《台语kah魔术》

 | | | 转寄

彰化台一线游记

作者 苏晏德 2018.02.04

彰化台一线游记

2017年2月初2拜四(咱人正月初六)乌阴天，早时9点出发，今仔日ê目的地是彰化
县ê溪州、田尾、永靖(Ián-chiān)三ê乡，chit三ê行政区是tī彰化县ê南
pêng(俗称彰南)，chit三ê乡是第一摆来，以前bat坐车经过，对chit-ê所在无
特别ê印象，chit摆是因为beh去溪州公园，顺路去永靖(Ián-chiān)听永靖人讲
台语，顺绁来一回深度ê旅游。

第一站：『溪州公园』，kah牵手--ê二人，车chiūⁿ路竹交流道上北，沿国道1号
lo̍h西螺交流道，转台一线经过浊水溪ê桥顶，看对倒手pêng、红色ê铁轿~西螺大
桥，国中毕业旅行有对chia经过，he是43冬前ê代志ah，西螺大桥是我欣慕想beh
去ê所在，真可惜chit摆我无牵tio̍h你ê手。驶过浊水溪着是彰化县，车到溪州加
油站加油，我用台语kah加油员对话门路，查某ê工读生用真liú-lia̍h阁亲切ê台
语kā我回答，我tng面kā伊呵咾鼓励，因为beh讲台语ê少年人愈来愈少ah，尤其
是查某囡仔；鼓励人讲台语是台语人ê责任，chit-ê查某囡仔hoō我留落真深ê印
象。对加油站正oat、驶几百公尺tio̍h8到溪州公园，彰化县溪州乡ê溪州公园，是
全国面积上大ê平地公园，面积有123公顷；溪州公园tī 2004年举办花展博览会，
名声随传遍全国，当时ê名「溪州花博公园」，彰化县政府按照澳洲墨尔本的费兹洛
公园重新规划，2014年改名「费兹洛公园」，tī-chia举办2014花tī彰化活动。
M̄-koh改名出现反对声音，自按呢「还我溪州，无爱仿冒的费兹洛」连署，得
tio̍h相当热烈ê响应，ia̍h有真济民众笑讲「肥猪肉公园」，这马阁改转来溪州
公园。2017年溪州公园ê金鸡花展仝款真chhia-iāⁿ，吸引将近百万人来参观，阮
大约tī-chia停跤三点钟，tī公园大门口、kā一ê阿婆买一粒肉粽kah一块chhì-
kak粿，我ê目的是beh hām老人讲台语，然kî后徙跤离开溪州公园。

第二站：『田尾公路花园』，离开溪州公园、上北沿台一线，经过宝斗、这是
hōo人放拺ê旧地名，这马街路ê地摽拢写北斗，外地人已经袂记得宝斗chit-ê在地
真实ê地名，一府、二鹿、三艋舺、四宝斗，已经钻入时间ê磅空，宝斗已经离咱足
远足长。车liâu-liâu-á驶过chit-ê曾经繁华ê小镇，来到田尾公路花园，车
chhah tī公园边ê停车场，tī公园听tio̍h pa-pu pa-pu ê喝卖声，kā卖冰ê大
哥买一粒芋冰，顺绁探访地方特色，伊讲chia有足济店、会使去lau-lau leh，
足济店？喔！原来是花店；四界行、hām che庄跤所在嘛真闹热，听讲chia是台湾
上大ê花园，规丛好好，四界拢是园艺店，ta̍k所在拢是花花世界，赏花免出国、
来田尾包君满意。Tī散步中途凑抵坎(chhàu-tú-khám)、路nih有一位大姊讲：
今仔日khí-moo su̍t put lí giang，chiâⁿ久无听tio̍h这款亲切ê话语，
我kā伊比赞，台语人爱揣回kiông beh失落ê台语。

第三站：『永靖(Ián-chiān)』，车沿台一线继续上北来到永靖；无讲你m̄
知，我来永靖ê目的是beh chhōe永靖人讲话，听永靖人讲台语；听讲Ián-chiān
ê ki-á-pian lián-lián tiān-tiān，pòaⁿ-mê ke-lōo lián-lián
chhian-chhian (永靖的枝仔冰冷冷碇碇，半暝街路冷冷清清)，『eng』ê音、
讲『ian』，是永靖ê特色。车停tī永靖国小门口，守卫室内面有二ê中年妇女，佮
in破豆大约讲十thóng分；绁接去成美文化园，佮园区的工作人员开讲，虽罔讲甲
真投机，m̄-koh真可惜，济济永靖人已经失去in ê原味，永靖腔khah输我chit-
ê外地人；我问一个二十几岁ê查某囡仔，『行政院』台语按怎讲，伊讲hêng-
chèng院、无讲hiân-chiàn院。台湾各地ê腔口若beh保留，需要提倡罗马字，若
无各地ê腔口会hōo强势腔食掉，终其尾台语会hōo华语消灭，天佑台湾、天佑台湾
各族群语言，台湾人m̄-thang阁困ah。
永靖国小的对面，tio̍h是顶新集团ê成美文化园，来chia参观ê人真济，号做『成
美』是为着beh成人之美，因为毒油事件，顶新魏--家、sòa hōo chit-ê世外桃
源『成美文化园』留lo̍h污点，来chia参观免门票、茶点拢免钱，m̄知是beh回报
乡亲抑是beh赎罪。Chit-ê园区有一条巷管(kóng)，巷管(kóng)是我来chia对
一位大约六十thóng岁ê妇女学--tio̍h ê台语，双面种落羽松(落羽松是树仔
名)，所以形成一条巷管(kóng)，景色kán-na用一字来形容~媠。绁尾车驶到永安
街ê永靖故事墙，这片墙画tio̍h先人ê点点滴滴，kah hōo人怀念ê过去，有二ê
20几岁、对田中来ê查某囡仔嘛来翕相，我kā in讲：怀念过去爱讲台语，kā in
洗脑！讲台语ê好处，我感觉in有听--入去，我阁讲一摆，鼓励人讲台语，是台语
人ê责任。阮tī-chia hip一张相片，然kî后车离开永靖驶到宝斗交流道chiūⁿ高
速公路，踏入回乡ê路途，又阁是美好ê一日，彰化感谢--你。