《台语kah魔术》

 | | | 转寄

春夏秋冬

作者 苏晏德 2019.11.17

春夏秋冬(台语文)
春天风景真正媠 Chhun-thiⁿ hong-kéng chin-chiàⁿ súi
大地ê花拢齐开 Tōa-tē ê hoe lóng chiâu-khui
日头光芒现光辉 Ji̍t-thâu kong-bông hiàn kong-hui
照着田园ê花蕊 Chiò-tio̍h chhân-hn̂g ê hoe-lúi

热天翕热ê天气 Joa̍h-thiⁿ hip-joa̍h ê thiⁿ-khì
予人热甲强欲死 Hō͘ lâng joa̍h kah kiōng beh sí
想欲来去藏水沬 Siūⁿ beh lâi-khì chhàng-chúi-bī
身躯才袂黏黐黐 Sin-khu chiah bē liâm-thi-thi

秋天凄凉ê景致 Chhiu-thiⁿ chhe-liâng ê kéng-tì
落叶一片绁一片 Lo̍h-hio̍h chi̍t-phìⁿ sòa chi̍t-phìⁿ
若像雨水喢喢滴 Ná chhiūⁿ hō͘-chúi chha̍p-chha̍p-tih
秋意予人心伤悲 Chhiu-ì hō͘ lâng sim siong-pi

冬天ê风冷吱吱 Tang-thiⁿ ê hong léng-ki-ki
棉裘长裤爱齐备 Mî-hiû tn̂g-khò͘ ài chiâu-pī
准备围炉好过年 Chún-pī ûi-lô͘ hó kòe-nî
迎接美好ê春天 Ngiâ-chih bí-hó ê chhun-thiⁿ