《台湾人e5先觉―黄彰辉传》

 | | | 转寄

晚年ê活动

作者 张瑞雄 2009.05.17

１退而不休 tùi 1979年8月退休以后，除lah为神学教育，普世教会联络、交谊、受托出动，mā为台湾人民ê自决kap将来奔走外出以外，黄彰辉lóng是留tī厝内。就是因为伊以前ê同事、学生、朋友普遍散居tī世界各地，lóng想念伊，希望chhōe伊表示尊敬kap关怀。黄彰辉mā算是好客，就容许in到Sussex省Seaford市ê The Bye家去看伊。慰尔师母算是真亲切体贴，以siōng大ê诚意款待少年一辈。所有台湾基督长老教会历届议长kap牧长往欧洲开会tī英格兰停留ia̍h-sī留学生ê人，大概lóng到过in ê『招待所』。黄牧师ang-á-bó͘预备chi̍t-ê房间，内底有一张单人床。餐食无像台湾ia̍h-sī美国仝款ê『排满餐桌ê菜肴』，但是简单ê洋式饭菜，真正表露黄牧师ang-á-bó͘ ê诚意、欢迎。M̄-koh，到过黄牧师厝内ê后辈，thang体会tio̍h in ê日常生活并无宽裕，mā感觉英格兰人ê食物无够丰富，有人感觉比起美国甚至台湾，lóng算是贫困ê，in靠退休金ê生活，算是刻苦ê。莫怪有kóa bat受爱护kap教导ê众学生，lóng tī第二pái访问in ê时chūn，会买一kóa故乡ê好料馈赠in，当做一种加菜。台湾人ê特点，就是bē留意tòa高级ê厝，穿高品质ê衫，但是真关心每工ê餐食，因此，遇到亲人ia̍h-sī朋友，lóng先问：『您食饱bōe？』黄牧师以前ê众学生，lóng抱有恩师晚年无『食ê福』ê印象。Tī偏僻ê异乡，bē-sái买到故乡气味ê食物，koh bē晓调理台湾式ê 手路菜色，所以，互相告知随后到英格兰ê学生好友，chah hō͘黄牧师ang-á-bó͘一kóa台湾故乡好料，以聊表师恩。

请看下面黄牧师ang-á-bó͘晚年居家相片：

下底三张相片是张千惠南神校友tī 1980年到Seaford访问黄彰辉牧师ang-á-bó͘ ê时chūn，tī黄彰辉ang-á-bó͘公馆ê客厅所hip ê相片。

下图是退休了后tī「我家」享受心身放松ê黄彰辉。(孙鸿镇提供)

下图是丈夫终于会得thang长期tòa tī厝内ê慰尔师母。(孙鸿镇提供)
下图是退休后居家ê黄彰辉kap慰尔ang-á-bó͘ ê福照。(张千惠摄，孙鸿镇提供)

慰尔师母tú-hó tī我访问Seaford ê三pái，lóng beh去医院，并且两pái tòa院，暗时无tńg来。有一pái，黄牧师邀请我同齐去巴士站接师母tńg来，tú好我chah tio̍h照相机，我就拍摄in ang-á-bó͘ tī街路牵手行路ê相片，原来年老ê师母是『法定公认ê盲目』，出入无自由，mā无方便。

下图是黄彰辉kap慰尔手牵手tī英格兰ê Seaford街路行路ê相片。（张瑞雄摄）

Seaford是英格兰南端ê chi̍t-ê小镇，人口大约一万六千人，因为靠海，过去bat有chi̍t-ê时期是观光胜地。黄家ê公馆是设tī离海岸无远ê所在，但是因为建立tī距离海面有kóa高度ê『壁岗』上，无海滩，mā无ē-sái接近水边ê建设，án-ne，对黄牧师是chi̍t-ê绝好行路探望自然ê好环境。伊tī自然公园内底租 chi̍t-ê小寮，放一kóa登顶下坡采取自然植物用ê器具，mā有运动用ê衫裤、饮用水等等。天气好ê时chūn，伊就作探勘自然ê『冒险』。

Tī黄家公馆ê后面，有真大ê草埔。黄牧师kā我讲，伊是除杂草ê专家，就示范hō͘我看，伊手the̍h一条下有尖锐扁平ê铁棒，一插入草壤，向边á倒棒，连根ê杂草就hō͘挖出地面，thang轻可除掉弃sak。黄家ê草埔非常táⁿ-le̍k，洁净可爱。可见伊真用心撒水施肥。Tī右墙边有筑一小块田地种花种菜。花圃kap草埔上ê花开ka̍h茂盛鲜艳。

有一pái，黄牧师kap我到街路去散步，ná行ná讲，行过一间礼拜堂，黄牧师指hit间礼拜堂，kā我讲hit间是Seaford市内ê联合归正教会。又koh讲伊退休到Seaford了后，就勤勉参与hit-ê教会ê活动。因为伊丰富ê知识kap经验，会友选伊出来做该教会ê『长老』。我惊一tiô，长老？一旦身为牧师，终其一生不就是牧师嚒？伊讲：『牧师ê职位是退而且休lah，但是我做长老，是现在tú-teh进行ê，我需要活动活动。』看tio̍h伊ê生活态度，kap一生不倦事奉主ê精神，我真正大受感动。现今过了20 gōa年lah，我ê心里iáu存tio̍h he感动ê火焰，照常燃烧不熄。

