《陈雷文选》

 | | | 转寄

母ôe Kiáⁿ ôe

作者 陈雷 2007.03.11

讲着生kiáⁿ这项代志，古早人一 生十外个，chhìn-chhái饲chhìn-chhái大，m̄免操心计较。现代人生一个kiáⁿ，头khah大天，按细汉换尿chū-á la̍k屎尿，到大汉读册、chhōa某生kiáⁿ，心神m̄知拢总用几 tho͘-la-khuh。

这个黄太太莉莉生kiáⁿ，头先tō早产koh破pak。莫怪生出来kiáⁿ ôe惜命命，ta̍k项细字ta̍k项惊，tō是咱讲ê生一个金kiáⁿ钻石kiáⁿ，号名博koh强。佳哉无事饲到五岁大，看人gín-á teh读册，tō kā翁讲：「咱博强来去hō͘读育幼班，按呢早人一步。」Tú好离厝无外hn̄g有一间『天才育幼班』，tō是幼稚园ê预修班。黄太太chhōa博强去报名，育幼班ê头家娘徐太太问伊一kóa问题，也tō是入学考试。黄太太应：「阮博强六个月会坐，七个月会爬，----」徐太太欢喜讲：「按呢这个gín-á有天份！人普通是七坐八爬九发牙----」Tō hō͘伊报名天才育幼班，一礼拜三工，教in唱歌、chhit-thô kap念1、2、3、4 -----A、B 、 C、D----。一期soah，徐太太iap-iap-á kā黄太太nauh：「Che我kan-na kā你讲，咱这个育幼班若是有拍分数，恁博强第一名。」黄太太欢喜起毛giang，四界kā人弄扬（lāng-iāng)：「阮博强天才班毕业第一名。」Tō hō͘伊续落去tī hia读天才幼稚班。

过来九年一贯，读国小、国中，成绩平平，平均七十外，kan-na数学khah好，有时也有九十分。徐太太讲：「这个gín-á数学有天份。」hō͘伊补数学先进班。Tō是徐太太这个天才补习班，比咱普通学校khah厉害，in是11年一贯，ùi育幼班到国中三年ta̍k科有。博强tī hia补数学，koh补物理、化学、国文----，soah差不多bē输一个gín-á读二个学校，规工上课补习，读kah m̄知日时暗时，一个身体soah来拍损去。

起先是早时beh去学校头壳tō会hîn，pak肚会痛，过来不管时nā紧张tō pak肚痛，痛了厉害也tio̍h去chông便所，一日几nā摆。一个gín-á soah若像au kiâm菜，黄酸pó͘去。黄太太莉莉烦恼，chhōa伊去看医生，七验八验，ta̍k项拢正常。医生kā老母讲：「Che gín-á身躯无病，kan-na是心理有问题。」「精神病o͘h？」「心理压力siuⁿ大，影响着胃肠。」黄太太bē理解，讲：「A̍h to规日kan-na读册补习，也无teh烦恼啥，beh thài有心理压力siuⁿ大？」无beh信，chhōa去看中医。He中医gâu kah若仙，节一个脉，叫gín-á舌á thóng长长hō͘看，tō讲：「冷身lah ！」Che冷身、热身ê道理黄太太颠倒听有，应：「Tō是按呢lah。热（joa̍h）--人不时teh chhiâng冷水。」中医仙讲：「我chhòng几帖khah热(jia̍t) ê kah你补。」吩咐冷ê物m̄通食。买三帖黄花、田七、川芎、乌首----，包包一大包，the̍h转去choaⁿ hō͘ kiáⁿ lim。凡是芋头、旺梨、莲雾---摸tio̍h冷冷ê物拢禁食，mā bē使chhiâng冷水洗浴。He gín-á lim黄花、田七、川芎、乌首---ê药头á，一大碗公乌乌若洗土脚水，苦te̍h-te̍h koh涩ta̍p-ta̍p，tok强lim落去，未到nâ喉吐吐出来，一摆tō叫m̄敢。过来pak肚痛，m̄敢chhī-chhn̍gh，恬恬á lún leh，等老母无看ê时去chông便所。In老母想，ôa，che药chiah好用，一帖tō断根。

