《陈雷文选》

 | | | 转寄

黄启ê结剧

作者 陈雷 2006.10.15

大家拢niauh-niauh等，等伊目睭thí金koh看一下。已经成礼拜a，tō是kan-na困bē醒m̄知人。有一回若像有精神过来，看in罔a，看胜a、宏a、娟a…，liâm-mi tō koh困去。医生讲，大概无望a，che大家拢知影。70外a，koh是断脑筋第二摆，顾困bē醒，应该是挡bē久，上加koh几工a niā-niā。｡ 咱bat听人讲『良宵一刻值千金』，总是咱人beh去进前，最后『回光反照』hit个目nih，虽然kan-na看，无讲话，现现hit个目神拢犹tī hia，成实bē比『良宵一刻』khah价值？

「恁装作党外ê lām tī内面，tòe人行，tòe人hoah，拢mài出手。等有人点火，警察pûn pi-á，恁tō开始拍。」「拍啥人？」「拍警察，，拍安全人员，拍记者…」「Ài用枪？」「免刀免枪。用棍á but。局长ê意思，作恁拍，lú雄lú好，闹hō͘大，ài大家看会着，警察teh hō͘人拍。」

陈ê kā阿进财按呢吩咐，因为高雄市警察局已经有情报，党外ê beh tī世界人权日演讲游行，警总beh借这个机会党外ê总sa。所以局长叫陈ê先来kā阿进财讲好势，叫in hia ê兄弟hit暗装作党外ê lām tī hin，时到phah警察惹事。阿进财tō是咱高雄万国帮ê头ê，人叫作青蛇。凡是警察ài乌道斗脚手，拢来chhōe伊tō是。

Hit暗阿进财chhōa十外个兄弟装作党外ê，pa̍k头巾，gia̍h牌á，gia̍h火把tòe人行，tòe人hoah，乖乖无动脚手。因为大统百货公司hia hit个扶轮公园hō͘警察封锁，临时改tī大圆环，大家溢溢来tī hia，规街á路人插插插，大家手里m̄是gia̍h牌á，tō是gia̍h火把。M̄-kú he火拢hoa ê，无人点。警察、宪兵khiā规排kā大圆环围leh。游行总指挥代先有kā大家交代，无beh kap警察冲突，所以虽然人人有火把，这暗无人点火。Hit时台á顶有人讲话，阿进财无认真teh听，kan-na teh张持，等人点火警察pûn pi-á。过来台á顶换一个少年查某讲话，中khùi足足，讲话大声，大约是teh讲台湾ài民主，ài有人权…。大家听kah欢喜拍phok-á，tòe leh hoah：「…民主！…人权！…民主！…人权！…」有人hoah了刺激bē soah-khùi，the̍h火来点。火把点hō͘ to̍h，一枝sòa一枝，规个大圆环几万pha ê火点kah光hiàⁿ-hiàⁿ，iāⁿ来iāⁿ去，若几万蕾黄ê、红ê大蕾花浮tī规遍ê乌水里溢过来、溢过去，有人开始唱歌。警察受气，pûn pi-á围óa来。阿进财看有人点火，警察pûn pi-á，tō是时间到。Ia̍t一下手，hoah一声『拍』，十外个兄弟拢「干恁娘」作一下冲来chhiâng警察，用棍á、用火把kòng警察。He警察据在inkong3，也无回手。有ê hmh了着伤流血，倒tī土脚，tú好几nā ê记者tī hia，相争chiⁿ来hip相，mā食拍。这时另外hit旁有人hoah：「镇暴ê来a！…镇暴ê来a！…」街á hit头几nā只铁壳车来。He镇暴ê全部武装，gia̍h挡牌、gia̍h霹雳棍、chah mah-su-khuh，kā大圆环包围起来。Hit个少年查某台á顶看着，mai-khuh gia̍h leh讲：「各位咱高雄ê兄弟姊妹，今á日咱tī chia纪念世界人权日，咱beh用和平ê方式要求民主改革，要求人权尊重…。请大家安静落来，咱无beh kap警察冲突。镇暴ê若用暴力…咱无beh动脚手…」雄雄pin-pin pòng-pòng，四kho͘围亲像teh爆击tàn炸弹。有人hoah：「Ga-suh！Ga-suh！…」Liâm-mi he ga-suh ê白烟像茫雾chhèng koân起来，tòe风走，一四界臭ko͘ⁿ-ko͘ⁿ。大家鼻á tēⁿ leh，目睭thí bē开，拢着青惊相争走，青猴乌白chông。有ê用hiu ê，有ê用哀ê，若像teh赶猪á，据在he镇暴ê、警察á kòng。

这暗黄启in头家叫伊kā印好ê杂志送去美丽岛杂志社，tú好tī中山大路大圆环hia。黄启送货来，遇着人teh游行演讲，tī杂志社楼顶看闹热。雄雄街á人ká滚相拍，镇暴ê放ga-suh，看m̄是势，chông落去楼脚tō beh溜soan。Tú好一个少年查某ùi楼梯头chông起来，青青狂狂kā hoah：「紧去！紧去kā大家讲，镇暴ê来a，…镇暴ê放ga-suh kòng人…」Ga-suh已经chhèng来到楼顶，黄启鼻á ng leh，khuh-khuh嗽，目油直直流，强beh bē喘khùi，kan-na听着楼顶hit个少年查某teh khà电话，大声嚷：「…ôe!…ôe!…你美国范会长？…我chia台湾高雄lah…你kā海外ê同乡讲，镇暴ê来a，…in teh放ga-suh kòng人，…ôe!ôe!…我…挡bē tiâu a，…无法度koh讲a…」

