《胡文池牧师kap布农族》

 | | | 转寄

怀念爱儿－贤民

作者 胡文池 2010.01.24

贤民是我八个儿女中ê老么，tī一九九二年，因意外伤害，输血中不幸血液病毒感染，引起其他并发症á蒙主恩召。伊ê离世带hō͘阮无限伤痛。不过阮真正tio̍h感谢上帝，bat赐hō͘阮chit-ê gín-á，伊伴阮四十年，如今上帝先召伊tńg去了。虽然阮万分不舍，但是「赏赐ê是耶和华，收取ê mā是耶和华，耶和华ê名是应当称颂ê」。阮bē明白上帝ê旨意，但阮顺服伊siōng好ê安排。 现在我用感恩ê心写落来对伊ê怀念：

一、伊ê出生
贤民一呱呱落地，阮就gōng-gia̍h地发现伊唇颚裂。妇人人抱tio̍h这弱小无助ê婴儿直落目屎，心疼伊ê缺陷。但是阮真紧就感谢上帝hō͘贤民出生tī我ê家庭，阮m̄-nā bē厌弃伊，反tńg会hō͘伊siōng适宜ê关爱、医疗kap教育。

妇人人是助产士，伊会晓真chē育婴常识，用siōng好ê方法来照顾chit-ê gín-á。贤民bē晓吸吮母奶，冲泡ê牛奶koh hō͘伊不消化。阮只好家己养羊，hō͘伊每工有新鲜营养ê羊奶thang进食。

Tī伊出生第八天，黄应添医生就为伊做唇部外观缝合手术。口腔内颚裂部分却无法度缝合，这造成伊讲话语音kap咀嚼lóng有障碍。阮四界为伊chhōe名医，孙理莲牧师娘mā托董大成医师四界探听。但足四十年前，台湾ê医学技术尚无法度进行这高难度ê手术。一直到贤民十二岁hit年，有一工，阮突然接tio̍h马偕病院罗慧夫医师ê通知函，ài贤民去接受手术。

原来hit时正有一位专研究唇颚裂ê名医将路过台湾一工，chit位名医是传教兼医治ê印度宣教师。伊真乐意为唇颚裂患者手术，贤民就好字运ê被选上了，只因为伊ê父亲是牧师，tī东部为原住民传福音。感谢主。Hit-pái ê缝合手术m̄-nā全部免费，mā是台湾第一个唇颚裂患者口腔内成功地被全部缝合ê案例。远位印度宣教师就án-ne一pái来台湾，是上帝亲自派伊专程来为贤民动手术ê天使。阮m̄知影伊ê大名，只有满心感谢上帝。

唇颚裂患者lóng须经过kúi-nā-pái ê修补手术。以了后罗慧夫医师kúi-nā pái到美国siōng好ê医学中心进修研究。每pái tńg来，就必通知贤民去复检。Koh再为伊动修补手术。并绍介siōng好ê老师教导伊重新练习发声，hō͘伊咬字清晰，ē-tàng愉快有自信ê kap别人交谈。

二、伊ê奋斗成就
贤民上大学了后就渐渐脱颖á出，伊ê力量源自tī上帝。伊tī自传上写tio̍h:「深深体会tio̍h内心ê软弱á愿koh-khah倚靠主，仰望上帝无限ê希望，支取上帝无限ê坚强kap力量」。一个唇颚裂者所会遇tio̍h ê挫折、困扰或伤害，是一般正常人无法度体会ê。但chit-ê gín-á，靠tio̍h对上帝ê信仰，tī上帝带领下，伊突破了任何ê困境。

Tī伊hō͘罗慧夫医师ê一封感恩信件中，阮thang看出伊ê信仰、对工作ê热诚kap成就，我将原文抄录如下:

所敬爱ê罗院长:
我是胡贤民是台东县关山镇，胡文池牧师ê kiáⁿ儿，未知您会记得否?今á日接tio̍h长庚病院ê复诊通知，本月10日，我将真乐意前往。

我现就读tī台中医药学院药学系夜间部五年级。

一个月以来一直想写phe hō͘您，吐露我ê心声kap感谢：一个月前我卸下了中区长老会大专基督徒学生团契会长ê职务，tī卸任ê hit工我禁bē-tiâu有真chē感触，mā想起了真chē事，其中我特别想起kap感谢ê是您－罗院长。因为我原是一个颚裂ê人；一个口齿不清ê人；一个原应bih-tī别人背后ê人，但因为院长您tī上帝面前ê献身，将家己奉献hō͘台湾人，远渡重洋来到台湾，我chiah ē-tàng得tio̍h siōng好ê医治，tī大学chit几年间，除了今年bat担任中区长老会大专基督徒学生团契会长外，我iáu bat担任台中市大专夜间部联合团契会长、好撒玛利亚人学生慈善基金会会长，kap中国医药学院药学导报社总编辑。担任了chiah-ê职务thang想像地我必须主持真chē会议，必须接洽真chē事务，虽然我ê口音并m̄是百分之百地清晰，但至少我已ē-tàng轻易地hō͘别人晓得我ê意思。我禁bē-tiâu地回想，假使m̄是接受了您三pái ê手术，到taⁿ我将iáu是一个口音完全不清ê人，根本不可能做一个「会长」mā根本不可能做这真chē事。所以卸任ê hit工我深深地想起您mā感谢您!假使chiah-ê年来担任了这真chē ê职务，有一kóa荣誉我愿tī心中深处完全献hō͘您!

写chit封信tùi án-ne tī表达我对您深深地感谢，中国人尤其是台湾人一向不善坦白正直表露家己ê感情。我相信一定会有koh-khah chē受您恩惠ê台湾人tī背地里对您有无限ê感激!

最后附上一本我编辑设计ê「台北市乘车指引」虽然伊对您mā可能无路用(因您家己驾车不乘公车)但对一kóa人是有需要ê。假如上帝赐hō͘我能力，我ǹg望有一工ē-tàng帮助kap我有仝款苦难ê人。

愿上帝祝福您
Mā koh再表达我深挚ê感谢
胡 贤 民 敬上
民国六十七年七月五日

在学期间，伊就常担任各种会长等重要职务。毕业了后，上帝mā特别赐福伊，hō͘伊前后担任长老会文字中心经理、门徒服务团经理、伊甸基金会kap惠明盲校圣诞卡义卖原策划者、GDC土地投资人自救会总干事、中坡教会长老¨¨。任何一份工作或服事，伊lóng全力以赴，不辞辛劳。伊所设计出版ê「胡氏台北乘车指引」tī二年中出版了十三版共五万本，当时坊间koh-khah竞相仿仿、翻印，hō͘伊停止了chit项出版á专心tī其他事业上。

伊ê朋友hō͘伊一句赞语讲:「贤民无一个脑细胞是生銹ê」，足thang看出伊无一丝á浪费上帝所hō͘ ê恩赐。时刻积极运用家己ê每一个思想，勤奋认真正做每一件事。

三、伊ê孝心
Tī伊大学时代ê日记，第一页就写tio̍h：
Hō͘您ê kiáⁿ儿独担奋斗ê痛苦，á请您kap您ê kiáⁿ儿共享成功ê果实。
－hō͘我亲爱ê父母亲

伊开始工作，就每一个月hō͘阮够额ê生活费，家己却省食俭用。
伊结婚ê前夕，写了一篇「反哺」，恳切地邀请阮kap in tòa作伙，伊讲：

「爸妈，您们bat为儿女建立一个充满了深深ê爱kap温暖ê家庭，足令in一生怀念kap满足。如今，tī您们年老ê时chūn，mā hō͘您们bat满溢tī阮身上ê爱回流到您们身上。爸妈!阮欢迎mā teh等待您们来!」

伊确实用实际行动来表达伊ê孝心。

伊蒙主恩召时，阮哀痛地写落来以下肺腑之言：

贤民吾儿：
你是阮心中ê孝子，所以你m̄是故意án-ne少年就离开阮到天堂去。当时tī你身边ê人kā阮讲，你tī病重、已经衰弱、讲话mā困难之时却iáu强装有气力，快乐á大声地kap妈妈讲国际电话。讲完时你全身冷汗，随时就躺落去了。你最后tio̍h离开世间ê时chūn，iáu-beh安慰妈妈，hō͘妈妈放心，你讲：「我真好，妈妈!您mài烦恼」。

阮深知天父召你tńg去是爱惜你，boài你在地上过tī劳苦。 你做事全力以赴，争取时间，办事迅速，连食饭mā匆匆，这是chit-pái疾病ê起因。

天父ê旨意是bōe-sái违背ê，m̄-koh父母ê心是án-ne软弱m̄甘你离去，ta̍k工想beh看你，呼叫你ê名字，尤其重感情ê你母亲流目屎啼哭，你tī天顶ê灵一定看tio̍h听tio̍h了pah!

