《陈雷文选》

 | | | 转寄

抗争者

作者 陈雷 2008.06.08

这个龟怪ê抗争到底tiâng时起势（sì)，真pháiⁿ确定。有人讲，in水a年初破病hit时开始。有人讲m̄是，3月19日阿扁a hō͘人tōaⁿ枪开始ê｡Hit chām媒体chhiāng-chhiāng滚，mā有人赖讲是电视看了siuⁿ chē｡不过终其尾来，大家拢真知，花a成实有siáu｡Ah无，thái会三巡告去到最高法院，拢判thâi人无罪。

有影水a病了真雄狂，医生诊断是血癌，白血病急性ê｡头á尾2个月tō无医，无彩才20 thóng niā-niā,连某tō犹未赴娶。花a上盖kiáⁿ甘，孤孤水a一个。入院hit chām,ta̍k日红豆á 79粒、乌豆á 49粒，一粒一粒算kah准准，kûn hō͘烂烂，kōaⁿ去病院，讲是hō͘水a食来治癌。Che秘方mā是电视看来ê,肝癌、大肠癌、子宫癌…ta̍k项拢有效。水a过身了，原在ta̍k日红豆á 79粒、乌豆á 49粒，kōaⁿ leh去病院kho̍k-kho̍k se̍h,人笑讲是去心所愿ê｡阿才看伊早暗街á路ta̍uh-ta̍uh行，心狂火热，bē输厝里tio̍h贼偷，金条phàng见去，路里遇着tō kā劝：「花a，恁水a taⁿ to去a，咱作人若有敬hit个神，尽hit个情，讲hit个理，ah tō拢总犹tī chia。」双手tah心肝窟á hō͘伊看。阿才kap花a tòa仝chōa街á,tī路口三角窗卖肉丸。一日200粒，半晡卖了tō收担无卖。Chhun ê时间去公园作义工，剪树á整理花，去学校顾gín-á过车路。有人客问：「才a，你肉丸好食，thái m̄加卖kóa?」阿才应：「爱钱一四界有，beh thái thàn会了？按呢有够用tō好。」有人客bē谅解，kha-chiah后keng-thé伊，钱thàn siuⁿ -chē-a-lah，你m̄知nih？Chit-má卖肉丸ê比开百货公司khah好空。Taⁿ花a听阿才劝，作人tō是讲一个理，尽一个情，敬hit个神，也tòe伊tah心肝窟，gī-gī笑，细声kā阿才偷nauh一句：「阮水a惊注射，走去bih…」。Tō是为着这句话，规个代志拢惹惹来。

3月19 hit下晡，阿扁a tī台南扫街路hō͘人tōaⁿ枪。佳哉天公保庇，枪子一粒chhê过，连pak肚皮tō pōng无thàng过，hiahN一个青惊niā-tiāⁿ。隔转日，大家投票选总统，阿扁a当选，民进党赢，国民党输，ah来tō花bē直a。连ê起屁面，电视顶siak-tiō大受气，现场hoah讲：「我宣布陈水扁当选无效。」成实ê,beh讲这句话也无先请教选举委员会。照伊ê意思，这个选举若m̄是伊tiâu,tō拢总无算，ài koh重选。电视顶主持叩应hit个李讨，mā是真受气，假愤慨，讲che规出拢假-pâu ê,阿扁a作秀，家己去叫人来tōaⁿ ê｡Ah无，大家想tō知，thái会真正tōaⁿ kah hiah准hiah真，tú-tú好pak肚皮薄thi-thi-a chhê过去。另外hit个叩应小大妹陈阿西，伊kap几个党主席拢真bā,特别有交陪相好。因为伊gâu社交，奶á bē细粒，人mā真开放，讲查某人ê奶是上好ê社交工具。Mā是替连ê真不平，讲拢是民进党设计ê,上奸tō是阿扁a这个苦肉计，用来骗纯情ê台湾人ê同情票。若无这款lah-sap步，阿扁--a绝对无可能嬴，国民党绝对无可能输。恁看，投票前民调，连宋嬴几lōa十万票，ná有可能颠倒输2万票？！M̄是偷作票tō是算m̄ tio̍h票，ài koh全部验票重算。Kap连ê仝款，伊宣布阿扁a当选无效，mā是真侥幸，beh讲这句话也无先请教选举委员会。

这chām媒体闹kah chhiāng-chhiāng滚。花a ta̍k日看电视，听李ê､陈ê叩应，soah学in ê步数，mā会晓抗争。凡是抗争，骂khah大声、骂lú pháiⁿ听tō是 tio̍h;起khah屁面、变khah pháiⁿ面tō是赢。