下图是Seaford联合归正教会ê墙壁顶，框挂教友为黄彰辉kap慰尔刻制ê纪念铜碑。

Tī 1979年热天，因为神学教育辅导会（PTE）ê支援，kap亚洲基督教会协会合办，tī香港开了华人神学研讨会，由道风山kap亚洲基督教协议会主办，参会者有台神、南神、辅大神学部（天主教学者）、在台耶稣会、新加坡三一神学院、香港宗基大学宗教部等等，koh有北美ê台湾教会张瑞雄kap赵聪仁hō͘邀请参加。这一pái ê研讨会，是黄彰辉teh-beh退休时所举行ê。

黄彰辉退休了后，siōng频繁ê来往航空站是伦敦－纽约之间。Tiāⁿ-tiāⁿ tī美国有演讲ê机会，ia̍h-sī有人有私事ài伊帮忙，譬如：结婚礼、募捐，尤其是关于教会kap台湾ê未来相关ê tāi-chì，mā有北美台湾教会协会tiāⁿ-tiāⁿ邀请伊参加。

Tī纽约ê吴来好女士，是黄彰辉tī台南神学院院长ê时代，伊负责tòa校学生生活ê总务，kap协谈ê工作。伊固定侨居ê所在，成做黄彰辉tī纽约ê另外一ê tòa-hioh kap招待所。有时，吴女士kap爱謢教会kap台湾ê有志者，mā乐捐支助伊ê越洋旅费。每pái伊tī纽约暂停ê时，就一定会访问tī纽约kap美国东岸ê台湾人教会。另外，tī芝加哥牧会ê南神校友王再兴，mā热心资助黄彰辉ê访美活动经费。

Tiàm tī纽约ê期间，lóng是魏瑞明做司机，载伊到各地去访问kap办理事务。每一pái tī美国，lóng至少一pái往返纽约kap华府（华盛顿）之间，因为tī纽约有河边街475号（475 Riverside Drive）ê联合基督教会宣教中心。Tī华府有白宫、美国国会（上下院议会），kap蒋政权国民党ê代表处。台湾ê政治活动人士有彭明敏、蔡同荣、陈唐山等，时常kap美国ê国会议员取得连络，mā请in提出拥护、绍介『台湾』ê声明kap议案。

每pái tī北美完成伊ê使命kap事务，到beh tńg去英格兰ê时chūn，由吴来好、魏瑞明kap王爱籣，为黄牧师准备，买各种食品，hō͘伊chah tńg去厝内。

自1975年到1980年期间，m̄知黄彰辉到过旧金山kúi-pái，m̄-koh至少tī 1976年kap 1978年ê两pái，是由笔者负责招待mā做了响导。Tī旧金山ê名胜地，tio̍h者lóng开车载伊去看mā摄了bē少ê相片。

下图是黄彰辉khiā-tī美国旧金山ê金门桥前ê雅姿。（张瑞雄摄）

下图是黄彰辉khiā-tī金门桥上ê雅姿。（张瑞雄摄）

下图是黄彰辉tī旧金山渔船港ê露天海产滩（Fisherman’s Wharf ê Grotto），tam过chiah-ê小食了后所hip。（张瑞雄摄）

下图左是tī旧金山唐人街照相留念；下图正pêng是tī金门公园园内ê五层塔前所hip。（张瑞雄摄）

２最后一pái ê回国 Tùi 1965年卸下台南神学院院长一职，就任tī普世教会协会，到1987年7月，整整22年期间，黄彰辉lóng是徘徊tī台湾之外。因为伊对弟子ê感化kap影响力真大，koh tī国际关系上有真高ê知名度，国民党政权m̄敢下手逮捕伊，但是想各种办法阻止伊为台湾ê将来kap台湾人ê自决运动拓展并且发扬光大。国民党政权所用来惩罚伊ê是kā伊列tī『永不准回国』ê乌名单上。

台湾基督长老教会把握了解严ê机会，tī 1987年春天，开始向中国国民党申请准予黄彰辉回国。佳哉，因为李登辉教授现今会得thang做副总统ê身份(注一)，特别kā伊帮赞，终于离台22年了后，ná亲像眠梦仝款 ê tńg来lah。第一pái伊留英ê时chūn，就是因为第二pái世界大战，伊留tī海外11年；第二pái是因为爱祖国台湾，mā为tio̍h beh台湾人得tio̍h自决，hō͘强迫登上乌名单，归bē-tàng台湾，án-ne，就比第一pái等待了双倍ê时间！真chē朋友、众学生一接tio̍h消息讲，黄彰beh tńg来台湾lah，mā tùi外国赶tńg来，beh听伊关于台湾ê宣教，也tio̍h kap伊一同感恩，称谢黄彰辉为普世ê教会，mā为台湾phah了hiah-ni̍h好ê胜仗。大家lóng真欢喜，mā感觉真沈重ê来见伊，而且一再哀愁ê kā伊讲再会。因为医生已经tī一年前就讲伊患了肺癌，可能kan-tāⁿ有四个月到两年ê存活时间niā-tiā。

7月29-31日，到新竹圣经学院礼堂参加台湾教会宣教研讨会，其主题为『台湾宣教ê契机』。黄彰辉是第二工下晡2:20-2:40为研讨题目：『chit时chit所在宣教神学ê探讨』做引言主讲。因为考量伊ê健康状况，kan-ta请伊讲20分钟。续落来由黄伯和讲『kap本地文化ê关系』，又koh请董芳苑讲『kap其他宗教ê关系』，各为40分钟。黄彰辉演讲ê内容，无记录落来，但是有一篇演讲ê题目是『什么是神学教育』伊用20分钟时间做简单ê说明，由神学教育谈到在台湾、tī世界情况下ê宣教。

