《台语kah魔术》

 | | | 转寄

教囡仔写台语诗

作者 苏晏德 2016.03.20

教囡仔写台语诗~经验分享

Tī社会上教台语有20冬ê经验，踏入学校教学生有14冬久，一直到4冬前才想着我若
退休离开学校，我教台语ê历史会留lo̍h啥物记录，是m̄是留lo̍h空白ê记tî；若
按呢敢是真可惜，着因为按呢才开始教囡仔用台语写作；因为写作会当tī台语界ê历
史留lo̍h美好ê见证，透过台语写作hoō学生佮老师留lo̍h永远ê记tî，这是台语
老师ê时代任务。

有人teh讲，教囡仔讲toan-tiah(道地)ê台语已经是无简单ê一件代志，何况beh
写台语诗。天下间无oh-chiâⁿ ê事，看咱是m̄是beh去做；代先我叫囡仔练习写
作ê时，in拢hăⁿ一声，káⁿ-nā袂输爱in ê命。经过我ûn-ûn-á说明，ta̍uh-
tauh-á就有作品一篇一篇浮上台面。我kā囡仔讲，写台语诗爱有诗意、感情抑是趣
味性，tō是讲若无诗意佮感情，上无嘛爱有趣味性。经过我ê分析佮开拆，囡仔沓沓
仔就进入状况。

我kā囡仔讲，写台语诗爱用台语思考，千万m̄-thang用华语思考；台语汉字若袂
晓写、用台语罗马字来写，罗马字若袂晓有对照表通查，若阁袂晓、台语m̄-bat ê
字ē-sái问老师。囡仔若是用华语kā我问，我会讲请你用台语问；譬喻讲：伊若kā
我问『好像』的台语按怎讲、按怎写，我袂kā伊讲，因为伊无用台语思考；伊若问
「亲像」两字ê台语按怎写，我才会写hoō伊了解，因为这ê时阵伊有用台语思考。
教囡仔teh写台语诗ê时，百分之百爱用台语思考，不准用华语来思考，若用华语来
思考无法度写出有诗意、有感情佮趣味ê台语诗。全新ê台语思考方式，m̄-nā
hoō囡仔台语进步，嘛hoō囡仔ê台语听、讲、读、写ê能力拢得着帮赞。

Tī写台语诗ê时，囡仔会用心去思考，伊用台语做中心，这是chit-má ê教育m̄-
bat有ê经验。当然m̄是每一ê囡仔拢有法度完成作品，因为一礼拜才一节台语课；只
要老师用心鼓励、贴心指导，囡仔ê作品就是对老师上好ê回报。Tī写台语诗ê过程
会发觉无仝款ê囡仔，有无仝款ê个性；对in ê作品当中发现无仝款ê囡仔世界，对
囡仔ê台语诗了解伊ê家庭背景，发现伊内心ê点点滴滴。

下面是台语囡仔诗ê题目，hoō逐家做参考：时间、我的家、心情、爸母、Hú仔
kah铅笔、四季、亲人、朋友、个性、教室、日头、体格、山、月娘、上天、云、大
自然、星辰、天公伯仔、花、老师的话、做环保、学校、台语老师、日头花…等。