《台语kah魔术》

 | | | 转寄

爱ê教育

作者 苏晏德 2013.05.19

爱的教育袂使骂 熏酒槟榔逐项会 骂(mē)
开喙合喙讲恁爸 阁讲老师水准低

爱的教育袂使骂 拢是学生的天下 骂(mā)
交群结党有够峇 闲甲掠虱母相咬

爱的教育袂使扛 机车骑咧乌白撞
男女关系乱乱创 以后变成浮浪逛

爱的教育要求济 全校学生的天地
你若阁再共我骂 假痟共你盖布袋

爱的教育人呵咾 校规学生做参考
老师予囡仔偃倒 凝心转去卖水果

少年教册教到老 囡仔骂我死老猴
学生囡仔若出头 老师家长目屎流

较早老师手若指 学生惊甲若鸟鼠
这马讲伊囡仔庀 伊讲老师你去死

人本要求着毋着 老师爱共囡仔惜
囡仔毋行咱扛轿 恿甲头壳顶放尿

Ài ê kàu-io̍k bē-sái mē、Hun chiú pun-nn̂g ta̍k-hāng ē、
Khui-chhuì ha̍p-chhuì kóng lín pē、Koh kóng lāu-su chuí-chún kē，

Ài ê kàu-io̍k bē-sái mā、Lóng sī ha̍k-seng ê thian-hā、
Kau-kûn kiat-tóng ū kàu bā、Êng kah lia̍h sat-bó sio-kā，

Ài ê kàu-io̍k bē-sái kòng、Ki-chhia khiâ leh o͘-pe̍h lòng、
Lâm-lú koan-hē loān-loān-chhòng、Í-āu piàn-sêng phû-lōng-kòng，

Ài ê kàu-io̍k iau-kiû chē、Choân-hāu ha̍k-seng ê thiⁿ-tē、
Lí nā koh-chài kā goá mē、Ké-siáu kā lí khàm pò͘-tē，

Ài ê kàu-io̍k lâng o-ló、Hāu-kui ha̍k-seng chò chham-khó、
Lāu-su hō͘ gín-á ián-tó、Gêng-sim téng-khì bē chuí-kó，

Siàu-liân kà-chheh kà kàu lāu、Gín-á mē goá sí lāu-kâu、
Ha̍k-seng gín-á nā chhut-thâu、Lāu-su ka-tiúⁿ ba̍k-sái lâu，

Kah-chá lāu-su chhiú nā kí、Ha̍k-seng kiaⁿ kah ná niáu-chhí、
Chit-má kóng i gín-á-phí、I kóng lāu-su lí khì sí，

Jîn-pún iau-kiû tio̍h m̄-tio̍h、Lāu-su ài kah gín-á sioh、
Gín-á m̄-kiâⁿ lán kng-kiō、Sēng kah thâu-khak-téng pàng-jiō。