以下一系列ê相片，是tī研讨会中所hip ê：

(1) 会中，黄彰辉kap黄伯和用仝一个主题『chit时chit所在宣教神学ê探讨』，发表演讲。黄彰辉『坐tī首排』注意听ê雅姿。（高俊明提供）

(2) tio̍h者（左二）kap台湾自决运动ê功劳者黄彰辉（右三）、黄武东（左三）、林宗义（中）、高俊明（右二）、罗荣光（左一）、赵有源（右一）等，共同摄tī会场。（高俊明提供）

(3) 特别tùi英、美回台赴会ê先辈，tī会场摄影留念。前排tùi tò-pêng分别是：安师母、安慕理牧师、黄师母kap黄武东牧师、黄彰辉牧师、林宗义医师、李丰明等等。（高俊明提供）

8月2日，长中因为这一pái难得ê机会，黄彰辉会得thang返校，并且因为伊，mā来了黄武东、安慕理、林宗义等等，tùi án-ne tī长中聚集了满礼堂ê校友，做了一场感恩礼拜。以下是tī礼拜中所hip ê相片。

下图是tī会中黄彰辉举手祝祷（孙鸿镇提供）。

下图为众杰出长中校友中，前排tùi tò-pêng分别为：高俊明、安师母、安慕理、林宗义、黄彰辉、黄武东、黄师母、赵有源。（孙鸿镇提供）

8月3日，台南神学院特别为黄彰辉kap杰出校友黄武东、杰出教授前副院长安慕理，举行荣誉神学博士学位赠与典礼。黄彰辉以『什么是神学教育』为题所做ê演讲内容：

这可能是最后一pái我有机会公开来讲述我所认为ê神学教育是什么。我ē-tàng tī我所挚爱ê学院hō͘我荣誉博士学位时来讲述这题目，实在感觉真荣幸。

毕生做为chi̍t-ê神学教育者，对神学教育ê问答，我心中有一段使徒保罗ê话来做为总结，chit段话是tī加拉太册四章19节。保罗讲：『众细kiáⁿ！我koh一pái亲像母亲为lín忍受生产ê痛苦，一直到基督ê特性tī lín ê生命中成形。』

任何真确ê神学教育是，mā必需有三层ê『基督ê成形』。神学教育是一件ná亲像母亲beh分娩仝款严重ê tāi-chì，就亲像保罗讲ê『……ná亲像母亲忍受生产ê痛苦，一直到……。』今á日我是tī阮chit间学院对我所挚爱ê神学教育同事tī讲述chit项tāi-chì。

事(tāi)先，我先tùi chhián-hiān ê方面讲起（可能是chhián-hiān ê），神学教育ê目的是牵连tio̍h神学ê成形。伊m̄是kan-tāⁿ teh积聚jú来jú多ê神学知识，我并m̄是看轻chiah-ê知识，却是认为咱mài成做chi̍t-ê kan-ta会学习引用别人知识ê神学家。除了学习kap知识之外，咱必需忍受生产ê痛苦，一直到基督ê心tī每一ê人身上成形。咱ê目的是m̄-nā kā咱家己ê心，mā kā别人ê心成做以基督ê心为心（腓立比册二：5），hō͘每一ê人lóng ē-tàng讲：『现今tī思考ê m̄是我，却是基督tī我内底思考。』

其次，神学教育ê目的是牵连tio̍h服事ê成形，这应该mā是chhián-hiān ê tāi-chì，但是事实上，每pái神学教育tī学识上愈进展，服事ê成形kah-ná就愈hō͘忽略。（有一件tāi-chì我ài tī chia补充ê，就是tī宣教协议会ê时，当有人提议tio̍h chi̍t-ê神职人员tī hō͘任命为神学教育者前，必需先有五年ê实际服事经验，chit-ê提议竟lóng无多议ê就hō͘否决，原因是以巴克礼博士kap我做例子，kah-ná阮chit种tī极不寻常ê情况下ê不寻常例子，是无应该hō͘用来做例子ê。当我tī神学教育基金会工作ê时，有bē少我访问ê神学院，因为有kóa in ê神学教师无够额ê服事成形，致使hō͘学院带来bē少困扰。Á我所谓ê『服事成形』，并无意思是讲kan-ta tī一kóa技术ia̍h-sī技巧上ê获取。仝款ê，我又koh m̄是看轻chiah-ê技术ia̍h-sī技巧，却是除了chiah-ê技术kap技巧之外，咱必需忍受生产ê痛苦，一直到基督ê服事tī每一个人成形，chit-ê服事mā是主家己所讲ê：『我来是beh服事人koh m̄是hō͘人服事』，kap『我tī lín中间亲像chi̍t-ê服事人ê』。咱每一个人lóng ài全心关注服事一直到咱ē-tàng讲：『m̄是我teh做工，tùi án-ne是基督tī我内底做工。』

最后一方面，mā是siōng重要又koh是神学教育者siōng艰困ê工作，chit方面时常hō͘世界上tio̍h有名ê神学院ia̍h-sī大学完全忽略ê，kā伊看做kap in ê教育无相关ê，就是『生命ê成形』，神学教育ê目的必需牵连tio̍h『生命ê成形』。咱必需忍受生产ê痛苦，一直到基督ê生命tī每一ê人身上成形，『一直到咱lóng同归tī……会得thang长大成人，满有基督成长ê身量。』（以弗所四章13节）chit-ê koh痛苦koh欢乐ê期待tio̍h基督ê生命tī咱每一ê人身上成形，tùi án-ne是神学教育siōng重要ê部份。每一ê神学教育者，当伊ia̍h-sī伊ê众学生m̄-nā ē-tàng讲：『基督tī我内底思考』kap『基督tī我内底做工』，而且也ē-tàng kap保罗同齐讲：『m̄是我teh活，tùi án-ne是基督tī我内底活。』时，tùi án-ne是chit位神学教育者siōng光荣欢乐ê时刻。

