《台语kah魔术》

 | | | 转寄

0808感谢阿爸

作者 苏晏德 2023.08.06

感谢阿爸(台语文) 苏晏德

八月初八阿爸节
Peh-goe̍h chhe-peh Hū-chhin-cheh
感谢伟大的老爸
Kám-siā úi-tāi ê lāu-pē
辛苦付出为全家
Sin-khoó hù-chhut ūi choân-ke
文武双全逐项会
Bûn-bú siang-choân ta̍k-kang ē

父亲佳节爱感恩
Hū-chhin ka-chiat ài kám-un
囝儿序细着孝顺
Kiáⁿ-jî sī-sè tio̍h hàu-sūn
阿爸是咱的后盾
A-pah sī lán ê āu-tún
牺牲奉献为囝孙
Hi-seng hōng-hiàn ūi kiáⁿ-sun

阿爸亲像一座山
A-pah chhin-chhiūⁿ chi̍t-chō soaⁿ
流出性命的水泉
Lâu-chhut sèⁿ-miā ê chúi-chôaⁿ
爱心温暖阮心肝
Ài-sim un-loán goán sim-koaⁿ
无你生活欲按怎
Bô lí seng-oa̍h beh án-chóaⁿ

阿爸恬恬无出声
A-pah tiām-tiām bô chhut-siaⁿ
拄着风雨拢毋惊
Tú-tio̍h hong-hoō lóng m̄-kiaⁿ
为囝将来一直拚
Ūi kiáⁿ chiong-lâi it-ti̍t piàⁿ
逐工辛苦为细囝
Ta̍k-kang sin-khoó ūi sè-kiáⁿ