《陈雷文选》

 | | | 转寄

救鞭

作者 陈雷 2007.04.01

邱董ê kap伊ê太太婚姻bē和，是几年来公司内外拢知影ê代志，大家做伙ê时开讲ê材料。主要是讨论in bē和ê原因，无人真知。所以讲来讲去，难免谣言种种，有人讲是钱，有人讲是年岁ê关系……。大部分ê职员比较khah同情邱董ê立场，并m̄是因为职位ê关系。事实邱太太有一个小姐脾气，心情bái tã乱开钱。小bái小开钱，大bái大开钱，真厉害ê是，也bat坐飞机去日本东京，tī银座se̍h百货公司，一礼拜m̄转来。这款开钱ê方法，大家看bē惯势，亲像开in ê钱按呢。单单几位新来ê少年查某员工，khiā tī女性解放ê立场，支持邱太太。M̄-kú che kan-na是心理上、口头上ê支持，对邱太太不满ê婚姻，实质上无啥帮赞。

「查某人ta̍k日穿súi-súi去thit-thô，有钱通好开，爱啥有啥，犹teh嫌！」邱董ê拥护者按呢讲。

「恁查甫人上无意思。查某人tō m̄是机器，ta̍k日开钱买súi衫就会欢喜？」邱太太ê支持者替伊辩护。

结果这个问题辩来辩去无结论。一直到hit年俄罗斯大马戏团来台湾表演了后，才有明白ê解决。

关系这个医术上ê难题，邱董本人有去请教名医。花柳科介绍去肝科，结果讲是XO lim siuⁿ chē，影响着肝kap hoh-lu-bóng，所以查甫人无查甫人ê气概，尤其是邱董ê比邱太太大十八岁，是真大ê不利。伊每日看阿某穿裙抹胭脂，食饱去坐美容院，心头就po̍k-po̍k chhiak，像旧年公司了钱hit时ê心情，chē少会影响公司ê业务。这点伊大细siān公司大股东刘董ê上关心。所以刘董问伊ê太太，伊ê太太问小妹，才知影这个问题ê医学性。

刘董ê khiā tī查甫人ê立场同情邱董，kā伊劝：「这个症头kap癌相像，chhōe中医才有效。」Hit时台湾信中医，也是莫怪。报纸the̍h来看，广告一大堆，中医会治癌，西医bē晓。若是西医治癌ài开刀，见开见死。中医食药免开刀，而且钱nā包khah chē，koh会kā你包医。

刘董介绍邱董去看中医，就是盛德堂ê名医，时常有人登报纸感谢伊。这中医诊断是败肾，大概是相当咱西医ê腰子病。后来去元老堂，讲是脾虚，koh来去汉生堂，讲是胆寒，汉生堂刘汉生kā伊说明，che kap西医ê胆石无仝。药á食来食去，有效ná无效，无啥「起色」。最后一帖，刘汉生才讲：「欠一味」，伊讲：「…绝症用极药！若是虎鞭…包好ê！」He口气，大概差不多是「包医」ê意思…邱董听讲是「绝症」，到chia来，khah chē钱mā tio̍h ài开落去！

Hit年俄罗斯马戏团是按怎来台湾公演，无人知影。第一俄罗斯kap咱无帮邦交，第二无外久前咱有teh反共抗俄。大概是这个原因，生理无好，演无几场就hoah倒。Hia ê虎豹狮象无饭食，beh拍卖。M̄-koh che西伯利亚虎是全世界公订beh绝种ê动物，尤其sī hit只白雪虎，全世界chhun无几只，m̄是随便人会使买。

邱董ê去木栅动物讲beh捐虎，讨一张证明去买虎，结果四只公ê做一khùn总买。掠转来厝里无所在饲，tú好五楼厝顶阔阔，四角四枝铁thiāu，一只p†k一枝，用铁链链ām-kún，链虎脚。He厝顶热，无像西伯利亚ê清凉。虎bē堪得热，m̄食饭，m̄ lim水，kōh m̄ bat hō͘人链惯势，受气铁链beh咬hō͘断，咬到嘴流血，脚流血。厝边ê人听虎暝日哀叫，也惊也同情，拍电话报警察。警察来，tō是公司时常敬礼ê管区，邱董熟sāi｡伊kā管区ê讲，狗teh叫，chit-má贼真chē，饲大只狗beh顾贼。想想leh，m̄是办法，che虎pháiⁿ饲。叫thâi猪ê来thâi虎，特别kā吩咐：「卵核á留起来！」

可怜这只虎死ê比活ê khah 值钱。你若是小khóa bat中药就知，che虎骨、虎肉、虎血khah赢美国仙丹、治百病、补百身，连虎屎mā有人beh，隔壁拍电话hit位陈先生买去、曝ta做汉药。结果邱董thâi虎soah thàn真chē钱，单单四枝虎鞭挂八粒卵核á kù-chāi人ko͘-chiâⁿ也m̄卖，beh留起来家己用。

Koh去请教中医刘汉生：「Che西伯利亚ê虎鞭敢好？」刘汉生听讲是西伯利亚虎，tàm头so嘴须：「若是虎鞭lú寒ê所在lú好。…」卖伊一帖汉生堂ê祖传秘方，讲是伊ê阿公亲身用过，真有效，无随便hō͘人用。结果开真chē钱，差不多mā是「包医」ê意思。

不过thâi虎了后两个月，邱太太又koh坐飞机去日本，tī东京银座一礼拜m̄转来。虽然是按呢，邱董是一个bat人情ê人。Chia ê西伯利亚虎，一路hn̄g-hn̄g来台湾，对伊不满ê婚姻来奉献牺牲，对che救鞭ê勇士，伊心内有十分ê感谢kap敬意。而且以后时常有人客来in tau拜访，大家互相敬XO ê酒，o-ló伊排tī客厅hit四领虎皮，光光金金，尤其是hit领白雪虎皮，人客拢会伸手去摸，hō͘伊感觉chia ê虎thâi了有价值。这世界减四只西伯利亚虎，应当是无啥要紧ê增差才tio̍h。