《台语chit条路》

 | | | 转寄

《台语chit条路》--加学、加听，做肥底 ― 洪惟仁访问(九)

作者 杨允言 2008.06.29

言：是按怎无出版？

洪：做了无好mà，无完全，资料太chē，收集bōe齐全。事实实在是做了无好，我家治mā m̄敢发表，内底有一寡资料我一直beh补，但是拢无时间，he若补补ê，我着会出版a。

入去研究院，方言调查做一年，头a计画是真大，报名beh做调查ê真chē，但是落尾大部分ê khang-khòe是我做ê，所以计画不得已着爱停起来。我soah变做约聘助理研究员，约聘两年ê时间；我利用chit两年ê时间，编一套【闽南语经典辞书汇编】。

真早ê时chūn，我着kā自立晚报讲，我beh编一套闽南语字典ê全集，闽南语字典差不多有百几集套，我讲咱kā伊总出，自立晚报无爱，到尾a我tú着林聪夫［注：武陵出版社头家］，伊讲『你che计画to有趣味！』我hit chūn m̄敢讲全集，我讲，è，精选着好，算算ê有十本，伊讲无稿费，我讲『无要紧，我tī中央研究院有薪水，你hō͘我khah chē稿费mā无够hia ê本钱。』伊讲『我送你十五套。』出两百套送我十五套。

［注：【闽南语经典辞书汇编】一套十本： 第一本【泉州方言韵书】/黄谦等编 第二本【漳州方言韵书】/谢秀岚等编 第三本【福建方言字典】/麦都思编 第四本【厦英大辞典】/杜嘉德编・巴克礼补编 第五、六本【日台大辞典】/小川尚义编 第七、八本【台日大辞典】/小川尚义编 第九本【台湾语常用语汇】/王育德编 第十本【台湾十五音辞典】/黄有实编］

言：chit-má卖了按怎？

洪：大部分拢mā我kā卖ê，无生理lah。

言：尚过贵a lah，像阮学生根本买bōe起。

洪：你若无teh做研究是无需要买，若是有心做研究一定爱买。

言：问题是讲，内底有几本阮早着有a。

进：我m̄是kā你讲过，拆leh卖。

言：我mā感觉按呢khah通lah。

洪：先爱将chit两百套卖完，因为伊歹处理，伊chit-ma2hou7你调一本去，chhun ê beh按怎？其实chit内底是拢无啥好销。但是尚重要ê是，我其实m̄是干taⁿ beh卖he资料niâ，最重要头前ê题解kap研究，he 下gōa chē工夫ne！我干taⁿ beh写王育德，尚chió用过半年ê时间，王育德ê文章外chē leh你知m̄？干taⁿ伊博士论文着hiah大本，我拢看ne，我m̄是凊采写写ê，伊ê文章toh一篇刊tī toh一本杂志，逐篇我拢chhōe出来看，做年表，王育德ê年表有人做a，所以我无做，像麦都思、杜嘉德、巴克礼，he拢mā是爱做年表、传记，我以前根本m̄知影啥么叫做麦都思，伊有汉名我mā m̄知，着查资料，chiah知影chit-ê人ê来历，有够厉害！台湾话研究者inkhah早做ê物件实在爱了解，了解人是做啥么khang-khòe，chiah知影咱chit-má khang-khòe爱按怎做，咱ê成就beh按怎比in khah高？ 这是做研究ê部分，其实我ê khang-khòe m̄是拢纯研究ê，研究是算做我ê基础。