若是神学教育ē-tàng注意tio̍h这三方面ê成形，nā伊必定会去关心顾tio̍h上帝ê全人ê培养，因为教会ê宣教kap生命必需靠这上帝ê全人来维持。若是神学教育真正ê对『直到』chit-ê字持以认真正态度，『直到』基督ê这三层面tī咱身上成形，nā伊必定会去关注到每一ê基督徒ê kui-ê生命。甚至到像我chit-ê年纪做神学教育者ê我，mā只ē-tàng忠实koh谦卑ê像保罗仝款ê讲：『m̄是讲我已经得tio̍h lah，己经完全lah。我tùi án-ne是尽力追求，hō͘我ē-sái得tio̍h，ia̍h-sī ē-sái得tio̍h基督耶稣所ài我得tio̍h ê。』（腓立比三章12节）――基督tī咱身上成形――。

以下是8月3日tī举行荣誉神学博士学位赠与典礼中所hip ê镜头：

下图为南神院长张德香赠与荣誉神学博士证册hō͘前院长黄彰辉时所hip。（孙鸿镇提供）

下图为颁赠荣誉神学博士学位hō͘黄彰辉时ê观礼会众。（孙鸿镇提供）

下图是黄彰辉tī南神院长公馆内书写勉励校友kap台湾教会ê评语ê风采。（孙鸿镇提供）

为tio̍h这一pái ê访台kap tī台南神学院所受ê荣誉kap欢迎，黄彰辉特别准备了伊ê遗嘱。伊到台湾ê日期是1987年7月28日，m̄-koh伊ê遗嘱是tī 7月21日Seaford签定ê。Tī遗嘱上，伊特别托付交代伊ê长男大卫kap次男麦克（执行kap信托ê代表）beh tùi伊ê遗产中the̍h出2万英磅，交由伦敦市Lavistock联合归正教会世界宣道部会设法为台南神学院创设一项讲座。伊为tio̍h beh真正ê做到赋予南神che chi̍t项纪念性ê贡献，就chah一份遗嘱到台湾，面交hō͘当时ê院长张德香。

Tī长中kap南神无闲ê访问时间过去了后，就tī台南kap台湾南部探访亲人、旧知众朋友，其间，lóng tī神学院院长公馆tòa-hioh。当时ê院长是张德香，是黄彰辉就任院长hit年入学又koh tī 1953年毕业，了后一直留tī南神进行研究kap教学。8月7日，黄彰辉依依不舍ê告别伊幼少年时期ê故乡－台南，坐飞机到台北。

Tī台北ê期间，黄彰辉就tòa-hioh tī另外一位以前ê学生－高俊明ê厝内。伊kap张德香是同班同学，又koh仝年毕业，大部份ê时间服事台湾原住民ê宣教kap传道人神学教育事工。Tùi 1970年，伊当选为台湾基督长老教会总干事，mā tī伊ê任中tī 1980年，因为『藏匿叛乱犯罪』hō͘掠去关，坐狱四年三个月21天，到1984年初秋chiah hō͘释放。（注二）

Tī台北，黄彰辉第一pái看tio̍h tī罗斯福路三段269巷内ê台湾基督长老教会宣教大楼。总干事ê办公室就是tī he大楼内底。

下图是黄彰辉tī高俊明总干事ê办公室内参观，稍事歇困ê情景。（高俊明提供）

听tio̍h黄彰辉tī高俊明ê厝内，新组成无久ê民进党人士，如：尤清、姚嘉文、周清玉，lóng登门拜访chit位台湾民主运动ê先辈。

下图是尤清到高俊明厝内访问黄彰辉时ê留影。尤清（后排右）、张俊雄（后排左）。（高俊明提供）

下图是姚嘉文、周清玉访问黄彰辉ê留影。（高俊明提供）

Tī台北ê有关政治人士为黄彰辉安排机会kap三位『政要』见面会谈，分别是中国国民党秘书长李焕、美国在台协会主任丁大卫，kap siōng重要ê关键人物－当时ê副总统李登辉。

隔了 22年，koh再kap以前从事tī高等教育ê同僚见面。李登辉kap黄彰辉重温故知，气氛融合，一谈就三ê小时。黄彰辉抱怨戒严法去了，soah换来chi̍t-ê国家安全法，一贯ê『换汤无换药』。新法上规定『bē-tàng主张共产主义，kap领土分离』，根本是互相矛盾。李登辉非但是无表示否认，颠倒认为国安法确实是处处矛盾。李登辉表示为tio̍h beh khah紧通过新法，以便解除戒严法，确实欠缺完整。但是若是无赶tī蒋经国生前解除，恐惊至少ài多等8年。李登辉讲，戒严法若无解除，政府就kan-tāⁿ是警备总司令部ê工人nā-tiā，解除戒严，国家ê体质chiah ē-tàng改变过来。（摘录自『美国太平洋时报』）

下图是李登辉kap黄彰辉kap tòe黄彰辉访问副总统李登辉ê一阵人ê合影。Ùi tò-pêng分别为：张清庚、苏庆辉、翁修恭、黄武东、宋泉璋、李登辉、黄彰辉、安师母、安慕理、蔡仁理、赵有源、高俊明。（高俊明提供）

