《陈雷文选》

 | | | 转寄

写hō͘学生朋友 ê 代志 31 - 散乡ê滋味

作者 陈雷 2019.12.15

（Siá hō͘ ha̍k-seng pêng-iú ê tāi-chì 31）（写hō͘学生朋友 ê 代志 31）

Sàn-hiong ê chu-bī / 散乡ê滋味

1950, 60 nî-tāi ê Tâi-oân kap chit-má pí-kàu khí--lâi, sī chi̍t-ê chin sàn-hiong ê só͘-chai. Tha̍k Tâi-tāi ê sî tòa ha̍k-seng sok-sià, tī sok-sià chhan-thiaⁿ pau-chia̍h. Ta̍k-ji̍t chá-tǹg chia̍h ám-bê, phòe chi̍t-kak tāu-jú ia̍h-sī chi̍t-tè ìm-koe á, kiam chha-put-to 20 gōa lia̍p sóa-iâm ê thô͘-tāu. Ám-bê chú kah chúi-chúi-chúi, bē chí-iau. Bô kúi-lia̍p bí lóng tîm tī tháng-té, só͘-í goán koàn-sì iōng khat-bê ê hāu-siâ-á lā tháng-té ko͘ bí. Ū chi̍t-pái, chi̍t-ê ha̍k-seng ko͘-tio̍h chi̍t hāu-siâ tāng-tāng. Kiò-sī hó-khang ko͘-tio̍h chi̍t-khok bí. Hoaⁿ-hí kā gia̍h--khí-lâi, îⁿ-îⁿ chi̍t-lia̍p pau-hî-chhéng, sé-tiáⁿ ê chang-chhéng. M̄-chai beh chhiò ia̍h-sī beh siū-khì. Chi̍t-goe̍h-ji̍t ka-chhài chi̍t-pái, tāi-ke chin kî-thāi, bē-su tán kòe-nî. Ka-chhài khah-siông sī chi̍t-lia̍p ló͘-nn̄g ia̍h-sī chi̍t-tè pûi ti-bah, téng-bīn chi̍t-iân phôe, tiong-ng chi̍t-chōa sán-bah.

1950, 60 年代 ê台湾 kap chit-má 比较起--来, 是一个真散乡ê所在. 读台大ê时tòa学生宿舍, tī 宿舍餐厅包食. Ta̍k日早顿食ám-bê, 配一角豆乳ia̍h是一tè 荫瓜 á, 兼差不多 20 外粒sóa 盐ê土豆. Ám-bê煮kah水水水, bē止iau. 无几粒米拢沉tī桶底, 所以阮惯势用khat bê ê hāu-siâ-á lā桶底 ko͘ 米. 有一摆, 一个学生ko͘ tio̍h 一hāu-siâ重重. 叫是好空ko͘ tio̍h一khok米. 欢喜kā gia̍h--起-来, 圆圆一粒鲍鱼chhéng, 洗鼎ê棕chhéng. M̄知 beh 笑ia̍h是beh受气. 一个月加菜一摆, 大家真期待, bē 输等过年. 加菜khah常是一粒卤nn̄g, ia̍h是一 tè 肥猪肉, 顶面一iân 皮, 中央一chōa sán肉.

Hán-hán ū-sî tńg-lâi chhù hioh-ká, kòe-nî, chē siong-sio̍k ê hóe-chhia(kiò-chò bān-chhia)ùi Tâi-pak kàu Tâi-lâm chap-tiám gōa cheng, ta̍k-chām thêng. Chhia-téng pak-tó͘ iau mā m̄-kam bé piān-tong lâi chia̍h. Thōng kàu-chhù, iau koh thiam, chi̍t-kang liáu--khì-a.

罕罕有时转来厝hioh假, 过年, 坐上俗ê火车（叫做慢车）ùi台北到台南 10 点外钟, ta̍k站停. 车顶pak肚iau mā m̄甘买便当来食. Thōng到厝, iau koh thiám, 一工了--去-a.

Chóng--sī goán hit-sî siōng-kài sàn-hiong--ê m̄-sī chia̍h, m̄-sī chhēng. Sī thâu-khak lāi ê mi̍h-kiāⁿ, khang-khang bô siā-hōe siông-sek, tek-pia̍t sī Tâi-oàn ê tì-sek. Ha̍k-hāu lāi kà--ê lóng-sī Tiong-kok chhàu-phú bô-lō͘-ēng ê kó͘-tóng, bûn-giân-bûn, khóng-chú, n̂g-tè giâu sūn ê hàm-kó͘….kui-ji̍t lóng teh sí-pōe chia-ê mi̍h. put-koán bûn-ha̍k, tē-lí, le̍k-sú bô-pòaⁿ-hāng Tâi-oàn ê. M̄-kú siōng-kài giâm-tiōng ê sàn-chhiah sī bô chò-lâng ê chun-giâm chū-sìn. Tī hit-ê gōa-lâi chèng-koân kài-giâm-lēng sî-tāi, goán thâu-khak lāi m̄-nā sàn-hiong, jî-chhiáⁿ chiⁿ chiok-chē bô-lō͘-iōng ê pùn-sò.

总--是阮hit时上盖散乡--ê m̄是食, m̄是穿. 是头壳内 ê物件, 空空无社会常识, 无知识 , 特别是台湾ê知识. 学校内教--ê拢是中国臭phú 无路用ê古董, 文言文, 孔子, 黄帝尧舜 ê hàm-kó͘……规日拢teh死背chia ê物. 不管文学, 地理, 历史无半项台湾 ê. M̄-kú上盖严重 ê 散赤是无做人ê尊严自信. Tī hit 个外来政权戒严令时代, 阮头壳内 m̄-nā散乡, 而且chiⁿ 足chē 无路用 ê pùn-sò.

Put-kò goán hit-chūn ū chi̍t-hāng mi̍h chin hong-hù:chhin-chiâⁿ pêng-iú､chhù-piⁿ keh-piah ê jîn-chêng, Tâi-oân-lâng phok-si̍t toing-hō͘ un-loán ê jîn-chêng. Lēng-gōa mā iáu-ū chháu-tē chheng-khì ê khoân-kéng.

不过阮hit阵有一项物真丰富：亲成朋友、厝边隔壁 ê人情, 台湾人朴实忠厚温暖ê人情. 另外mā iáu有草地清气ê环境.

（Chok-chiá chù:chhiáⁿ-iōng pe̍h-ōe-jī)（作者注：请用白话字）