《陈雷文选》

 | | | 转寄

起停盘

作者 陈雷 2006.10.29

1.

「我永远tī你ê身边，你笑我tòe你笑。你háu我kā你拭目屎，…咱仝一条性命，我是刺毛虫，你是刺毛虫变出来ê iâ-á，我永远kap你分bē开…」茵蕙手里the̍h hit张批纸，ná读目屎ná tho̍p-tho̍p-滴，纸滴tâm去，字tō雾去。

Hit暗tī房间内，家己一个háu kah目屎ta。过转日早起，二蕾目睭红koh肿，m̄敢去上班。老母知影犹koh是仝hit项代志，最近不时为着che khàu，看kah心痛，m̄敢siuⁿ问，惊去刺激着伊，kan-na kha-chiah后一直吐大khùi。早tō有kā伊讲过a，咱普通食头路人ê家庭，无钱也无地位。Chit-má ê少年人，beh等到伊毕业犹hiah chē冬，pháiⁿ按算lah。茵蕙hit时大学2年，青春少年，chia ê话ná有teh听，拢应讲：「我kap伊仝一条性命，永远分bē开。」

2.

Tī亚洲证券公司teh出入ê人客，拢叫陈永胜「霸王ê」。一来是因为伊人生作粗phiāng，一个面不时红膏赤chhih，bē输thâi猪ê lim烧酒。Koh一来是意见chē，nâ喉大空，若是伊讲话，规楼拢听会着。但是上要紧是伊有钱，非常真好额，m̄是因为伊作过银行襄理ê关系。主要是伊gâu ī股票，有thàn着大钱。咱台湾以前股票俗，有钱tō买股票起来khǹg，股母生股kiáⁿ，bē输niáu鼠á teh thòaⁿ。尾a台湾经济发展，股票大起价，tō是按呢thàn着大钱。银行襄理辞掉，专心来ī股票。Koh oân-nā gâu，行情看会准，落tō买，起tō卖，lú ká lú chē。照黄太太ê讲法，厝kap股票算算起来，beh kah成亿ê。

「这枝今á日定着破24 ê。」大家拢听着伊按呢讲。成实开盘无2点钟，tō起到24 kho͘。「犹koh会起leh，26才是顶线。」伊又koh按呢讲，所以hia ê妇女股票族ê黄太太玉、金太太珠、王太太宝，hit日到12点受盘犹无人放手。

「霸王ê，明á chài 26冲会到bē ？」金太太珠细声问，胜a讲：「看今á日这个扮势，明á chài 定着起停盘 。」结果王太太宝坐tī头前听着，kā黄太太玉讲：「明á早khah早来leh。咱洗头毛改作下晡lah。」黄太太玉无应，头一直tàm。

胜a转来到厝，hoah：「今á日ê盘实在有到súi ê，ta̍k枝to红phà-phà!」In某来富a无欢喜应伊：「你规日kan-na tháⁿ你hia ê股票，厝里查某kiáⁿ按怎拢无管！」胜a问：「咱胜美ta̍k日出门去学校，转来tiàm厝里读册，敢有啥问题？」来富a讲：「问题tō是tī chia lah！规日chiú tī厝内，也bē晓出去chhit-thô交朋友。」 「交朋友ê代志，咱m̄免替伊烦恼，等大汉，自然tō会lah。」「等大汉？！已经大学4年a neh，liâm-mi毕业，ah若出国去留学，tō koh khah无机会loh。」