黄启ùi后壁门出来，驶hit只送货ê细只tho͘-la-khuh走，直透走转来到厝。In某罔a看电视teh报，圆环hia teh乱，党外ê拍警察，拍kah流血倒tī土脚，吩咐黄启m̄-thang koh出门。

这个高雄事件报纸报真chē，mā有hip真chē相，党外ê用棍á、用火把拍警察。He电视kā看，警察流血倒tī土脚，据在人拍，拢无回手。二工后，警总开始掠人，党外hit几个chhōa头ê总sa，kan-na一个掠无着，去hō͘走去。美丽岛杂志社mā封掉，黄启in头家hit间印刷厂，因为印美丽岛杂志，mā罚金停工。三月初八起诉军事审判。这回外国记者来bē少，在地报纸mā报真chē。Hit八个被告m̄认罪，颠倒拢辩解台湾ài民主改革。黄启听in头ê讲，he军事检查官听kah同情流目屎。Khiā tī法庭边a ê查某警员挡bē tiâu，走出去外口拭目屎。也有记者ná写稿ná滴…。黄启看电视，hit暗tī楼顶khà电话hit个少年查某mā tī hin，判12冬。黄启定定kā朋友讲：「这个我bat伊。」凡是bat黄启ê人拢讲黄启作人上照起工，m̄ bat讲êng话，也m̄ bat chhap选举。Tō是高雄事件了后，hit年底选立委，黄启kā罔a讲，伊beh去作义工，第一摆chhap选举，替党外插旗á。

不而过che已经是真久以前ê代志。Chit-má黄启断脑筋倒tī病院，头壳内是按怎koh去想着hit暗ê经过，che讲来也是真龟怪。大概是chhiàng-suh chhiàng-suh，无啥特别ê理由，伊头脑伤害了，乌白teh想ê niā-niā?

也无tú-tú可能是病房药水味真重，hō͘伊头壳内ná准是koh鼻着hit一暗镇暴ê ga-suh。伊赶紧chông落去楼脚，tī楼梯头明明有听着，hit个中khùi足足ê少年查某tī楼顶khà电话，大声teh嚷：「…kā大家同乡讲，…镇暴ê来a，…in teh放ga-suh kòng人，…ôe!ôe!…我…挡bē tiâu a，…无法度koh讲a，…」

伊ùi后壁门走出去，hit只细只tho͘-la-khuh驶leh tō走。十字路口镇暴ê遮落，m̄ hō͘伊过。黄启m̄停车，ngeⁿ冲过，油摧落，一直走。耳á内有听着远远pin-pin piàng-piàng ga-suh弹爆发声，hit个少年查某kā hoah：「紧去！紧去kā大家讲，镇暴ê来a，…镇暴ê放ga-suh kòng人。…」

Ga-suh一直khîⁿ来，白茫茫kā伊ê tho͘-la-khuh包围。车lú驶lú紧，伊赶紧驶去电视台，冲入去播送室，大声嚷：「镇暴ê来a！镇暴ê放ga-suhkong3人…。恁是按怎拢乌白报？！是按怎真ê m̄报，拢报白贼？!…」He播送员一个查甫ê、一个查某ê kā 伊笑，……臭味ê毒气lú来lú kāu，若紧流ê溪水im来，tú tī水里bē喘khùi、胸坎cha̍t起来，一时á m̄知人tō去a。

Koh若像teh作梦，梦去倒tī眠床顶，罔a坐tī边a，头chhi̍h-chhi̍h teh chhn̍gh。In胜a、宏a、娟a kap美a拢tī眠床边teh kā看。伊真和平，心内也无感觉有欠啥，…tō是kan-na这个细汉ê美a，近来家庭bē好势，teh闹离缘，hō͘伊有烦恼。美a chēng细汉生作上súi，大家拢按呢讲，美a人khah nńg-chiáⁿ…。伊ia̍t手叫美a khiā khah óa来，beh kā伊吩咐。手ia̍t bē tín动，嘴开kā美a讲：「…to也二个gín-á chiah大汉a，khah lún一下，煌a若酒khah节（chiat）leh，人也m̄是bái lah，…」嘴soah也bē开，话讲bē出来，想beh问in罔a、问胜a、宏a kap娟a in…bē赴问tō m̄知人a。

所以到路尾黄启有koh精神过来，目睭thí金看罔a，看in胜a、宏a kap娟a。若像有话beh交代美a，明明hit个目神拢犹tī hia，无几分钟á，目睭kheh leh tō去a。凡是bat黄启ê人拢讲，黄启作人上盖照起工，按呢恬静静，平平安安过身去。事实上，hit个黄启ê结剧有比che khah复杂一sut a，不过是khiā tī边a ê人，tī hit个『回光返照』ê一目nih看bē出来niā-niā。