《台语kah魔术》

 | | | 转寄

情--字这条路~小说

作者 苏晏德 2022.02.06

情--字这条路 作者：苏晏德

情--字这条路，跤步若错误，人生诚歹渡，需要靠天助。爱情欲坚固，互
相爱让步，心内若有苦，毋通行迷途。

这是沉年ê往事，不堪回想ê过去；1977年中秋西门吹雪和18个朋友来到云
海月湖，Kah西门同行ê朋友号称大鹏十三鹰，阁有南海五仙姑；其中一个
是南海有名人物~雪花孤独，伊虽罔将近四十，m̄-koh犹原犹未订终身。斯
当时西门kah伊ê同伴才二十顶下，雪花是为着beh保护其他姑娘，才来参加
这摆ê聚会。有关雪花孤独ê故事省略，故事中ê主角是西门吹雪。

西门伫江湖原本是无名小卒，因为外缘好对异性有吸引，致使tī这摆ê聚会
一孔掠双，大鹏十三鹰只好争夺其他三个姑娘。西门虽罔外缘好，m̄-koh伫
感情这方面并无经验，心中真gông-ngia̍h，所以主动放弃千里红线这位姑
娘，kah另外一个姑娘沧海铃声交往，hō͘十三鹰ê独孤飞鹰有机会kah千里红
线结缘。Tī云海月湖结束聚会ê行程，归途当中各路朋友互相saⁿ辞，这时
西门和沧海双双对对，谈天说地，天文地理交换两人ê心思意念。

西门kah沧海离开云海月湖，来到翠屏山庄，两人真ha̍h-kâⁿ沿路有讲有
笑。虽罔诚投缘，m̄-koh彼此拢是头一回，心内踌躇有讲bē出喙ê话语，西
门思考一tiap仔久，终于提出勇气讲：「沧海姑娘，你ê手kám会当借--
我？」轻轻ê话语一出，沧海心内gông-ngia̍h，面容透红匀匀仔伸出幼软ê
手，kah西门手牵手行tī挨挨阵阵ê翠屏山庄，然kî后in两人阁去杏花楼情
话绵绵。

西门和沧海一见钟情，双人坠入爱ê水漩(chn̄g)，m̄-koh世事无常，人讲：
近水得鱼，西门kah沧海无法时刻见面，斯当时tī无手机仔ê年代，双方
kan-na会当写批连系，in ê感情终于出现变数。有一回西门一人tī后街行
踏，凑拄坎拄着沧海kah别人手牵手，西门先避开in ê视线，思考一tiap
仔久，翻头kā in两人请安，西门对这件chhiāng-tú-chhiāng发生ê代
志，外表虽罔镇静，内心却是心碎肠(chhiâng)断，规工tī野店借酒解忧
愁，常言道：英雄有泪无轻流，只是未到伤心时。这是西门ê初恋，tī伊ê
人生中重重致命ê一拳。经过这摆ê变故了后，西门更加成熟学会晓包容kah
体谅别人，有一工tī一个恬静ê暗暝，西门tī微弱ê烛光边沉思久久，对心
内微微仔笑，对家己讲：一个失恋ê人赢过无谈恋爱ê人。当然有量ê人是有
福--ê，沧海姑娘和陆小丹结婚了后，沧海阁有去揣西门，沧海对西门讲：
若会使阁重来一摆...，西门kan-na会当安慰伊，人生无可能重来，咱拢无
重新选择ê机会。

经过kúi-nā年西门厌烦浪迹天涯ê生活，伊转去细汉徛起ê故乡~苏家村。因
为时代ê变迁，湮灭真济童年ê记持，草间仔拆掉ah(这是细汉覕相揣ê所
在)，宗祠前ê大埕消失ah，(这是细汉ê游乐场)，一切拢变ah，这时西门心
内哀怨感叹，到底是世间改变人，抑是人改变世间。沉思中西门担头对天
讲：月是故乡圆，水是故乡甜；西门决定留tī伊细汉出世ê土地安居。

经过数年，西门阁熟似一队姊妹花，大姊雪映红、小妹雪映蓝；虽罔in是
亲姊妹，m̄-koh个性完全无仝，大姊映红个性冷淡保守，小妹映蓝个性豪爽
温柔，充满活力，西门竟然选择大姊映红，小妹映蓝嘛愿意帮赞in两人。
M̄-koh有一摆西门和映蓝tī风沙坪开讲ê时，终于讲出伊藏tī心中久久ê话
语，有一件代志我拢想bē通，映蓝讲：大姊冷冷淡淡、个性古怪，你为啥
物一开始着佮意伊？西门经过沉思对映蓝讲：有一寡人佮意一个人需要年久
月深ê斗阵，m̄-koh有时会tī一目nih着会佮意一个人，这种感觉是足奇妙-
-ê，有时无理由嘛无发渡解说，有时感性赢过理性，人虽罔有远大ê志向，
有坚强ê毅力，终期尾情--字这条路犹是真歹过关，感情有时需要取舍需要
牺牲。虽然西门对映蓝讲真济有关人生哲学ê道理，m̄-koh对映蓝ê眼神看会
出--来，伊犹是无了解西门ê选择。

映蓝若像足同情西门，绁接对西门讲：我拢想无、你为啥物hiah-nī佮意大
姊，西门带着柔软ê口气对映蓝讲：你是一个感性ê好查某囡仔，你ê个性温
柔、良善、心思自由开放，你活泼平实ê心境，会hō͘人忍bē牢着会佮意你，
你是hiah-nī自然坦白，佮意你是一件真自然ê代志，这是一种真诚ê佮意。
映红kah你无仝款，伊siuⁿ封闭家己，若有人想beh探讨伊ê世界，伊会发
挥防卫ê本领来阻挡，伊ê外表若像足坚强，m̄-koh内在却有一粒脆弱ê心，
伊无相信感情，有时阁会hō͘感情缠拌。总讲一句：伊真敏感、真脆弱，需
要一个人用心去爱--伊，毫无保留全心全意去了解--伊，人永远袂bē用--ê
单独一人，阁较坚强ê人也无法抵挡孤独ê折磨，若无心灵会枯焦。这时映
蓝想着西门讲chia-ê话，心内teh想：看--来西门真正足想beh保护大姊映
红。

西门看映蓝恬恬无阁讲话，轻轻拍伊ê肩胛讲：我今仔日讲ê话你这马可能
无了解，有一工检采你会明白。sòa接西门对天感慨讲：「人有纵天之志，
无运不能自通，马有千里之行，无蹄不能自往，时也、命也、运也、非我之
所能也」。
无边ê情海，人生ê无奈，感情若无解，伤心流目屎；互相若意爱，幸福阁
和谐，情关无阻碍，人生有光彩。