家m̄通chiah好礼。手拭拭leh，伸入去袋á内jîm，摸着一项tēng-tēng nńg-nńg ê物件，倒出来看，夭寿一只乌乌kòng死ê夜婆，一条索á倒头吊。

「你想beh死！」阿林骂阿呆，heh掠伊来拍。阿呆变一个鬼á面，走kah无看去。

阿林kā kòng死ê夜婆吊tòa门口，叫大家来开会。He lok-kò sok-kò十几个骑士，看hit只死夜婆hō͘风吹leh tin-tong hàiⁿ，有人受气，有人爱笑。阿良两粒拳头母chiah大粒，伊讲：「Che虎头蜂愈来愈ah霸！」

Kā昨暝公路顶风台hō͘冒险ê代志讲hō͘大家听。阿鸡thÆg-theh khiâ车遮in ê路，公路hiah大条m̄ hō͘ in过，mā in m̄成gín-á。无代无志kā in两只o͘-to͘-bái kòng pháiⁿ，差一sút a hō͘ in用铁槌拍死--去！

坐tī后壁面尖尖ê廖绅士，穿一su chhio-chhio白色ê西装真愤慨，khiā起来讲大声话，拍胸坎，弄狗相kā。

「干！ah实在真ah霸！…kap in拚！he虎头蜂无实力，…m̄免惊，拚死出代志，棺材本五万kho͘我包！」

绅士廖家己无khiâ o͘-to͘-bái，伊是穿se-bi-lo，坐「脚里落裤」(Cadillac)ê人…。m̄-koh你ài知，伊地下kiáu场做真大，听讲nā是有人拚车拚khah大ê时，伊一遍生理作几lō百万。

各位坐土脚ê骑士看绅士廖按呢愤慨，也自然tòe伊愤慨起来。明明有听伊按呢讲，若是拚死也有钱好趁，ná有chia好空？！che生理khah算mā算会和。大家khiā直比胸坎，gîm拳头母围óa来。一只m̄知死ê chhio鸡角kok-kok-叫，围tī中央。阿林一手sa来，piak一ē ām-kún at hō͘断，马上请廖先生kōaⁿ去chhoe阿鸡，hit暗通知伊。

「某时某日，不管透风落雨，有卵核ê来健康路解决。」

健康路就是一条直直ê大路，路面阔阔拢无破空，hit当时拚车上高级有面子ê所在。而且nā是正经有修养ê骑士，普通无人爱讲「拚车」，拢讲是「解决」，khah有气魄。

绅士廖去拜访四枝指头á阿鸡，请伊pok一枝三五ê薰，hīⁿ孔边讲一句话hō͘伊做参考。

「乌bit-pô无实力，kap in拚，m̄免惊！…拚赢一摆三千kho͘我包！」

阿鸡听了有理，目睭金金看hit只chhio鸡角，„m-kún tin-tōng hàiⁿ，he「三千kho͘」tòa头壳内紧紧转二、三lìn。纸the̍h来、大大字写一字「战」。某时某日、不管透风落雨、男子汉大丈夫、一切tòa健康路来解决。

三

永福路巷á尾电火暗暗真有浪漫气氛ê南园，大家来唱卡拉OK，歌声kē-kē，lim bi-luh ê心内像嘴里唱出来ê歌句，有真实感动ê朋友情：

「有缘千里来相会，见面欢喜lim一杯，…。兄弟做伙le̍k胸坎，好酒通醉讲大话，英雄好汉无论辈，…」

爱唱歌ê阿菊唱一条「雾夜华尔兹」，koh手牵手，kap阿良唱文艺爱情「明月港都来相会」…明山上爱文夏ê「阿母请你ai保重」，唱bē好势，唱kah走调。最后大家干杯，唱「勇敢ê男儿」就是in拚车ê歌。

「咱拢是勇敢ê男儿，今日拍拚来牺牲，阿母请你ài原谅，为着生活，为着名誉，…咱拢是勇敢ê男儿，今日慷慨来牺牲，妹妹请你ài了解，为着面子，为着金钱。…」

Hit暗无月，in转来到公园口ê时，满天顶ê星chia一粒hia一粒，亲像大大细细ê真珠，iā kah一四界无人khioh。He银河像一条挂tī天顶chiah大条ê钻石phōa链，súi tang-tang，金sih-sih。In两个姊妹á相the khiā做伙，giâ头看天顶，醉醉ê头壳内有一个古怪koh真实ê预感。今暝拚车会大赢，in会赢真chē钱，he天顶ê珍珠、钻石phōa链拢是in ê，…。

一人点一枝香，khiā tī桥头向乌乌一大空ê夜婆洞拜拜，今暗阿菊kap阿美虔诚请夜婆神保庇，hō͘拚车大赢。

四

Hit两位食菜o͘-bá-sáng食菜马虎，poa̍h大家乐真认真。In kap尼姑庵ê妙心大师平时有交陪，所以大师有特别kā in指点，私下hō͘一个poa̍h大家乐ê秘诀。就是为着这个大家乐ê问题，专工hit日叫孙á载in来健康路看人拚车。

