《草地囝仔做牧师》

 | | | 转寄

《草地囝仔做牧师》林宗要牧师 自序

作者 林宗要 2010.07.04



我生长tī彰化县芳苑乡ê草地，gín-á时，常常有梦想未来ê作为，tī六十gōa年前ê庄脚看tio̍h头戴Helmet帽，身穿西装（寒天是乌色，热天是白色）ê牧师，心中有淡薄á欣羡kap爱慕，但自头到尾无想tio̍h家己ē-tàng做牧师，完全是上主ê恩疼chiah ē-tàng hō͘ chit位平凡ê草地囝á成做牧师。虽然我对主ê呼召并无确切ê时间体验，但tī进入神学院ê时就存感恩ê心，抱tio̍h完全委身ê奉献心态去面对神学教育kap将来ê牧会工作。

1952年神学院毕业ê时，就有kúi-nā位长老代表教会到神学院来，希望我ē-tàng到in ê教会去做传教师，我kā in讲，一切委任传道局ê指派。后来传道局长亲身chhōe我并kā我讲：「传道局已经决定派你到当时由全省TKC（台湾基督长老教会青年团契）所发起ê五角银献金运动所开设ê新屋教会，并讲：「本局认为派你去新屋教会khah适合，mā知影有真chē教会beh来请你去。」

因此tī七月初khāiⁿ二大件行李ùi台北到富冈，koh转坐轻便人力车到新屋去担任首任ê传教师，ùi开拓到独立kap建堂lóng总十四年久。Tī新屋牧会中确实体验tio̍h牧会ê滋味，chit段过程虽然是相当辛苦ê教会生活，soah定定tī艰苦中体会tio̍h喜乐ê感受（我喜乐ê牧会生活，就是tī新屋教会十四年ê牧会生活所建立ê）。因为家己认为相当用心来牧会才hō͘总会指定做理想ê农村示范教会，定定有外国ê朋友来访问新屋教会。

同时kap地方机关（乡公所、农会、学校）mā建立了良好ê实质关系，教会若有特别ê聚会，地方首长lóng会来参加。以青年为中心ê牧会，kā教会增加淡薄á活泼ê气氛，chit时chūn，众长执mā感受tio̍h可能无法度koh再kā牧师留落来ah，因为有真chē教会lóng前来拜访过我，ti71966年，受虎尾教会礼聘担任该教会牧师十一年久，虎尾教会是一间真健全ê教会，组织完善，事工运作坚实而且真活泼，尤其对牧师ê谢礼非常厚（当时教会hō͘我ê谢礼是按总会规定加六成ê谢礼），对传教者ê关爱，ē-tàng做其他教会典范。我tī虎尾ê牧会期间ē-sái用「无后顾之忧ê牧会生活」来形容，三名kiáⁿ儿lóng是tī-chia ê时chūn完成高等教育，koh-khah体会tio̍h主丰盛ê恩典kap祝福。

长子元生大学毕业了后，mā chhōe-tio̍h有淡薄á理想ê工作，因为 án-ne伊建议阮kám ē-tàng考虑牧会khah弱小ê教会，因此就去竹中ê东势教会，认为适合阮当时ê生活，预定tī-chia牧会到退休，但是因为环境ê变化kap师母ê过敏体质，不得不离开牧会已经有五年ê东势教会，tńg来到无话讲牧师娘ê故乡----路上教会，chit间教会是阮丈母出嫁路上ê厝了后chiah成立ê，其成长ê过程有淡薄á艰难，mā定定受tio̍h迫害。二年后因为家庭ê缘故向中会请假三年到台北kap长男元生共同生活（因为伊ê bó͘-kiáⁿ lóng tòa-tī美国）。

洪志芳长老（我ê表小弟）知影阮ê状况，bat向阮提起kám ē-tàng来木栅门诺会帮忙？我讲若负责讲道应该无问题，就因此kap木栅教会结了有淡薄á深厚ê情感。阮ê工作（主要是主日ê讲道）有淡薄á受兄弟姊妹ê认同kap接纳，十五年来（自一九八五年起），阮体会tio̍h比亲情koh-khah可贵ê主内情谊，tī阮ê人生晚境中增加了阮ê身心正面价值ê感受，chit种上主无限ê恩疼，是阮一直tī阮ê生活中不断感谢ê主要原因。

虽然然tī木栅教会阮无法度专任牧师职，m̄-koh tī阮ê心态中阮对木栅教会所表达出来ê 犹原是阮全部ê信仰kap无保留ê心，因此得tio̍h各位兄姊ê肯定kap接纳，对阮所表现出ê敬重kap关怀是阮深深感动ê事实。回想师母tī 1990年七月ê脾脏大手术，阮ê 囝lóng 无tī台湾，m̄-koh姊妹会妥当安排人轮流看顾手术中ê牧师娘，连续三礼拜久，伊对chit种感情一直思念，铭感tī心肝内，ta̍k-pái提起chit件 tāi-chì，伊lóng会感动kah流目屎。虽然阮ê年岁已经koân，过去也bat提出二、三pái请辞，但是lóng无法得tio̍h长执会ê接纳，阮只有将chit件 tāi-chì交hō͘上主，ńg望他ē-tàng为阮安排阮未来ê路，hō͘阮会尽阮应尽ê本分，tī人生ê过程中，荣耀上主是阮全生涯ê努力kap应该做ê人生目标，期待阮ê心愿望主悦纳。