《胡文池牧师kap布农族》

 | | | 转寄

惊人ê大迫害

作者 胡文池 2009.08.09

警察ê任务是「安良除暴」，是「人民ê保母」，这m̄-nā是口号，的确，绝大多数ê警员尽忠职守，为人民所敬佩。但是，煞mā有害群之马，m̄-nā不尽义务，反而成为魔鬼之辈。

我也bat认bat一位狠毒、憎恨人民、设计陷害人民ê警察，伊捏造事实，以可恶ê叛乱罪来迫害山地无辜良善ê基督徒。叛乱罪是会hō͘判死刑ê。若m̄是上主ê保护．我全家以及真chē布农族信徒，必定遭受tio̍h惊人ê灾祸，脱离不了严重刑罚，后果就不堪设想。

「凡立志tòe基督耶稣，过敬虔生活ê人、lóng会受迫害。」 (提摩太后书三：12)

一、讨厌教会ê警员
M̄知何故，警员余保堂真讨厌基督教。伊tī东里，平地派出所任内，有一pái主日来到教会，向当teh做礼拜ê信徒大声讲：「今á日天气chiah-ni̍h好，lín为什么m̄去工作，án-ne lán-si坐tī chia!lín大部份是农民，án-ne会妨害生产。」

教会负责人kap长执真细jī地对伊讲：「今á日是礼拜日，阮是基督徒，理当放落一切ê工，来chia敬拜上帝，而且中华民国ê宪法保障人民宗教自由，你若禁止阮敬拜上帝，就是妨害了阮信仰ê自由。」

伊听了，无thang奈何地离开了。但是以后，伊常常利用礼拜日，召集义务劳动，来阻止真chē信徒做礼拜。

二、好消息变大灾祸
余保堂转任到山地卓乐村时，迫害教会ê心并无改变。伊ê太太所养ê一大群鸭，常常行到山胞ê农田，踏死in所播种ê秧苗。众信徒到教会来抱怨，教会ê长老执事就大胆地行到派出所陈情。Chit件事激起余保堂ê憎念，等待机会boeh报复。

有一工，邮差送来一大堆信件，boeh转送hō͘山胞。因为当时ê信件lóng tio̍h通过派出所转送到山胞手中。

Tī这批信件中，余保堂无意中发现一张由关山玛利亚产院寄出hō͘卓乐教会ê信函。这信件ê内容是通告一项好消息：
1.tī关山boeh开办玛利亚产院，为山胞妇女服务。
2.生产费kap食宿费全免。
3.另外赠送婴儿衣物。

产院是芥菜种会孙理莲女士开办ê，因妇人人是助产士，tī-chia产院负起院长职务，因此发信人是院长胡叶宝玉。

余保堂一看，机会来了，tùi án-ne留落来了chit封信，khǹg入家己衣袋内。暗时伊tī厝里起稿，写了一封假信。伊知影我常去卓乐教会带领in崇拜，因此，以我ê名义发信，tī信中乱批评蒋总统kap国家一大堆坏话，然后讲：「我交hō͘ lín ê「鸭蛋」tio̍h好好á保管，等待我ê指示以后，chiah thang行动¨;」等等话语。

伊将这假信用日文写好，然后交hō͘伊tī高中读册，m̄-bat日文ê侄儿重新抄写tī信纸上，然后kā真信件the̍h掉，换了chit封假信入玛利亚产院ê信封内。

次日，待山胞们上山工作了后，伊偷偷进入山胞ê房屋，秘密地将二个手榴弹kap一kóa子弹分散khǹg tī宣道师kap长老ê衣柜内。

约下晡四点，伊the̍h了chit封伪造ê信，khǹg tī小学生放学必经ê马路上，故意制造「某人遗失」ê景况，伺机行事。果然无久，一位小学生捡了起来。余保堂马上行近讲：「喂!小朋友，你捡到了什么?来!交乎派出所。」

伊一本正经ê按照规律，登记了捡到者ê姓名kap地址。然后对其他警员讲：「chit封信大概有问题，咱需要扣查。」in随时拆阅，「不得了，这是一封反政府ê信，信上iáu提起暗语「鸭蛋」，咱到in-tau去搜查pah!」

Tùi án-ne余保堂带了二、三人，到宣道师kap长老ê厝中，chit时已经是beh暗á，in lóng由耕地tńg来到了厝内。经过一阵东翻西chhōe，chhōe出了余保堂所预藏ê子弹。Tùi án-ne宣道师kap长执等共五、六人随时被捕，in实在莫名其妙，mā m̄知厝内án怎讲会有子弹kap手榴弹。

Tī派出所内底，in被经过长时间ê审问，余保堂硬叫in承认伊事先准备好ê笔录，笔录ê内容是：「胡文池牧师tī一九五九年十二月二十三日带长子，用皮包the̍h子弹kap手榴弹hō͘阮，ài阮thèng候时机造反¨¨等。」

In不承认，因为这根本m̄是事实，因此in开始遭遇tio̍h一连串ê毒phah，chit时已经是宁静ê半暝，in被毒phah所发出ê哭叫声，惊醒了当地居民，hō͘真chē无助ê居民感觉心痛流目屎。

