《胡文池牧师kap布农族》

 | | | 转寄

奇特ê交换结婚

作者 胡文池 2009.09.20

婚姻制度，依照国土ê差别，时代ê变迁，各有真大ê差异。

野蛮人bat有夺婚ê时代，昔时台湾ê布农族虽然m̄-bat发生chit款tāi-chì，但却维特了真长一段时间ê「交换结婚」制度。Chit种制度in感觉十分公平、合理。

日人辖制时代ê高山族，完全kap平地隔绝，in对金钱kap物资ê价值非常雾雾无清。In所需ê日用品lóng是tī官方所设ê交换所，用in ê山产，交换得来ê。

人非物品，但是布农族男子boeh娶太太，mā是依照习惯上ê方式交换á得。

譬如，有一个男人，看上一位小姐，男方家必须也tio̍h交出一位小姐或小女孩到女方家，来交换这男人所beh娶ê妻。如果chit-ê男子厝里全无女子thang交换新娘ê话， án-ne男方必须付出真大ê代价(mā等于现今ê聘金)送hō͘女方。所送之礼，必须顺从女方父母ê要求，有牛只、猪、羊、刀、枪、鼎、锄头¨¨等，mā就是讲，女方厝里所需要ê牲畜、农具，lóng寄望tī自家小姐身上。

一、老妻少夫
布农族家庭，对tī boeh结婚ê男女双方ê年龄不注重。因为男方娶新娘所交换来ê女子，有ê是五、六岁ê女童，必须等待伊成年chiah ē-tàng kap厝内ê男子结婚(有点á类似童养媳)，这男子有可能等待伊成长，已过了中年。

Mā有一种情形是，女子已过了二、三十岁，因家己ê兄弟结婚á被交换到别家，á chit间偏偏只有年轻ê小男孩，án-ne夫妻ê年龄实在悬殊。

我就认bat chit种ê一对夫妇。

有一次，我到崁顶山地教会设立长老执事，礼拜了后，该堂ê宣道师chhōa我前往探访会友。

到了新任执事，名叫苏巴利(sobali)ê厝时，我看见一位老妇人tī厝。

我对伊讲：「恭禧您!您ê gín-á当选了执事，伊iáu无tńg到厝mah?」

苏巴利身裁矮小，患有痨伤病，看起来未到三十岁。Chit-ê妇人看起来至少mā有五、六十岁了。

无想tio̍h，伊听了我ê问话了后，随时讲：「伊m̄是我ê gín-á，是我丈夫。」

伊ê话，hō͘我面红，尴尬万分。

后来，宣道师chiah-tio̍h我讲，in是交换结婚换来ê，所以年龄相差二十gōa岁。In ê年龄虽然不相配，夫妇煞十分合好，相敬如宾，老妻爱护少夫，tú亲像爱小弟仝款无微不到。因为二人lóng热心事奉主。

二、丑女m̄惊嫁不出
任何时代，所有ê民族，美丽ê女人lóng是人人择偶ê目标。但是对tī布农族来讲，美女对in无什么影响力，á勤劳、ē-tàng作稼ê女人，chiah是男子择偶ê标准。

因为旧时，大部分ê布农族人，平时lóng是好酒、怠惰，时常上山phah猎游荡，拥有大男人主义ê作风。家事kap农事lóng交hō͘女人去做，为tio̍h事实上ê需要，chiah boeh娶健康、勤劳ê女人。

In无婚姻绍介ê媒人婆。如果一个男子看中一位小姐，家长就beh托ē-tàng言善辩ê人，带酒前往提亲。女方tio̍h召开家族会议来决定chit件亲事，年轻ê gín-á mā有一票之权。

条件谈妥，出嫁hit工，新娘kap娶亲ê人lóng是行路，无车坐。伊依依不舍地离开家一段路程了后，tio̍h故意地回头逃tńg去厝里，这为tio̍h beh表示伊是jōa-ni̍h-á想家，伊m̄是lóng无情意tio̍h离开亲人á出嫁。Chit时男方ê人beh koh再来强制拉行伊。

我tī海端乡龙泉看tio̍h一名孝女，到四十gōa岁iáu无愿意出嫁，愿tī厝陪伴年老ê母亲。一直等到母亲过世了后，伊chiah嫁hō͘一位外省籍退役军人，tùi-án-ni伊mā过tio̍h相当幸福ê生活。

三、交换拮婚ê悲剧
假使一间ê男子不幸往生，伊ê太太tio̍h归回后头厝，án-ne，后头厝hit位chìn前交换来ê女子，就必须tńg去家己ê厝，不管伊已结婚或iáu未婚。Chit件事表面上看起来真公平，其实煞无近人情。

台湾光复了后，民智渐开，男女交际开放，自由恋爱渐风行。

有一pái，tī海端乡山顶，bat发生一对青年男女殉情自杀，双双服饮杀虫剂路腾毒液死亡。原因就是女子ê双亲beh将伊交换结婚，嫁hō͘一位老夫，soah致使bōe-sái kap自已所亲爱ê青年结婚，tùi án-ne双双厌世自杀。

自从原住民多数信主以后，人权提高，「交换结婚」ê惯俗渐渐改善。不过犹原有少数贪财无爱惜家己子女ê人，in要求高额聘金，嫁到平地hō͘ m̄信主ê人，甚至高价出卖cha-bó͘-kiáⁿ hō͘年老ê退役军人，或是卖hō͘妓女户。实在可怜!