下图是黄彰辉会见李登辉时ê所hip。后排中间是黄彰辉，正pêng是安慕理师母。（高俊明提供）

３最后ê事务回忆kap勉励 Tio̍h者tī kui年前写批hō͘黄大卫（黄彰辉ê长子），请求伊协助又koh提供有关ê家庭相片kap故事，以便分享hō͘以前ê学生、同事kap朋友。大卫tī 1998年4月29日回批，提醒tio̍h者如下ê情况，tio̍h者感觉非常失望。大卫án-ne讲：

有一件关于主张上ê问题，阮老父ê传记有三个主要绳索：一是伊成长时期ê故事、伊ê成长、所受教育等等；二是伊ê工作，kā伊ê宗教kap政治并兼ê立场继续一直到伊做了普世性ê神学教育事工lóng m̄-bat止息；三是tī伊ê《回忆录》内底，部份ia̍h-sī全然ê欠缺关于伊ê家庭有意义ê提示。当然，伊别世以前，短促ê期间内底，bat kap时间斗走，iáu tī完成《回忆录》前辞世，但是另外一方面，伊总是tī危险时刻，慎重而且刻意e5m7 hō͘伊ê家庭卷入伊ê政治生涯。我ê意见是，关于chit项tāi-chì（家庭ê tāi-chì），若伊保持沈默，án-ne，就是伊挑工无beh谈。若准你（tio̍h者）kan-tāⁿ是beh求一kóa相片，又koh以家庭相片做开始讲故事，chit种ê关于家庭ê相片集是iáu teh形成阶段，若将来kā伊传讲出来，mā tio̍h-ài tùi家庭中叙述出来chiah对。………批ê最后，伊又koh加一句：『我希望án-ne讲m̄是过份消极ê回答。』

大卫回到英国受教育ê时期，大约是1955年，hit时伊chiah 11-12岁，1959年，伊母亲慰尔携眷tńg去英国。Tī定居以前，大卫一定是饱tam 了孤单痛苦，kap认同上ê苦闷。Koh tùi 1959年（15岁）到in父亲黄彰辉离开台南回到英国（1965年），伊己经是成年人，所受ê正规教育mā是英格兰式ê lah。笔者真希望得tio̍h有关三子一女ê结緍ê日期、配偶ê姓名，并且每位各拥有囝儿ê人数等等ê消息。

下图是tī Seaford ê老家不时tī离散就业求学ê家庭，有一pái全员到齐时所hip ê。Chit时ê大kiáⁿ儿大卫，己经结婚生查某囝，hō͘黄彰辉ang-á-bó͘有了第一位孙女。前排ùi tò-pêng为：Carol（长妇）、孙女Jane、大卫、麦克；后排ùi tò-pêng为：爱莲、慰尔、安得烈kap黄彰辉。（林黄淑蓁提供）

大卫是一位拥有哲学博士学位ê科学家；其余ê三位弟妹，lóng是学医而且行医，到1988年黄彰辉kap慰尔相继逝世ê时，共有五位内外孙á。

当黄彰辉大约tī 1985年到旧金山地区访问ê时，阮bat同齐上一小坡路，hit时伊就有呼吸困难，我chhòng-kéng ê关心讲：『您无koh像以前脚球运动选手lah！』伊讲：『瑞雄ah，我老ah！』我问伊：『是什么款ê病症？』伊讲：『查某囝爱莲chhōa我去海军医院检查。伊指我ê heng-khám讲，问题tī-hia ê。』续落来伊讲：『我kap爱莲进入病院，卫兵lóng为伊端枪敬礼。我chiah知影，原来伊tī军队内有án-ne chi̍t-ê官位。』我会记得kúi-nā-pái kap黄牧师同齐，lóng无koh看tio̍h伊像以前tī台湾ia̍h-sī tī英格兰在职ê时chūn，不时teh食薰。伊以前讲：『食薰hō͘伊冷静，mā hō͘伊有思考ê机会。』大概tùi 1979年伊退休了后，完全戒薰lah。根据笔者ê同学戴忠德牧师到英格兰访问伊ê时chūn，问伊为什么戒薰lah，黄彰辉ê回答是：『tī英格兰ê香烟siuⁿ贵，食bē起lah。Chia m̄是买一包一包，却是贵到只ē-tàng买一支ia̍h-sī kui支ê。』戴忠德忍bē-tiâu感叹，比起台湾tī 70年代以后ê社会kap经济状况，tī英格兰ê生活是有够清贫lah。

下图是黄彰辉ê查某囝爱莲以海军医官身份结婚，父亲黄彰辉证婚ê相片。（兰大弼提供）。

Tiāⁿ-tiāⁿ有以前ê学生去探访，伊若有时间，并且天气容许ê情况，就到户外观光，当然由黄彰辉做导游。有一pái张千惠到Seaford访问，kap黄彰辉ang-á-bó͘交谈，mā tī该市周围ê史迹做郊游观光。张千惠发现黄彰辉有一件『siōng得意ê西装夹克』穿kui十年，iáu珍惜ê用，伊真受感动。这mā正显示黄彰辉一生朴素勤俭，将宝贵ê资源用tī囝仔ê教育上，kap对世界各地教会ê援助。Tī衣、食方面，黄彰辉表示ē-sái khiām，但是tī tòa ê方面，就显得bē-tàng无维修。伊讲，有一pái一chūn大风掠过伊ê厝，括走三片厝顶ê瓦子，伊讲hit一pái ê费用真hō͘伊头壳痛，因为每一片水泥屋瓦，连工资就beh一百gōa英磅。

