《陈雷文选》

 | | | 转寄

写hō͘学生朋友 ê 代志 28 - 台湾路

作者 陈雷 2019.12.08

（Siá hō͘ ha̍k-seng pêng-iú ê tāi-chì 28）（写hō͘学生朋友 ê 代志 28）

Tâi-oân lō͘ / 台湾路

Kòe--lâi ê gō͘-cha̍p nî, tùi Tâi-oân éng-hióng siōng-tōa ê eng-kai sī tē-kiû ê khoân-kéng piàn-hòa. Put-kò che m̄-sī lán kin-á-ji̍t thó-lūn ê būn-tê. Lán beh kóng--ê sī Tâi-oân ê chèng-tī khoân-kéng.

过--来 ê 50 年, 对台湾影响上大 ê应该是地球 ê 环境变化.不过che m̄是咱今 á日讨论 ê 问题. 咱beh讲 ê 是台湾 ê 政治环境.

Lán ū sì-pah tang pī si̍t-bîn ê le̍k-sú, chin-chai Tâi-oân lâng ê an-choân kap chū-iû su-iàu to̍k-li̍p chú-koân ê kok-ka chiah ē-tàng pó-chèng. Chit-tiâu tō-sī lán beh kiâⁿ ê Tâi-oân lō͘. Tān-sī chit-tiâu lō͘ m̄-sī e̍h-chiⁿ ê kok-ka chú-gī. In-ūi lán ê tē-lí sī hái-iûⁿ, lán ê hái sì-piⁿ khai-hòng, lâng-lâng lâi-óng, lán iā-sī kok-chè chú-gī chiá. Kap choân-sè-kài ê kok-ka pêng-téng lâi-óng. Kok-chè chú-gī hō͘ lán chìn-pō͘, hù-jū, an-choân. Só͘-í Tâi-oân lō͘ ū siang-chōa, chú-koân kok-ka kap ha̍p-chok ê kok-chè chú-gī.

咱有400 冬被殖民 ê 历史, 真知台湾人 ê 安全kap 自由需要独立主权 ê 国家chiah 会当保证. 这条tō是咱beh行 ê 台湾路. 但是这条路 m̄是e̍h-chiⁿ ê 国家主义. 因为咱 ê 地理是海洋, 咱 ê海四边开放,人人来往, 咱也是自然 ê国际主义者. Kap 全世界 ê 国家平等来往. 国际主义hō͘咱进步,富裕,安全. 所以台湾路有双chōa, 主权国家kap合作 ê 国际主义.

Siōng-kài hoán-tùi Tâi-oân lō͘ ê sī Tiong-kok kiōng-sán-tóng chèng-koân. In beh chhim-chiàm Tâi-oân, khòng-chè Tâi-oân. In ê iá-sim sī chòe-āu khòng-chè choân sè-kài ê lâng kap chu-goân, chhin-chhiūⁿ in chit-má khòng-chè choân Tiong-kok kâng-khoán. Che sī bo̍k-chêng Tâi-oân siōng-tōa ê hûi-hiám, tē-it te̍k-jîn. Lán it-tēng tio̍h khòaⁿ-chin in ê pún-chit, chiah ē-tàng pó-hō͘ ka-tī.

上盖反对台湾路ê是中国共产党政权. In beh侵占台湾, 控制台湾. In ê野心是最后控制全世界ê人kap资源, 亲像in chit-má控制全中国仝款. Che是目前台湾上大ê危险, 第一敌人. 咱一定tio̍h看真in ê本质, chiah ē-tàng保护家己.

Tâi-oân lō͘ kham-kham-khek-khek, iōng lán ê tì-hūi, gán-kong, koat-sim ná-kiâⁿ ná khui-lō͘. Che sī lán to̍k-to̍k chi̍t-tiâu hó koh tn̂g ê chhut-lō͘.

台湾路坎坎坷坷, 用咱ê智慧, 眼光, 决心ná行ná开路. Che是咱独独一条好koh tn̂g ê出路.
（Chok-chiá chù:chhiáⁿ-iōng pe̍h-ōe-jī)（作者注：请用白话字）