Tō是tī这款乱糟糟，花sà-sà ê中间，突然去想着in水a，kap阿扁a pōng枪仝款，明明是人设计ê｡Ah无，20 thóng岁á,人好好勇kah若牛，thái 会无代无志tio̍h血癌？！电视ná看，lú想lú郁卒，soah kap连ê总统选无tio̍h ê心情仝款，gêng心结规丸，有卵核ê m̄认输，开始抗争。随tō拍电话去电视台叩应，电话线无êng,拍bē入去。Tú好李讨tī电视顶讲话，叫立委ài去病院查病历，验伤。隔转日，花a去仁爱病院，beh去问医生，查病历。病院ê公关看伊花花蕃蕃，讲话kap电视内面李ê､陈ê叩应差不多，想讲头壳有têng-tâⁿ，chhìn-chhái应一句『不知道』，好礼请伊出去，无人beh chhap伊。

Koh来一时想无步，m̄知beh按怎抗争。Tú好这日好天，有人tī总统府头前游行抗议。宋ê tī电视顶，乌绿肉、生sian面，心情kap连ê仝款，mā是gêng心结规丸，有卵核ê m̄认输，叫大家『坚持真理！抗争到底！』koh有一kóa人gia̍h旗á､gia̍h牌á teh行teh hoah，『还我真相！』『当选无效！』『打倒卖国贼陈水扁！』花a认着hit字「水」字大大字，想着in kiáⁿ水a，一个心gêng去到阿里山顶尾！透中昼坐捷运去总统府头前凯达格兰道，tòe人行，tòe人hoah。一晡行了脚酸，hoah了嘴ta，kap人路边坐。Liâm-mi一只乌头á车来到位，大家hoah：「主席万岁！」这个宋ê,可怜乌绿肉、生sian面tō是gêng了过度，choāiⁿ着筋路。Kap大家at手，讲：『大家辛苦了！』坐落来，巾á the̍h来pa̍k头壳hia̍h,乌墨写大字：『团结一致，绝食到底！』记者相争hip相。坐无10分钟kha-chhng痛，peh起来，kā大家鼓励：『坚持到底！绝食到底！』，坐车tō走。按呢静坐绝食10分钟 ，花a pak肚iau，看人teh领便当，mā分一个来食。Hit时oàn晡，雄雄天乌阴反冷，袋á内jîm一顶帽á来tì,kap人认真行、大声hoah。有注意着边á ê人拢teh kā看，欢喜hoah lú大声。雄雄二个查甫恶死死对面冲--来，出手来chang伊ê帽。另外一个giah牌á『打倒卖国贼』，se̍h倒头ùi hia̍h á tō。四边ê人看有人出手，围óa来斗拍、斗踢，he帽á相争giú,『他妈的』cho̍h tòa土脚直直chàm,bē输in tau tio̍h火烧厝。夭寿，tō是一顶古锥ê阿扁帽，前a竞选造势，阿才送伊ê｡成实gām-gām m̄知死，the̍h来总统府头前tì!双手头壳mo͘h leh，目睭kheh-kheh据在人修理，hīⁿ-á内听人hoah『揍死他！』『揍死他！』，才知影thang惊，拚死chông,佳哉走有lī,差一sut á险险拍无死。作一捆chông来到一chōa小路，看无人jiok来才停脚。Ná喘ná想，taⁿ mā m̄知影是按怎今á日hō͘人拍，概成mā是为着抗争，一时心内加减欢喜满意，相手gia̍h koân hoah：「Hō͘死！…hō͘死！…民进党拍hō͘死！…」

规身躯脚也痛、手也痛，转来到巷á口，遇着阿才sak一只gín-á车，lu in后生出来teh散步。阿才看伊雄狂无看路，衫裤拆一koe̍h,头毛散iā-iā,面á 一tah青一tah乌，问伊：「你是去tó位创啥？舞kah规身躯bē输狗gè ê!」花--a hoah：「Hō͘死！…hō͘死！…」一手kā阿才giú leh，细声讲：「民进党ê拢拍hō͘死！。」Taⁿ koh是选举tōaⁿ枪ê代志，阿才好嘴kā劝：「花a，你这粒头壳，m̄是生出来súi-súi chhāi chia好看ê,mā是ài小用leh，m̄-thang听人讲啥tō信啥。你也kā想看māi,che tōaⁿ枪ê代志hō͘你会设计得？枪子敢成实有目睭会听话？」可恶a，这个阿才卖肉丸早tō是阿扁a换帖ê,民进党死忠ê｡阮水a hō͘ in害chiah惨，…犹teh讲chia ê有ê无ê!