下图就是有一pái郊游，张千惠摄了伊『siōng得意ê剑桥西装夹克』 (张千惠提供) 。

黄彰辉回到英格兰了后，就传来无好ê消息，讲伊所患ê病是肺癌，而且己经进行到bē-tàng收拾ê地步，医疗人士mā发表讲，伊siōng-ke kan-tāⁿ有两年ê期间ē-sái疗养。身为牧师，而且是牧长ê教育者ê伊，心里有了准备。M̄-koh，伊有三项tāi-chì牵挂tī心内，一是，师母ê身躯无好，目睭mā看bē清楚，时常需要有人tī身边照顾伊；二是，亲属好友lóng认为伊拥有非常宝贵ê一生kap思想、神学，要求伊一定beh写落来。本来是运动选手ê身躯，无想到一经诊断，就hiah-ni̍h脆弱。衰弱ê身躯，koh只chhun两年，所ē-tàng作到ê事务ê时间实在siuⁿ少lah。三是，台湾人ê出头天，就是伊ê信念，beh由台湾人民同齐来决定家己运命kap事工，所ē-tàng达到ê目标，iáu真遥远。伊一感念到chia，就开始用『m̄甘愿』来表达伊ê内心。

1986年开始tī台湾升起了解严ê徵兆，因为hit年蒋经国发表『我是台湾人』。台湾ê『反中国国民党份子』kap半信半疑四散tī世界ê有敢『试火』ê意气ê hiah-ê人，tī仝年，mā就是高俊明自政治狱释放后二年，tī台湾终于破禁组了『民主进步党』。民进党ê组党ê基督教会版，thang讲是台湾基督长老教会ê三声明ê释义化、公开化。因此，台湾基督长老会mā争取机会hō͘ 在外ê自决运动thang kap台湾ê三pái声明相呼应，hō͘世人知影其真意kap基督徒ê见证。『台湾基督长老教会两巨黄』（黄彰辉kap黄武东）（注三）ê回国，成做台湾基督长老教会ê头一项必经行事，tùi án-ne开始商量hō͘列入乌名单ê黄武东申请入境回国这项tāi-chì，进而ē-táng回到台湾，申请黄彰辉回台探访ê tāi-chì mā 随后开始。

会记得可能是tī解严ê消息iáu无传出以前，有一pái，笔者有机会kap黄彰辉作一个相当热情ê议论。我ê假想是：中国国民党明明知影为tio̍h继续统治殖民地台湾ài khah放松，因此，thang向外证明『民主化意图』。中国国民党mā确实知影台湾菁英，完全无受武力训练过ê『革命者』文人，nā-niā外交攻势向世界诉求是弱势ê作风。所以，中国国民党应该ài彻底hō͘ phah倒消灭。黄彰辉ê主张是：虽然，中国国民党会倒，ia̍h-sī hō͘清除，但是in是àn-chóaⁿ倒落去，是真重要ê，因为tio̍h beh顾虑到自决时台湾人bē-tàng hō͘伊压tiâu、拉落去，同齐倒跨。我发觉黄彰辉对政治职位上ê中国国民党台湾人党员抱tio̍h信心。

另外，笔者kap黄彰辉tī议论中，伊提tio̍h一kóa m̄甘愿ê心事： (1) 伊自细汉认同家己m̄是日本人。譬如：小学时chūn hō͘日本gín-á羞骂koh phah羣架一项tāi-chì；tùi日本tńg来台湾船顶，因为讲台湾话小弟明辉 hō͘日本教官无合情理ê惩罚；koh，伊为仝族hō͘以三等国民对付kap待遇抱不平，等等。 (2) 伊留学英格兰时期，以台湾华人ê语言、服装kap文化上表态，处处lóng显示对华人ê认同。 (3) 战争期间，伊无认同日本，但是基于战略上ê需要，koh tī英格兰教授日本语；koh基于政治上ê需要，伊学习满州语；伊尊重以重庆为中心ê抗日战争政府，甚至采信联盟国方面ê『抗战正义ê解释』。 (4) kap中华民国驻英大使馆ê馆员交往，以领取护照回国；比照台湾以外ê地ê华人（外省人）有同等ê尊严。 (5) 户籍方面，中国国民党挑工刁难，以伊ê夫人『无归化』为藉口，m̄标示伊是已婚身份，koh诬称伊未婚生子，刻意中伤伊。 (6) 伊以传统基督教会ê途经，拍拚达成tī台湾建立东海大学，而且接连W.C.C.tī台湾基督长老教会，但是伊soah hō͘列为一般ê『造反分子』(民主化运动ê一员)，koh hō͘抹乌列入『乌名单』，申请出境ê时，以拖延方法无hō͘伊入境证件;koh 在外从事普世基督教会工作时期拒绝伊入境回国。

现今，中国国民党ê全盛时期已经过，甚至其夜幕mā将尽，伊ê脉衰beh窒息lah，soah iáu m̄悔过，无承认家己已经行到末路，iáu一味ê姑息养奸、欺诈哄骗、窜改滥删历史，意图继续吸食台湾人ê心血成果。M̄-nā无hō͘台湾ê人民自决ê机会、正确消息，iáu抹杀新闻自由、垄断媒体，甚至tī为大中国（大统）ê版本粉饰历史kap教育。

就tī二二八残杀事件（1947）当年，虽然黄彰辉ê长中同学蔡爱智专程到香港，劝告伊mài tńg来台湾，因为有可能会受到冤死，但是伊iáu抱tio̍h希望，认为『英明』ê中国国民党领导者会洞知真相，tùi-án-ne彻底悔过，转而施行对台湾有利ê政策。历经40年了后，黄彰辉一再看到中国国民党tī台湾ê一贯技俩，iáu是压迫、欺骗、恐吓、垄断媒体、禁止善良怀乡知识人士入境，伊iáu是以『老父』ê心怀，想各种方法，beh将无仝族群ê台湾人和解合一，建设新ê国家。但是，伊意识到家己ê生命终局将临，七十年终其一生，为争取台湾kap台湾人ê尊严，kap中国人kap世界人类ê和谐ê努力成果，soah无法度看到伊ê实现，伊感觉太m̄甘愿，『呣甘愿』。

