《陈雷文选》

 | | | 转寄

写hō͘学生朋友ê代志 13 - 唱歌ê运河

作者 陈雷 2019.11.17

（Siá hō͘ ha̍k-seng pêng-iú ê tāi-chì 13）（写hō͘学生朋友ê代志 13）

Chhiò-koa ê ūn-hô / 唱歌ê运河

Ū-hòe ê Tâi-lâm lâng tāi-khài lóng chai-iáⁿ Sa-kha-li-bah, khah-chá chhī-lāi chia̍h-mi̍h siōng chhut-miâ ê só͘-chai. M̄-nā hó-chiah koh siok, kúi-lōa cha̍p tàⁿ kù-chāi lí kéng, siōng tek-pia̍t sī I ê Tâi-lâm bī, pat-ūi bô,……..siān-hî mī, hún-îⁿ á, tiáⁿ-piⁿ-sô, koaⁿ-chhâ-pang……In sī siáⁿ-mi̍h, góa chiām-sî sian-ki bô lāu-sia̍p, chhiáⁿ lín ka-tī khì liáu-kái. Gōa-tē ê pêng-iú nā lâi sio-chhōe, siōng kàu-lé tō-sī ‘góa chhōa lí lâi-khì Sa-kha-li-bah’.

有岁 ê 台南人大概拢知影Sa-kha-li-bah, khah早市内食物上出名 ê 所在. M̄-nā好食koh 俗, 几lōa十担据在你kéng, 上特别是伊 ê台南味, 别位无, ….. 鳝鱼面, 粉圆á, 鼎边sô, 棺柴板（pang）…..in是啥物, 我暂时仙机无漏泄, 请你家己去了解. 外地 ê 朋友若来sio-chhōe, 上够礼tō是’ 我chhōa你来去Sa-kha-li-bah’.

Che Sa-kha-li-bah sī án-chóaⁿ khí-sè ê , góa bô siáⁿ khak-si̍t. chóng--sī ū-iáⁿ chēng Ji̍t-pún sî-tāi tō ū--a. Tē-tiám chin-hó, tú-hó tī ūn-hô piⁿ, chū-jiân put-sî lāu-jia̍t, hái-sán lóng-sī siōng-chhiⁿ ê hiān-hòe. Siàu-liân lâng siōng-ài chhōa cha-bó͘ pêng-iú khì Sa-kha-li-bah, chia̍h liáu sūn-sòa oat khì ūn-hô piⁿ sàn-pō͘. Nā tú-tio̍h chhái-hâ ê hông-hun, iah-sī 优iû-iû ê goe̍h-kng mê, loân-ài ê cha̍p-chióng chu-bī chiâu-ū--a.

Che Sa-kha-li-bah是按怎起势 ê, 我无啥确实. 总--是有影chēng日本时代tō有--a. 地点真好, tú好tī运河边, 自然不时闹热, 海产拢是上鲜 ê 现货. 少年人上爱chhōa查某朋友去Sa-kha-li-bah, 食了顺续oat去运河边散步. 若tú-tio̍h 彩霞 ê 黄昏, iah是悠悠 ê月光瞑, 恋爱 ê十种滋味chiâu有--a.

Chhut-kok chêng chi̍t-àm goán khì Sa-kha-li-bah, koh tam chi̍t-pái siān-hî mī, tiáⁿ-piⁿ-sô ê chu-bī. Liáu oat khì ūn-hô-piⁿ chē, í-keng òaⁿ-òaⁿ bô-siáⁿ-lâng. Tùi-bīn thiⁿ-téng pòaⁿ-ê goe̍h, chúi-bīn chi̍t-chōa tn̂g-tn̂g ê goe̍h-kng, ū-sî hông-lâi chhoe jiâu-khì, chin-chhiūⁿ goán ê sim-chêng áu chò kúi-lōa kéng. Hái-bī ê chúi-éng phah tio̍h chûn-tó͘, khin-khin á chi̍t-siaⁿ chi̍t-siaⁿ, hî-chûn khôaⁿ-khôaⁿ-á chi̍t-ē chi̍t-ē hiàn, bē-su ūn-hô teh sak iô-kô, chhiò io-eⁿ-á koa. Goán iok-sok, ta̍k lé-pài siá-phoe, I pit-gia̍p sûi-lâi bí-kok kap góa chò-hóe.

出国前一暗阮去Sa-kha-li-bah, koh tam一摆鳝鱼面, 鼎边sô ê滋味. 了oat去运河边坐, 已经òaⁿ-òaⁿ无啥人. 对面天顶半个月, 水面一chōa tn̂g-tn̂g ê月光, 有时风来吹jiâu去, 亲像阮 ê 心情áu做几lōa kéng. 海味 ê 水涌拍tio̍h船肚, 轻轻á一声一声, 渔船khôaⁿ-khôaⁿ á 一下一下 hián, bē输运河 teh sak摇kô, 唱io婴 á 歌. 阮约束, ta̍k礼拜写批, 伊毕业随来美国kap我做伙.

Sa-kha-li-bah lî-khui liáu-āu, 50 tang goán bô-koh saⁿ-kìⁿ. Hit àm ê iok-sok hó-pí chhiò-koa ê ūn-hô o-ló siàu-liân jia̍t-chêng ê kià-bāng, eⁿ-á koa io khùn--khì ê bāng. Chiong-kî-bóe--lâi, góa tio̍h mn̄g ka-tī, 50 tang chêng ūi-siáⁿ-mi̍h beh lî-khui hit-ê bí-lē ê só͘-chai, sim-ài ê lâng--leh？ Kiám-chhái hit-ê nî-tāi ê lâng, lēng-gōa iáu-ū chi̍t-ê bû-ko͘ ê ǹg-bāng:chū-iû, chun-giâm, an-choân. Che kám-sī choân-pō͘ ê tap-àn? Ka-chài chit-má ê siàu-liân lâng m̄-bián chò chit-khoán khùn-lân ê soán-te̍k.

Sa-kha-li-bah离开了后, 50 冬阮无koh相见. Hit暗 ê约束好比唱歌 ê 运河o-ló少年热情 ê 寄望, 婴á歌io困--去 ê 梦. 终其尾--来, 我tio̍h问家己, 50 冬前为啥物beh 离开hit个美丽 ê 所在, 心爱 ê人--leh？减彩hit个年代 ê人, 另外iáu有一个无辜 ê ǹg望：自由, 尊严, 安全. Che敢是全部 ê 答案？佳哉chit-má ê少年人m̄免做这款困难 ê 选择.

（Chok-chiá chù:chhiáⁿ iōn pe̍h-ōe-jī) （作者 注：请用白话字）