总是咱人这个心理ê压力若m̄是ùi pak肚下面hit空tháu，tō是按顶面这空出。Taⁿ这个gín-á chit-má下面hit空that leh m̄敢tháu，a̍h tō换ùi顶面这个嘴空来。见若紧张chheⁿ-cho̍h，tio̍h chhōe食ê来that嘴空，才会定着。Tō是按呢，不时hit个嘴无êng食东食西，kap in老pē仝款，食kah大大kho͘。老母看gín-á gâu食koh会大，想讲是有勇身，心内欢喜。 九年一贯读soah，兼11年一贯补soah，考tiâu台大经济系。四冬大学毕业，好头路pháiⁿ chhōe，又koh人大kho͘免作兵，老母讲：「去美国留学。」报名加州hit间m̄知啥名ê大学，读企业管理硕士。老母原在对补习有信心，叫伊暑假先去报名硕士预修班，补起来khǹg。讲来徐太太可取，tòe社会进步，chit-má几nā年一贯，世界第一先进，连硕士补习班也有。

Taⁿ博强去美国留学，黄太太m̄甘kiáⁿ，美国、台湾二位走。三个月tòa美国顾kiáⁿ，三个月转来台湾看翁，问题tō是tī chia。伊若三个月tī台湾顾翁，he kiáⁿ家己一个tī美国无老母吵，心情轻可，无koh不时食东食西，人tō sán落去。He老母三个月了来美国看kiáⁿ，害a，若鸡kui-á消风，pò͘去a。骂in kiáⁿ：「大人大种a，连一个食也bē晓！」He kiáⁿ看老母转来，又koh紧张，tō乌白食又koh肥身起来。Taⁿ三个月kiáⁿ顾好，转来台湾，害a，he翁kap kiáⁿ仝款，无某人轻松，食困正常，人也sán落去。In某骂：「大人大种a，连一个食也bē晓，ta̍k项拢tio̍h我一个。---」三个月又koh翁keng肥肥。Tō是按呢，bē输台湾、美国双头pûn鸡kui，这旁pûn好phòng起来，另外hit旁tō消风naih落去。可怜黄太太，这头chông过来，hit头chông过去，双头食肥走sán，一个人也bē得分二身，真是气身恼命。

终其尾to也硕士读soah，转来台湾，老母替伊chhōe一个好头路。黄太太in阿兄黄总台tō是奇迹投资集团ê总经理，专门卖咱台湾人美国相对基金。Tī hia chhiàⁿ博强作投资顾问『Ah-lu-bái-sah』(adviser)，也tō是相对基金推销员。上班第一工，黄太太kā后生装撇撇，穿一su输割肉（Scabal）英国量身西装，hiù一身啥人ê(Channel)法国芳水，结一条阔板ê德国红neh-khu-tái，穿一双尖尖ê义大利乌皮鞋，载伊来到公司，亲身陪伊去见总经理黄总台。雄雄感觉若像20外冬前hit工第一回，chhōa博强去天才育幼班仝款，kā kiáⁿ讲：「M̄免惊，阿母liâm-mih koh来kā你看。」Taⁿ这个美国企管硕士，第一工上班见总经理，mā bē输hit日第一回tī天才班见徐太太，soah紧张过头，雄雄pak肚痛beh食物件。黄太太早tō有准备，袋á内面一tè面包the̍h出来，hō͘伊大嘴咬落去。

Taⁿ这个后生美国硕士读了，头路也有a，tō beh kā伊chhōa一个某。拜托人斗chhōe，开四个条件：大学毕业、160到165公分、45到50公斤、22到25岁，也tō是相猴、鸡、狗、猪ê在内。佳哉无外久chhōe着一个相猪ê，身koân 162，体重48，师大毕业tī国中教数学。黄太太kā kiáⁿ讲：「这个你有合。」