1987年，蒋经国总统就开始公布废弃实施近50年ê戒严令。解严其实mā肇因于日日抬头成长ê在野份子，hō͘中国国民党政权恶名为世界历史上siōng久长ê戒严国家，当然挡bē-tiâu民主世界追求名副其实ê潮流。Chit一年，由台湾基督长老教会ê申请又koh得tio̍h李登辉副总统ê特别关照，黄彰辉终于得tio̍h允准而且收tio̍h入境台湾ê许可证件。伊tī台湾ê三ê礼拜内，所做ê tāi-chì kap所讲ê话kap演讲，己经tī前节敍述过。Tī-chia，无koh提有关黄彰辉kap教会ê同仁往访李登辉这项tāi-chì。

访过李副总统了后，黄彰辉mā到中国国民党总部chhōe秘书长李焕讲话。Tī谈话当中，伊坦白正直ê直言，hō͘中国国民党ê代表知影，台湾人所受ê『同胞』待遇是远比日本『异族』ê殖民待遇歹。Tī《回忆录》内底伊记述讲，伊kā李焕讲有关伊tī户籍上kap护照上ê『未婚』记戴，kap后来tī伊ê清白婚姻上中伤伊是『kap外籍女子同居生育囝儿』，挑工ê诽谤kap抹乌，所受ê羞辱。Kā黄彰辉kap其他台湾人tī国外ê活动hō͘ in红帽仔ê报导kap乌名单等挑工扭曲事实，kap无『民主』ê管制，kap假新闻演戏性ê捕风捉影等tāi-chì作体验ê讲述。一方面中国国民党允准世界级ê台湾人进到台湾来，但是另外一方面中国国民党慎重ê考量，是m̄是通过hiah-ê人物hō͘中国国民党政权开开公关ê门求其影像ê光亮。到1987年为止，中国国民党政权lóng iáu无一丝á诚意接纳tī世界舞台顶公开活动ê人士来参与改善『国政』。

1987年8月，tī台湾，黄彰辉mā得tio̍h机会kap在台协会ê主任丁大卫相见koh晤谈，同行ê人有黄武东、林宗义kap高俊明。Tī派驻台湾代表美国以前，丁大卫是国务院内ê官员。自美丽岛事件了后，高俊明hō͘掠去ê时，黄彰辉去华盛顿chhōe丁大卫，寻求解救办法。当时，丁大卫安慰黄彰辉讲：『时间khiā-tī lín chit边。（Time Is On Your Side.）』这一pái，in tī台湾koh见面，畅谈及前所听闻ê秘密，伊讲范鍚任美国国务卿ê时，伊随范鍚到中国访问，范鍚tī会见邓小平ê时，出人意外ê问邓小平：『阮kam ē-sái得tio̍h lín ê允准，tī台湾设领事馆？』。所以，tùi美国kap中国国民党政权断交了后，黄彰辉认为chin-má ê时间就变成对台湾非常不利。因为tī联合国决定kā『中华民国』一席由『中华人民共和国』取代以前，美国就有意beh支持以『台湾国』ê名义加入联合国，mā支持成立chi̍t-ê中国kap chi̍t-ê台湾ê构想。国家ê方向kap定位权，无tī-teh人民，反tī独裁暴力者ê手头，chit点，mā是伊tī别世以前，『呣甘愿』台湾人民iáu teh政权门外，又koh承受kap世界断交ê恶政后果。

1988年，蒋经国别世了后，李登辉－chi̍t-ê台湾人做总统ê机会终于到lah。黄彰辉ê健康渐渐走下坡。Tī纽约，美国kap海外ê台湾人邀请黄彰辉做最后一pái ê纽约行，又koh tī 3月20日，tī纽约ê台湾会馆召开盛大ê欢迎会。总共有200 gōa位台湾同乡出席，餐宴中席开25桌，thang讲空前盛况，hō͘长居英国伦敦ê黄彰辉感觉到国宝级人物ê光荣kap谢忱。

Tùi 4月到10月ê 6个月中，黄彰辉真正留tī厝内，写出伊回忆kap怀念，正如大卫－伊ê长子讲，每工lóng tī kap时间斗走。虽然伊无koh旅行，soah iáu亲像khah早仝款接待自远方来访ê宾客。真悲伤ê就是相依为命ê老伴慰尔，健康m̄-nā比伊差，iáu几近全盲。

10月初ê秋天，tī洛杉矶ê南加州台湾人联合基金会接获黄彰辉病情恶化ê消息了后，hiah-ê人koh-khah关切伊垂危ê生命。Tùi án-ne由林哲雄、苏国雄、王鹏勲等人负责筹款，mā催促《民进周刊》tī洛杉矶ê特派员胡忠信前往英国，直接访问黄彰辉，又koh收集第一手资料。伊tī成行chìn-chêng，彭明敏kap许信良lóng分别为胡忠信饯行，请伊代为请安。黄彰辉bat照射钴60，以防癌细胞扩散，但是身躯ê造血机能因为án-ne hō͘破坏，嗽ê时不时出现血丝。据胡忠信ê报告：『来到英伦以后，黄彰辉事实上已经kan-tāⁿ是尚存一息，tī无影响伊ê病况之下，我以问答ê方式，做密集式ê录音访问。因为黄彰辉随时会吐血，我一工kan-ta ē-tàng做三、四点钟ê访问；tī伊歇困ê时chūn，我除了翻读伊ê档案资料以外，就到附近ê历史古迹寻幽访胜。』（注四）tùi án-ne胡忠信录制了八卷口述回忆录音带。