「O̍͘h …」胜a按呢应，想想leh，这个来富a讲了也是有理，应讲：「静美a若m̄ ài 出去交朋友，咱叫朋友来厝里hō͘伊交。」来富听了奇怪，问伊：「Beh按怎叫朋友来厝里hō͘伊交？」胜a讲，按呢生…按呢生…。来富a听一下嘴开开，hoah讲：「按呢tō亲像是用买ê，ná会使得？！」胜a骂伊：「你成实m̄-bat代志。Chit-má是啥物时代？股票会使用买ê，大厝、汽车会使用买ê、内衫内裤拢用买ê，ah che咱若看有合意，ná bē使用买ê ？！」所以来富a来chhōe in姨á，hit个in翁tī医师公会作会长，拜托伊介绍一个好ê来hō͘ in静美a交朋友，吩咐讲：「Ài医学院ê。」 Tú好这个姨á bat一个朋友，这个朋友ê后生有一个医学院ê学生teh kā补习，tō kā伊介绍过来。

面试hit日，三人坐tī客厅，the ê是德国牛皮ê phóng椅，照ê是Chheh-khuh(捷克)水晶ê吊灯，lim ê是意大利ê ka-pi expresso。来富a看这个学生，生作四正四正，有礼有体，心内欢喜5分，问伊：「你teh读医学院？」明致a讲：「我台大医学院6年。」来富a心内欢喜6分，问：「毕业了beh 开业tó一科？」明致a讲：「我khah爱外科。」胜a讲：「阮静美今年大学经济系4年，beh请你来补习。」明致a应：「经济我khah m̄-bat。」胜a讲：「补习英语，毕业了beh去留学。」明致a讲：「我英语无讲真好。」胜a讲：「你m̄免siuⁿ顾谦。读台大医学院ê联考拢600外点，ta̍k科mā这枝ê。」比一枝大头姆hō͘伊看，雄雄lù一句英语问伊：「Mr.Wu，how old are yo͘？」明致a无想着伊会kā考试，顺嘴tō应：「yes。」胜a讲：「你看，按呢ná有问题？」来富a心内8、9分ê欢喜，插一枝嘴问：「你敢有女朋友？」「我有一个女朋友，熟悉5冬a。」「犹未订婚？」「等我毕业才beh订婚。」「In tau teh chhòng啥？」「老父tī区公所食头路，已经退休a。」来富a心内想，食头路人无钱也无地位，按呢che简单，欢喜tō有10分，一直kā胜a bih嘴nih目。胜a讲：「你专工来教阮静美，别位拢mài去。」一点钟补习费3千kho͘，兼算来回车马费。He明致一算，一礼拜来三摆，一个月3、4万kho͘，比食一个头路ê khah好空，随tō答应in。

一个月后，来富a问查某kiáⁿ：「老师补习了按怎？」静美讲：「我kā伊问问题，伊拢讲yes kap no。」来富a问：「Ah伊人按怎？」查某kiáⁿ嘴角微一下，面转一hóaⁿ红，无应tō走去。来富a知影，心内有拍算。

Koh来hit礼拜，明致来补习，来富a kā伊参详：「你chit-má tòa hia离学校khah远。我tī chia 对面有一间厝空空无人tòa。你搬来，按呢beh补习、去学校拢khah方便。」Chhōa明致去看厝，一间阔阔阔，三个困房，一个大厅，一间册房，灶脚、浴室拢是全新ê装璜，phi-phi-phà-phà，金金siak-siak，电视、冰箱、眠床、冷气ta̍k项有，无输董事长ê别庄。明致a看kah bē讲话，5分钟才tuh一句：「Che…che chiah大间…」来富--a kā伊giú leh，tiàm he kún金丝ê phòng椅坐落来，讲：「明致a，这间厝作你tòa。你kan-na认真教阮静美，专心对待伊，按呢tō上好a。…咱亲像家己ê人，费用你拢m̄免烦恼。」

明致了解伊ê意思，搬入来新厝tòa。家己一个阔khǹg khǹg，beh食beh用ta̍k项有，koh有人来拚扫。来富a kā查某kiáⁿ讲：「Chit-má老师tòa对面，m̄免麻烦伊来。你家己去伊hia补习。」所以静美tō来明致chia补习，有时讲yes，有时讲no，大部分时间是开讲话仙，二人渐渐来熟悉。这个来富a看kah欢喜tī心内，不时kōaⁿ食ê kōaⁿ用ê来看明致，照顾头照顾尾，bē输家己ê。有时á mā会kā明致暗示，这间tī新公园边三楼ê大厝是登记静美ê名ê。「阮二个老ê，kan-na静美一个，财产m̄留hō͘伊得，beh hō͘啥人？」定着这个明致a读医学院ê gín-á，联考拢600外分以上，m̄是gōng-gōng--ê，意思mā拢听有tō是lah。

