《陈雷文选》

 | | | 转寄

写hō͘学生朋友 ê 代志 26 - 黄昏ê故乡

作者 陈雷 2019.12.08

（Siá hō͘ ha̍k-seng pêng-iú ê tāi-chì 26）（写hō͘学生朋友 ê 代志 26）

Hông-hun ê kò͘-hiong / 黄昏ê故乡

Chòe-kīn thiaⁿ-tio̍h nn̄g-chat koan-û Bûn-hē ê sin-bûn. Chi̍t-chat sī I 92 hòe phòa-pēⁿ ji̍p-īⁿ, chi̍t-chat sī tī Tâi-lâm beh khí chi̍t-keng im-ga̍k-thiaⁿ kì-liām i. Hō͘ góa siūⁿ-khí 18 tang chêng, tāi-piáu Tâi-bûn Thong-sìn tī Tâi-pak hóng-mn̄g I kap in bó͘ Bûn-hiong ê tāi-chì.（“Jîn-seng koa-ông” khan tī Tâi-bûn Thong-sìn 86 kî. 2001 nî 4 goe̍h-hūn)Hit sî góa chiah chai, I goân-miâ kiò-chò Ông sūi-hô, kap góa kāng kò͘-hiong Môa-tāu lâng. I kóng chhin-sin ê keng-giām, 1960 nî-tāi í-āu tâi-gú-koa hō͘ chèng-hú kìm-chhiò ê chōng-hóng. Saⁿ-tâi tiān-sī-tâi chi̍t-ji̍t hān hòng-sàng nn̄g-tiâu, tó chit-tiâu tio̍h-ài kái tó chi̍t-kù chiah ē-sái chhiò, tó chit-tiâu bē-sái chhhio3, ū-sî ū-kóng lí-iû, ū-sî bô. “ma-ma chhiáⁿ-lí ài pó-tiōng” bē-sái chhiò, in-ūi ē｢éng-hióng peng-á sū-khì｣. Hit nî I í-keng chhit-cha̍p gōa--a, m̄-kú I kap Bûn-hiong khòaⁿ--khí-lâi lóng bē-su 4, 50 hòe niā-niā.

最近听tio̍h 2 节关于文夏 ê 新闻. 一节是伊92 岁破病入院, 一节是tī 台南beh起一间音乐馆纪念伊. Hō我想起 18冬前, 代表台文通讯 tī台北访问伊kap in某文香 ê 代志. （“人生歌王”刊 tī台文通讯86期. 2001 年4 月份 ）Hit时我chiah 知, 伊原名叫做王瑞河, kap我仝故乡麻豆人. 伊讲亲身 ê经验, 1960 年代以后台语歌hō͘政府禁唱 ê 状况. 3 台电视台一日限放送2条, tó 一条tio̍h-ài 改tó 一句chiah ē 使唱, tó 一条bē使唱, 有时有讲理由, 有时无. “ 妈妈请你爱保重” bē使唱, 因为ē｢影响兵 á ê 士气」. Hit年伊已经70 外--a, m̄-kú 伊kap文香看--起-来拢bē输4, 50 岁niā-niā.

Tiong-kok chèng-koân ūi-siáⁿ-mi̍h kìm Tâi-gú-koa kìm chiah-giâm?Siau-bia̍t Tâi-oân ì-sek kap jīn-tông, siōng-hó ê hong-hoat sī siau-bia̍t Tâi-oân-ōe, Tâi-oân-koa. Chêng-āu kìm-chhiò ê Tâi-oân-koa lóng-chóng 1,000 tiâu í-siōng. Bûn-hē siá kap chhiò ê koa chheng gōa tiâu lāi-té, tan-tan 50 tiâu bô kìm. Ka-chài Tâi-oân-koa chin lūn-miā, pí Tâi-oân-ōe khah lūn. Chin-chē lâng thau-thau á chhiò. Keng-kòe kài-giâm-lēng kìm kah beh-sí beh-sí, kái-giâm liáu-āu, siōng-chá koh ū-siaⁿ--ê tō-sī lán ê Tâi-oân liû-hêng-koa. Ē-sái kóng, liû-hêng-koa thè Tâi-oân-ōe lâu chi̍t-lia̍p hóe-chí, tán ū sáng-so͘h （iông-khì)ê khong-khì tńg--lâi ê sî, hō͘ hóe koh to̍h--khí-lâi.

中国人政权为啥物禁台语歌禁chiah 严？消灭台湾意识kap 认同, 上好 ê方法是消灭台湾话, 台湾歌. 前后禁唱 ê台湾歌拢总 1,000 条以上.文夏写kap 唱 ê 歌千外条内底, 单单50 条无禁. 佳哉台湾歌真lūn命, 比台湾话khah lūn. 真chē人偷偷 á 唱. 经过戒严令禁kah beh死beh死 , 解严了后,上早koh有声--ê tō是咱 ê台湾流行歌. Ē使讲, 流行歌替台湾话留一粒火chí, 等有sáng-soh （氧气）ê 空气转--来 ê 时, hō͘火koh to̍h--起-来.

Che tō-sī Bûn-hē ê it-seng, I ê sū-gia̍p tāi-piáu ê ì-gī. “phiau-lōng chi lú ” （Bûn-hē cha̍p-peh hòe sî chò ê tē-it tiâu koa) “ hông-hun ê kò͘-hiong “ “ ma-ma chhiáⁿ-lí ài pó-tiōng “ .......hō͘ chhian-chhian-bān-bān hoán-khòng kìm-siaⁿ（kìm-ōe kìm-koa)ê Tâi-oân-lâng phah-khui nâ-âu, lán kám-siā i. Chiok-hok i jîn-seng chi̍t-ê boán-hâ boán-thiⁿ ngó͘-chhái bí-lē ê hông-hun.

Che tō是文夏ê一生, 伊ê事业代表 ê意义. “ 漂浪之女”（文夏18 岁时做 ê第一条歌） “ 黄昏 ê 故乡” “ 妈妈请你爱保重”..... hō͘千千万万反抗禁声（禁话禁歌）ê 台湾人拍开nâ-âu , 咱感谢伊. 祝福伊 ê 人生一个晚霞满天五彩美丽 ê黄昏.

（Chok-chiá chù:chhiáⁿ-iōng pe̍h-ōe-jī) （作者 注：请用白话字）