若是乌bit-pô拚车，去到toh拢是人插插。In kap人kheh 规晡，才kheh着一位好位，tī一担卖绿豆沙ê边á。肥ê o͘-bá-sáng kā sán ê讲：「按呢kheh tiō会死！…夭寿hō͘咱等chiah chē遍等拢无！」

Sán ê o͘-bá-sáng应伊：「人讲这队乌bit-pô m̄惊死上勇，驶车若像teh赴死，ta̍k遍拢有人出事。…今á日一定有，你看hit只车。」

Sán ê oa̍t头去看，后面一只乌乌koân-koân棺材形ê车，车内坐一个运转手，边á坐一个pok薰ê中年人，鲈鳗hit型，就是平安葬仪行ê伙记。明明是载死人ê车，来tī hia等生理。肥ê o͘-bá-sáng看着死人车，就khah放心，亲像嘴ta食冰枝，心肝火消一半。伊té-té ê ām-kún伸出去路里看，hn̄g hn̄g hit头，五、六枝旗á、几lō十只o͘-to͘-bái作一堆、头前四只kap红旗á齐齐排一排、电火光光、碰碰叫。

「Ah ná犹bē beh开始？」

Hit四只o͘-to͘-bái拢是头尖尖、尾翘翘、现代化ê流线型。正旁hit只kui身躯白ê，就是阿良ê白狐狸、拚车专用、m̄ bat输过。坐tī白狐狸顶面、双手l¡m 阿良ê查某，pa̍k头鬃、汤thǹg赤脚，就是阿菊。阿菊拚车上盖迷信、伊早早有kā阿英交代，thǹg赤脚才会赢。

Hit位先生人叫伊苏裁判、穿一领白色té裤、薄薄通光像查某人ê内底裤，头壳是抹油chhio chhio ê hai-kat-la头、一手gia̍h三角旗á、一手讲无线电话、chông来chông去真无êng。续落路尾hit头一pha一pha烟火点to̍h起来，代先是雾雾ê白色，liâm-piⁿ变作艳美ê柑色、he火直直喷koân起lih，一枝一枝像无停ê喷水泉，长长排做四排，通去到路尽磅ê所在。Kui路kā-kā滚ê人雄雄拢tiām去、kan-taⁿ有听着爆爆叫ê车声。穿通光内裤ê苏先生tàm一下头、三角旗ia̍t一下，四只车像teh放大炮、作一khùn冲出去。 He车一只jiok一只驶过肥o͘-bá-sáng面前，伊看bē赴，手里摸一kōaⁿ佛珠，嘴里像食菜时按呢念：「阿弥陀佛…阿弥陀佛…」。卖绿豆沙ê阿婆生理m̄做，一直hàiⁿ头。

「夭寿oh！m̄惊死，驶chiah紧！」

Hit只白狐狸驶去到点烟火ê所在，oa̍t一个头，koh倒转来。一路做头，sut一下冲过红旗á线，差一sut à lòng着苏先生，赢人一大节。大家作一khùn kā伊包围起来，有人giú车，有人giú人。绅士廖走第一：「赢kah有chhun！赢kah有chhun」，the̍h三五ê出来请。

阿英看阿姊坐tī阿良ê后面，thǹg赤脚，笑bi-bi，翘脚teh pok薰。心内想：「实在有影，che钱真好趁！按呢一chōa来一chōa去，就是三千kho͘！」伊学阿姊kā鞋á thǹg起来，chhun双手去lám明山，kā伊ê身躯ân-ân lám来óa家己胸坎，tī híⁿ-á 后细声讲：「拚khah紧leh！」

Lim bi-luh了后ê明山，事实有十八岁少年人tùi阿英初初ê好感kap爱情，伊一句话khǹg tī心内无讲出来。

「我拚hō͘你看！」

排tī倒旁，目睭gîn-gîn kā in看tō是虎头蜂ê阿国，khiâ一台乌色BMW，像牛hiah大只。苏先生一面讲无线电话，一面叫大家闪khah开。绅士廖临时走--来，kā明山加油，拍伊ê肩胛头。

「做你拚！有代志五万kho͘我包！」

He车真吵，明山无听着伊teh讲啥，kan-taⁿ有看伊chhun一枝长长ê手，五枝指头á thí开一直ia̍t。

伊目睭尾看hit枝三角旗摇一下，像teh放火箭，做先就chông出去。Hīⁿ á内亲像有听一个人一直teh hoah：「拚khah紧leh！…拚khah紧leh！…」。双手gîm ân ân，目睭看头前，油一直催，心肝内无停一直讲：「我拚hō͘你看！」。油放尽磅，车愈走lú紧，冲过肥ê o͘-bá-sáng头前，伊又koh像食菜时按呢念：「阿弥陀佛！」卖绿豆沙ê阿婆一直hàiⁿ头。