一九六0年四月二十八日，玉里分局接tio̍h余保堂ê报告，认为这是关于国家大事，即时派来多名刑警到卓乐村，封锁kui-ê村子，并将宣教师kap chiah-ê长执带到玉里分局审问，tī玉里koh一pái受tio̍h毒phah、灌水、倒挂、针刺指甲缝¨¨等各种刑求，有ê忍受不了痛楚，只好承认笔录ê伪罪状。

四月二十九日，玉里刑警the̍h了那封伪造信件－造反ê重要证据，偕同关山ê刑警，邻里长来到了关山我家。当时妇人人kap众细kiáⁿ lóng tī家。

刑警问明信封上ê字迹是长子宏仁写ê。但当in抽出内文，是二、三张ê日文信，妇人人解释讲，内文m̄-tio̍h，实际ê内文只是一封「孙理莲女士ài tī关山开设玛利亚产院」ê通知，是中文ê油印信，因为总共发出五、六十封hō͘各山地村教会，由长子kap众细kiáⁿ帮忙写phe、贴邮票…。刑警真细jī地讲：「信封既然是令公子ê字迹，阮必须带伊到分局一chōa，真紧就ē-tàng送伊tńg来。」

阮完全m̄知影发生了什么tāi-chì，mā m̄知日文信ê内容。Hit暗长子无tńg来，koh来了kúi-nā位刑警，tī我家大搜查，但得bē-tio̍h任何证物，只好带走一kóa无关要紧ê信件kap长子tī大学读册ê几本杂记。Chit时阮chiah感觉tāi-chì ê严重性，而且得悉长子已被带到玉里分局收押了。

三、及时ê帮助
余保堂为tio̍h bò ài hō͘事件扩大á揭发出伊ê阴谋，伊封锁了卓乐村ê出入口，m̄-chún村民落山，伊建议玉里分局快速执行chiah-ê叛乱人犯。

但是伊万万无料想tio̍h「上帝ê眼目遍察全地」

有一位卓乐村民连夜爬过了后山，到邻村，kā chit件不幸ê消息kā高荣顺牧师讲，高牧师马上赶到玉里宣教师鲍德理牧师hia，转达了chit件事。鲍牧师知影tāi-chì ê严重性，随时派伊太太坐hit工ê飞机到台北，报告长老会总会。

当时ê山地干事卓信得牧师，以前是玉里ê牧师，伊知影余保堂常常chhōe教会ê麻烦，直觉感觉chit项事是余警员所做ê阴谋，向政府写了一封陈情册。另外一位宣教师海佯登牧师mā将chit项事向tī警备总部ê朋友报告。因此tāi-chì发生ê第三工，警总就直接派人到玉里办案。

经in详细调查ê结果：
一九五九年十一月十三日出境到美国留学。
一九五九年十二月二十三日(笔录上ê日期)当teh部队受训，无外出。
一个tī美国，一个tī军中，知笔录有问题。

警总派来ê刑警对长子kap卓乐教会hō͘抓ê人表明身份，请in坦白供出实情，终其尾调查出这lóng是余保堂所设计ê阴谋。

乌云已散，真相大白，余保堂无法度thang赖，伏首认罪，被法院用利用职权，伪造文册等罪状，判刑十五年。

感谢神ê带领，hō͘刑警办案迅速，长子kap其他被冤枉ê人犯tī一礼拜内lóng被释放tńg来。

Chit件事解决了后，花莲县警察局长bat亲自来到关山我家道歉，并赠送一点礼品。

「耶和华ê眼目看顾敬畏伊ê人kap仰望伊慈爱ê人，boeh救in ê命逃离死亡。」(诗篇三十三：18)

「主讲：申冤tī我，我必报应。」(罗马册十二：19)

四、卓乐事件hō͘教会kap旺
一九六0年四月卓乐教会ê信徒张品国、张国兴、沈金福、高则通¨¨等人，经过被毒phah、灌水、刑求了后，关tī玉里分局铁窗内一礼拜。其余ê信徒，以及附近布农族各教会ê信徒lóng聚集，每日无停ê为受难ê兄弟祈祷，请求上帝赐in力量，坚定信仰。

虽然chit件不幸ê事发生了，但in无因外来ê迫害失去对上帝ê信心，相反地信徒日益增多，而且计划建造新ê礼拜堂。

经过筹备设计，有钱ê出钱，有力ê出力，终其尾tī一九六二年二月间开始破土，经过八个月，信徒同心协力献钱、献力，艰苦工作，最后终告完工。同年十二月廿二日举行献堂典礼，参加人数约有七百人。

典礼中，真chē人想起chit-pái ê大试炼，禁bē-tiâu流目屎伤感。东部布农区会，为tio̍h安慰奋兴chit-ê受魔鬼伤害ê教会由次年三月五日起派出五名传教师(to̍h是刘传、冯贵兴、高顺荣、黄顺利、张旺)，每晚轮流到该会开培灵会，医治in ê心伤，koh-khah振奋in ê信仰。