除了直接ê家族以外，见到黄彰辉最后一面ê，就是伊任南神院长时ê前学生高俊明ê夫人高李丽珍kap kap黄彰辉仝年tī彰化出世ê兰大弼医师。10月25日暗时，高李丽珍tùi普世归正教会联盟（W.C.C.）执行委员会ê会址北爱尔兰，飞到伦敦，赶往兰大弼ê厝tòa-hioh一暗，10月26日，由兰大弼开车到Seaford，到病院去看黄彰辉。以下ê文章是自高李丽珍tī《台湾教会公报》第1915期（1988年11月13日）刊载ê＜最后一面＞文章中摘录落来ê，koh tī下面ê相片是当日（10月26日），由兰大弼hip ê『kap黄彰辉ê最后一照』。当时tú好输血liáu，hō͘伊ê气色kap神情好khah chē。（兰大弼提供）

下图为黄彰辉ê最后一照。当时tú好输血liáu，hō͘伊ê气色kap神情好khah chē。（兰大弼提供）

高李丽珍án-ne讲：（《教会公报》第1915期）
黄牧师倒tī眠床顶真欢喜ê接待阮。伊瘦真chē，面色mā真苍白，但是伊soah惦念tī厝内ê bó͘，伊kā阮讲这一chūn-á师母真虚弱，真需要伊ê照顾，但是伊soah tòa进病院，无法度tī厝好好- -á照顾伊，实在遗憾，但是医生kap众细kiáⁿ lóng kā伊讲输血了后会好一点，伊家己mā希望输血了后会khah有元气。伊讲因为电疗ê后遗症，血管khah脆弱，嗽ê时会因为血管破裂吐血，伊ê身躯虽然真虚弱，但是精神iáu-kú真好，竟然kap阮讲了两点钟半，阮惊伊讲siuⁿ-chē话对身躯无好，医生soah讲hō͘伊讲无关系。伊讲了真chē有关台湾教会、台湾前途kap外子（高俊明）退休ê tāi-chì等等。

伊希望咱ê教会应当时常研读过去所发表ê三个声明，又koh好好教育会友，hō͘会友清楚明了这三项声明ê意义。关于台湾ê前途，chin-má ta̍k-ke对统一kap独立lóng m̄真明了，伊希望当局ē-tàng许可hō͘主张统一kap主张独立ê人有koh-khah chē对话ê机会，并且kā应该如何统一ia̍h-sī应该如何独立ê方法kap统、独了后有siáⁿ-mi̍h利弊列出来，hō͘ ta̍k-ke同齐来看、同齐来思考、同齐来讨论，然后koh再由全民投票做决定，mài bē记得台湾ê前途应该由台湾全体居民（凡认同台湾ê人，无论台湾人、外省人、平地人ia̍h-sī原住民）来做决定，这是阮提出声明ê原则。

伊一直想beh继续koh谈落去，但是时间已经bē早，阮mā惊伊siuⁿ thiám，所以六点钟左右阮向伊告辞，辞别以前，伊特别交待我向(林)文珍姐、(张)千惠姐、翁(修恭)牧师、杨(启寿)议长、黄武东牧师、外子kap台湾ê兄姐请安。

离开病院了后，阮前往黄牧师ê tòa所去拜访师母，伊知影阮beh去，早就tī客厅等阮，伊mā真瘦，伊讲伊ê背部已经无jōa疼痛，但是身躯犹原真虚弱，佳哉有小kiáⁿ儿安得烈（伊是一位小儿科医生，已经有两个kiáⁿ儿）tī厝陪伊，暗时查某囝爱丽丝会来换班，有时众细kiáⁿ bē-sái tńg来就请特别护士来照顾伊。Kap in谈了将近一点钟便依依不舍kap in辞别，心中祈求上帝怜悯，减轻敬爱ê黄牧师kap师母ê痛苦。

但是，伊soah hiah-ni̍h紧ê走ah，投入天父慈爱ê怀抱。安息pah！敬爱ê黄牧师！伊必定记念您为伊所做ê一切工作，您为咱所付出ê心血mā绝对bē落空，阮会tòe您所留落来ê佳美脚踪勇敢ê继续行落去!!……耳孔边不禁koh响起伊he激动ê感叹：『想tio̍h台湾ê tāi-chì，我ê心就痛，真想beh为台湾多做一kóa tāi-chì，但是……ah！……chin-má应该换lín来做lah……。』

根据高李丽珍ê报告，伊是tī 27日暗时搭机离开伦敦，回到台湾桃园机场是28日暗时9点gōa，伊ê女儿kap kiáⁿ婿到机场去接高李丽珍，见到伊ê第一句话是：『黄彰辉牧师过身lah！』伊讲：『m̄是！无可能ê！我实在无法度相信。前日我去拜访伊ê时，伊虽然倒tī病床中输血，但是精神iáu真好，而且kā我讲了真chē ê话……nà会chiah-ni̍h紧neh？……nà会neh？』（《台湾教会公报》第1915期）

注一：蒋经国当第六届总统时选李登辉为副总统，一直到伊tī 1988年1月13日死亡，李登辉就任为第七届总统。 注二：高俊明《十字架ê路》p.383 注三：两巨黄，bat同齐做台湾基督长老教会总会议长kap总干事、台南新楼ê隣居，同为W.C.C.ê会员教会，争取会员地位，mā同为设立东海大学奔走，而且为台湾人自决运动同发动kap领导。 注四：《民进周刊》第89期，p.40。