「夭寿oh！驶chiah紧beh去赴死！」

一句话讲bē了，雄雄hit只BMW chiⁿ过来伊头前，阿良想beh闪，soah hō͘滑去，chhū一下冲tùi路边出去，人挂车连续pèng两、三liàn，tùi tùi chông着电火thiāu，chiⁿ作两节。续leh有听人hoah：「走！」一声炸弹大爆炸，一簇大火挂乌烟chhèng到电火thiāu hiah koân，o͘-to͘-bái to̍h火烧起来。

两位o͘-bá-sáng看人出事，赶紧向火烧ê所在走去。Sán o͘-bá-sangkhah2 gâu走代先到，m̄惊火烧危险，kheh óa近去看。He查甫gín-á倒仆仆，头歪一旁，一领牛á裤thiah做两tè，土脚一堆血。另外hit ê查某gín-á，离伊差不多二十外尺，倒chhiò chhiò，thǹg赤脚，一领有大蕾红花ê绿裙掀koân-koân，两枝白白ê大腿thì开开，看现现，kui面拢是血。有一个挂目镜学生款ê少年人跪tī伊身边，双手jih伊ê胸坎，teh kā急救。

肥ê o͘-bá-sáng做尾到，走kah喘phēⁿ phēⁿ，青青猴猴问sán ê:「Ah是几号！」

倒tī土脚tio̍h伤ê阿英，迷迷中间有感觉有人teh jih胸坎，却是伊受伤真重，目睭皮thí bē开，hiⁿ á内渺渺茫茫，有听人hn̄g hn̄g teh嚷。

「干！Ah che明明拢已经死a！Ah你犹teh jih啥！」 M̄-koh伊知影家己犹bē死，赶紧beh 叫hō͘人知，伊犹bē死！心肝内出大声hoah。

「我犹bē死！…kā我救！…」

事实伊tio̍h伤真重，ná hoāh 会有声出来，倒tī土脚连嘴唇拢bē tín动…三分钟了后，身躯内ê血流了a，一粒好好活活少年ê心，勇勇跳十七年，就按呢停去a。

Hit阵四围围一大堆人来看，有人讲死a，有人讲犹bē，一人一句，闹热chhih吵，bē决定。一个白头毛穿súi衫ê老阿公行óa去，tī阿英ê身躯边行两、三步，看看leh，用伊hit枝两尺长ê薰吹指倒tī土脚ê查某。

「无效a lah！…看he血流hiah chē mā知。」

Ná讲ná摇头，大家才做一khùn tiām去。

挂目镜ê学生jih一晡无反应，gia̍h头来看四周围ê人，大家听老人按呢讲，目睭金金有看若无看，soah无人beh tàu脚手。后面两个鲈鳗款ê大人行óa来，kā伊chhò干kiāu。

「Che明明tō已经死a，ah你是犹teh jih啥？」

姑不而将，伊停手无koh jih，tùi土脚peh起来，双手bak kah拢是血。Hit两个大人，一个是平安葬仪行ê伙计，一个是驶死人车ê运转手，k„两个尸体扛去车顶。He伙计ná扛ná chhò。

「干！两个拢是m̄成gín-á!」

Hn̄g-hn̄g有听着警察车tân风螺á声。看闹热ê人无人爱插事，听着风螺tân，像hô͘蝇食屎hō͘人拍，做一kùn走了了。肥o͘-bá-sáng tòe tī sán ê后面，犹m̄甘愿走。看火烧teh beh了，kohoa2去看，lak袋á内the̍h纸出来，kap车牌顶面ê号码一字一字匀匀á对，目睭chhuh chhuh，伊圆圆扁扁ê肉饼面hō͘火照着，烘kah烧烧红红会发光，tō是tī hit时出现了一个真美满温暖拢是春风ê笑容。

「今á日这个包有ê…」

Hit张纸袋倒转去，问sán ê o͘-bá-sáng。

「你看有真无？正正tō是师父讲ê，一个倒chhiò chhiò，一个倒仆仆，明明就是上杯。」

Sán ê应伊：「Ná会看无真？真实讲kah准准。…佳哉今á日hō͘咱等--着，若无后日就beh开奖--a，…」雄雄koh亲像想着一项真重要ê代志，嘴掩leh，beh笑m̄敢笑，óa去kā肥ê-bá-sáng讲：「夭寿oh！你看he十七、八岁ê查某gín-á，倒按呢，两脚开开看现现，一领裙le̍k hiah koân，敢会看得？」

伊ê朋友亲像无听着伊teh讲啥，原在家己一面真春风温暖，大ê肉饼面ê笑容，手里the̍h hit kōaⁿ摸到金金发光ê佛珠，嘴里cha̍uh cha̍uh念：「443838…443838」。过路人听无清楚，掠准是这个阿婆pháiⁿ嘴teh骂人死去三八三八。