《台语kah魔术》

 | | | 转寄

总统啥物名？

作者 苏晏德 2014.12.07

苏晏德讲笑诙~~总统啥物名？
阿才读国小ê时功课无好，啥物lóng bē，老师想beh kā加分lóng揣无理由，想
讲问siōng简单ê问题，伊一定ē-tàng加分，老师问阿才：总统啥物名？阿才讲：
我m̄知，老师讲：马英九，过无juā久老师koh问阿才总统啥物名？阿才koh讲：我
m̄知，老师讲：你ná ē koh bē记得leh，阿才讲：我nā超过五分钟tō bē记--
得，老师讲：nā五分钟beh到，你心内tō念马英九，án-ne你tō ē记--起来。
老师开始上课，老师讲：宋朝ê时，岳飞hoō秦桧害--死，chit ê时阵阿明teh
tuh-ku，老师行到阿明ê身边，大声问阿明：岳飞啥人害--死，阿明讲：我无害死
岳飞，老师koh问：岳飞啥人害--死，坐tī后壁ê阿才大声讲：马英九，老师
chhoah-chi̍t-tiô，对阿才讲：你ná ē讲马英九害死岳飞leh，阿才讲：五分钟
到ah，我ài讲马英九，nā无我tō ē bē记leh，老师讲：你hoah tī心内tō好。
老师继续讲：国民党kap共产党tī中国发生内战，国民党hoō共产党赶来台湾，
chit-ê时阵阿明koh teh tuh-ku，老师问阿明：国民党hoō啥人赶来台湾，阿
明讲：我无赶国民党来台湾，老师大声hoah：国民党hoō啥人赶来台湾，坐tī后
壁ê阿才讲：马英九，老师讲：阿才，m̄是马英九是共产党，阿才讲：五分钟ah，
我惊bē记leh，老师讲：念tī心内tō好。
老师继续上课，忽然间有人放屁，老师讲：啥人放屁，阿才讲：马英九，到下课ê
时，老师讲：今仔日啥人扫便所，阿才讲：马英九（因为五分钟到lah），老师kā
马英九三字写tī乌枋，kā阿才讲：明仔载我beh问你总统啥物名？你nā知影，我tō
beh送你礼物，阿才kā马英九三字写tī内裤，阿才tńg--去洗身躯ê时，无换内
裤，第二工上课ê时，阿才lóng teh看内裤，ǹg望老师kín问总统啥物名？m̄-
koh老师lóng无问，第二工tńg--去洗身躯ê时，kāng-khoán无换内裤，阿才in
阿母利用伊teh困ê时，kā阿才ê内裤换来洗，第三工老师有带礼物来，tō问阿才
讲：总统啥物名？阿才开始看伊ê内裤，老师惊一tiô问：为啥物teh看内裤，阿才
讲：总统tī我ê内裤，老师问：总统啥物名？阿才大声讲：总统ê名叫做「小YG」--
----，老师讲：「小YG」是chit条内裤ê牌chú，阿才用坚定ê口气讲：总统ê名叫
做「小YG」绝对无m̄-tio̍h。