你小时候常讲，将来长大了boeh盖一座楼房hō͘阮tòa，最近你ê愿望果然实现，可惜你kap阮只tòa了两工就回台北，chit-ê离别，就永远看未到你了。

虽然阮心里真甘苦，兄弟姐妹mā仝款流目屎，但是咱有信仰，相信将来tī天堂会koh再相见。阮感谢上帝hō͘你一生有坚定ê信仰和美好ê行为，以及现在tī天国ê福气，阮以此得安慰。阮二人年纪大了，无久会tī天家kap你相会。 ―爸爸ê心声

我ê kiáⁿ儿贤民ah―妈思念你、想tio̍h你hiah-ni̍h乖，hiah-ni̍h孝顺，就流目屎，妈爱你，ài-beh看你，boeh kap你讲话，妈妈boeh叫你，阿贤，阿贤，但已经bōe-sái了，无机会了!25日hit工，妈妈ê心突然剧痛一阵，了后来chiah知影那to̍h是你行ê时刻，妈妈叫了「阿贤，阿贤」一百gōa次!

愿你tī天堂无挂虑、无烦恼、kap天父tòa作伙永远快乐。
－妈妈ê心声
一九九二年三月二六日寄自美国

四、伊ê追思礼拜
Tùi伊ê追思礼拜中。阮看tio̍h伊佳美ê脚踪遍行各地方，伊真诚恳ê爱心hō͘人感念无停。

贤民是tī三月二十五日暗时荣归主怀，四月五日下晡tī东门教会举行追思礼拜。参加者坐满教会楼顶楼脚每一角落。有tùi美国tńg来ê亲友，tùi关山来ê牧师kap亲友，台中惠明盲校mā有师生二十gōa人特别乘专车前来。

Chit几年，伊花真chē心血。投入koh再帮助残障ê事工上，除了帮助伊甸残障基金会，惠明盲校外，伊mā tī马偕病院设立唇颚裂基金，hō͘无钱动手术者thang免费接受治疗(当初无全民健保)。伊往生前一年，tú好罗慧夫颅颜基金会成全，伊将剪报khǹg tī皮夹内，注明基金会ê地址、电话，正计划如何献上心力。无想tio̍h第二年却蒙主恩召了，伊这心愿，其妻丽宇已代为完成。

贤民m̄-nā爱残障朋友，对教会牧者尤其关怀。追思礼拜这天，多位牧师上台见证贤民爱传道人ê种种实际行动:「胡长老常常到牧师馆来看看有什么缺乏无¨为牧师装冷气、装电话、tī牧师办公室添购siōng好ê册橱¨」「伊m̄-nā一pái tī司会时呼吁信徒tio̍h爱传道人、同心关怀圣工¨．」「伊是难得chhōe见ê好人¨」「伊是一位天使，上帝差来协助咱ê天使¨」in流目屎怀念，台顶台下，无论老少lóng流目屎受tio̍h激励，敬佩伊那美好ê生命。

最后郑兴让牧师讲:胡长老虽然kan-ta有四十岁，生命虽短，内容却丰富，结果累累，远超过一般八十岁老人所做ê。所以主讲：「有够，你为我所做ê已经太够额了，快来享受你主人ê福分pah!」虽然阮真m̄-kam，但是阮只ē-tàng讲:「无m̄-tio̍h，上帝ê美意本是án-ne!」

贤民tī自传第一行写tio̍h：
「有kóa人，in ê生命如落叶，tòe风漂荡不定，无一定ê方向，但是有kóa人，in ê生命却如晨星，有伊固定ê轨迹」~赫塞「流浪者之歌」。 ~座右铭、自勉之~

的确，贤民ê生命是有一定ê方向，如晨星，有伊固定ê轨迹。四十岁，是伊回天家ê年岁，奇妙ê是伊早就知影，早就teh做准备。阮mā求主保守阮，忠心走尽当走ê路，完成主所托付ê圣工，阿们。