讲来咱人也是真奇怪，若是食苦受难khah久to bē惯势，若是快乐享受koh成紧tō会适应。这个明致搬来了后，tòa好食好穿好，koh有轻可钱通thàn，soah liâm-mi来惯势去。感觉若像这款生活条件kap环境是生成tō应该有ê。特别是伊读医学院，毕业出来作医生，上无mā tio̍h ài有这款ê厝，享这款ê受。渐渐伊才来了解，伊交茵蕙5冬a，是按怎厝里拢一直反对。Tī in田庄ê海寮hia，人拢散kah惊着a，老母不时teh骂：「Kan-na súi是会食得？会用得？！」若有人来作hm̄人，m̄是kah田kah厝，tō是kah鱼塭á kah股票。M̄-kú伊目睭内kan-na茵蕙一个，明明无田无厝，无鱼塭á无股票。莫怪庄里ê人，亲成ê五十，朋友ê六十，拢替伊ê父母怨叹，无彩kan-taⁿ生这个后生才情，读kah医学院作医生…

Chit-má伊kā想起来，以前实在是少年人浪漫ê爱情主义，青春期无实际ê理想迷思。因为伊bih tī学校内，拢无注意着外面社会ê状况，实在除了爱情以外，人生犹有真chē重要ê物件，这点伊chit-má才忽然间看着lah。

Lú想lú明白，tō有一个决定：过去ê放hō͘过去，将来ê bē使无去。但是这个新觉悟ê道理beh按怎kā茵蕙讲，伊才会tàng理解leh？

这日伊专工chhōa茵蕙来新公园这间第三楼ê公寓。门拍一下开，bē活lah，若董事长ê别庄，phi-phi-phia̍k-phia̍k，金金siak-siak，内面食ê看ê用ê ta̍k项有。茵蕙m̄相信，明致家己一个tòa tī chia！Kā看，桌顶是伊ê册，房间吊伊ê衫，m̄是家己目睭teh作怪？明致讲：「Che…che拢tòa免钱ê 。」茵蕙听无，目睭掠伊看。「我作家教，一个月薪水3、4万，这间厝tòa免钱。」明致讲，橱á拍开，吊规排新táng-táng名牌ê衫裤。冰箱拍开，食ê lim ê khǹg kah tīⁿ-tīⁿ。茵蕙问伊：「Che是啥物款ê家教leh？」才知影有一个独生查某kiáⁿ，大学生4年，毕业beh去留学，无爱出去交朋友，叫明致来教英语…。这时伊才作一下全部了解，为啥物这几个月以来，渐渐伊lú无拍电话hō͘伊，渐渐lú无êng kap伊见面，渐渐lú无koh讲，in是仝一条性命，永远分bē开…。「真久我tō想beh kā你讲a… 」伊耳空内若像有听着明致teh讲，嘴里念「我知影lah…，我拢知影lah ，…」That tiâu ê声khê tī nâ喉，走bē出来，oa̍t头tō走，chông离开hit间阔lòng-lòng、内面ta̍k项有ê大厝。

3.

无外久时机变bái，连续几个月，ta̍k股票＜跌停板＞，按万外点落到2千点。霸王陈永胜ī大输大，了kah ta-ta，hō͘证券行断头，全部破产，险险跳楼。

明致转来旧底tòa ê所在，kap朋友公家一间房间。无外久koh想起伊kap茵蕙，仝一条性命，伊是刺毛虫，伊是刺毛虫变ê iâ-á，in永远分bē开ê代志。