Tō按呢kā kiáⁿ chhōa一个某。Hit间尊贤楼五楼ê公寓，本来早tō买起来beh hō͘ kiáⁿ chhōa某用，tō收转来全新装璜，开200外万。Koh买一只新车Tho͘h-io͘-tah挂保险百外万，hō͘ in kiáⁿ上班用。按呢in kiáⁿ ùi尊贤楼六楼公寓搬去五楼，离开pē母kap某tòa，问题tō是tī chia。

这个后生搬落来五楼了后，虽然kap老母仝一栋楼á，m̄-kú隔一chàn，心内压力消一半，tō无koh不时食东食西，鸡kui á koh消风去。老母看kiáⁿ sán去，烦恼问新妇：「碧玲a，你早顿有chhòng hō͘博a食无？」He少年人你也知，二个拢teh食头路，ná有时间食早顿，应讲：「阮早时bē iau，拢lim 一个ka-pi niā-niā。」黄太太惊一tiô:「Ai-ioh，莫怪一个身体拍pháiⁿ去。」Ùi hit日起，透早外口运动soah，未六点tō来in kiáⁿ chia，灶脚 khi-khi kho̍k-kho̍k，款早顿beh hō͘ kiáⁿ食。He kiáⁿ若无食，tō hō͘伊念kah臭头烂鼻，所以无法度食了才敢出门。He五楼厝内ê压力又koh chhèng到六楼起lih，无外久tō koh肥身起来。

Taⁿ六个月过去---，黄太太莉莉犹未听讲新妇有身beh生，心内着急，想讲是m̄是新妇bē生？问in后生：「碧玲a tiâng时beh生？」In后生tō去问某：「Tiâng时beh生？」这个碧玲作老师人，个性ngēⁿ-chiāⁿ，m̄爱ta家杂chhap îⁿ-tîⁿ，骂伊：「你ta̍k项听恁老母ê嘴！我是嫁你抑是嫁恁老母ê?！」

博强giap tī这二个查某人中央，一个粘thiê，一个ngēⁿ斗ê。Hit个老母粘thi m̄ hō͘伊大汉，这个某ngēⁿ斗m̄让伊lún胆。博强chēng细汉ta̍k项代志老母安排决定，家己bē晓主张，若磨á心ta̍k日磨（bôa）se̍h，真是艰苦。又koh hit站奇迹投资业积无好，压力5000磅。这回m̄是按下面hit空tháu，也m̄是ùi顶面hit空放，无想着ùi中央来。胃破空出血，soah tio̍h入院。

黄太太tī病院顾kiáⁿ，眠床边chauh-chauh念，怨叹hit个新妇bē顾翁，kā kiáⁿ讲：「食食hit个m̄成头路。Iah是规气辞辞leh tiàm厝里。」In kiáⁿ应：「碧玲讲，等khah óa beh生才来辞。」惊一tiô，才知影新妇有身，骂：「A̍h thài无khah早讲：」「犹早leh，年底才beh生。」「年底？年底chhun八个月niâ ！」赶紧chông去上赞（chán）旅行社，取消南非旅游。业务小姐讲：「黄太太，年底犹早leh，你先去chhit-thô一chōa，转来mā也赴赴leh。」黄太太应：「你m̄知，chit-má少年ê ta̍k项bē，若无跟tòa身躯边---」Ùi hit日起，管食管困，hoah烧hoah冷，koh去中医仙hia买养身安胎阴阳百日丸，若虱目鱼丸hiah大粒，乌乌黏黏，臭臭hiam hiam ，gín-á尿味，ta̍k日叫新妇吞。

若是黄太太莉莉hit个症头，明明是ùi hit通电话开始ê。「阿母！你紧来！---医生讲碧玲beh làu胎a---」驶车chông去病院，仁爱路规chōa that车，雄雄火攻心头壳hîⁿ，pak肚痛挡bē tiâu，tio̍h-ài chông便所。侥幸a，黄太太莉莉这个症头tō是半路that车ê时发作ê。