也是注定beh出代志。Hit个阿敏，2岁gín-á坐tī车内底，注死手里gia̍h一枝民进党ê旗á,ia̍t来ia̍t去teh chhit-thô,koh m̄知死teh kā笑。Taⁿ这声火药爆炸tō pòng a！雄雄面头前这个gín-á,魔siûⁿ á青燎面，尖头二叉角，目眉鬼á火，目睭gîn-ò͘ⁿ-ò͘ⁿ teh kā chîn 。花a大声hiu，siáu狗母teh pūi ：「你lah！…tō是你！…你这个死鬼á!…」使恁pâ chhîⁿ…óa来，开大嘴beh kā咬。可怜这个阿敏a，2岁gín-á m̄知天khah koân地khah kē,hō͘伊háⁿ一下hiahN着惊，mâ一下大声háu｡街á路ê流浪狗êng-êng无代志ùi hia过，听着人teh hiu，bē输siáu狗母吹狗螺，拢围óa来。花a惊狗，oa̍t一个kha-chhng紧tō走。

青青cho̍h-cho̍h chông转来到厝，tǹg tòa椅á柴柴坐，gōng-gōng siòng hit台电视，四四角乌乌，若佛á chhāi tī壁角无人拜。伸手beh去kā choān来看，犹未摸着，he电视soah大声teh讲话：「伊lah！…伊害ê lah！…拢是这个死鬼á!…」概成李ê ê声，也概成陈ê ê声，赶紧跪落去拜，感谢神明kā伊通知。过来he电视定定kā伊讲话，叫伊注意，有听he声，无看着影。有时李ê､ 陈ê声 ，有时连ê､宋ê声。「伊lah！…tō是伊lah！…」日时暗时，听kah心狂火热，ta心peh pak，bē食bē困。规日厝内kho̍k-kho̍k se̍h,khiā也khiā bē在，坐也坐bē定。Hīⁿ-á内ki-ki叫，李ê､陈ê､连ê､宋ê拢teh hoah，叫伊紧去救，…去救in水a，…ah无tō bē赴a，…。青狂chông入去灶脚，桌顶大枝菜刀切肉利利，gia̍h leh tō走。来到巷á口，又koh注死m̄死，对对碰着阿才，sak in kiáⁿ 出来teh散步。夭寿a，又koh魔siûⁿ á青燎面，鬼á头二叉角，手里一枝旗á直直ia̍t｡二步chhîⁿ óa去，菜刀gia̍h起来无看tō phut，「…tō是你！…tō是你！…拢是你这个死鬼á!…」一刀phut头壳，一刀to̍k ām-kún,一刀斩手骨，…「thâi hō͘你死！…thâi hō͘你死！…」一刀续一刀，亲像路边卖鹅肉ê火a无êng teh tok鹅。He血若水道头，一直phū一直chōaⁿ，也是红ê也是赤ê,m̄是生tō是死。…

可怜这个阿才，hiahN一下青惊胆破去，gāng-gāng chhāi tī hia，嘴á开hāⁿ-hāⁿ，chhun半两身魂拢ùi hia飞出去。雄雄听人hoah：「…thâi hō͘死！…thâi hō͘死！…」身魂才倒转来。看见大刀phut来，无管死活，规个人车作前去，挂人挂刀ián tī土脚。Ná知he花a siáu人siáu力，翻一下身随koh liòng起来，一枝菜刀血tin-tin，ná舞ná hoah：「水a，我来a！…阿母来救你…」

尾a大家拢知影，花a确实有siáu｡Ah无，thái会三巡告去到最高法院，mā是判thâi死人无罪？Tī法庭，kap电视叩应仝款，花a有坚持，起pháiⁿ面雄死一直骂人：「…hō͘死！…thâi hō͘死！… 」念一大堆电视内面神明kā伊讲ê话。结局这个龟怪 ê凶杀案，最高法院判thâi死人无罪。关于电视媒体ê影响，是m̄是有考虑在内，che咱外面人m̄知影。总是这chām,pōng枪了几lōa个月a，媒体犹真闹热，连ê､宋ê拢真坚持，阿扁a当选无效。凡是选举委员会、法院判决ê,拢总无kah意、无算。Tī这个抗争ê社会，ham报电视仝款，乌白讲、讲白贼人会信，hoah khah 大声、骂khah pháiⁿ 听tō是tio̍h,变khah pháiⁿ 面、起khah屁面tō是嬴。这步in拢真内行。Chit-má犹真chē人认真看电视，将来若是连ê､宋ê koh再落选，抑是其他khah坚持ê立委选无tiâu,mā可能会koh再发展作某一种龟怪ê抗争？所以我先kā这件不幸ê凶杀案详细写起来，hō͘大家参考。

这chām阿才有koh转去卖肉丸，未曾半晡一百粒卖了，tō收担无卖。人客劝伊，才a，你ê肉丸好食，thái lú卖lú少，m̄加卖kóa?应讲，爱钱四界有，thàn bē了lah，按呢有够用tō好。Mā是有去公园剪树á整理花，学校顾gín-á过车路。有人客bē谅解伊，讲你m̄知nih？chit-má卖肉丸ê比开百货公司khah好空。m̄-kú in某春喜a，拢生理作了，收担tō bih tī厝内底，beh成冬a，无出来kap人交chhap。有人替伊烦恼，按呢bih tī厝内，电视若看siuⁿ chē,可能oan-nā m̄是真好ê代志。