《当上帝开嘴讲台语》

 | | | 转寄

5.3.2.1 阅读测验的成绩比较-2

作者 梁淑慧 2009.06.28

另外，阅读速度ê计算如下：将受访者所记录ê时间换算做秒数，chiah用各题ê总音节数去除各题ê秒数，to̍h是每秒钟平均阅读ê音节数。为着避免实际上看无题目、乌白乱臆答案ê情形，咱kan-taⁿ计算各文字类型中，5题全部回答正确者ê阅读速度。结果如下：

表5.3.2.1b 各种文字ê阅读速度比较（受访者总人数234人）

全汉字人数160（68.4％）全汉字断词人数143（61.1％）
每秒钟平均阅读音节数1.22 每秒钟平均阅读音节数2.3
全罗马字人数53（22.6％）全罗马字断词人数89（38.0％）
每秒钟平均阅读音节数0.85 每秒钟平均阅读音节数1.16
汉罗合用字人数93（39.7％）汉罗合用字断词人数134（57.3％）
每秒钟平均阅读音节数1.65 每秒钟平均阅读音节数2.04


Tùi表5.3.2.1a、b大约thang看出经过「断词」ê文章比「无断词」ê文章koh-khah容易理解，而且阅读速度mā khah紧。以早用「汉字」书写ê中文文章，一向m̄- bat有「断词」ê形式，必须靠读者家己ê语文常识来做判断，致使学生tī tú-chiah开始练习阅读ê时，抵tio̍h真chē理解顶面ê困难。若是教科书kap儿童书刊ê编辑会tàng采用「断词」ê形式，相信对学童ê理解kap阅读速度一定会有帮助。而且「断词」对目前全力推展电脑软体ê「语音辨识」功能ê时，特别有帮助，尤其是台语tī口语表达ê时，会tòe语法意义ê无仝来做丰富ê语音变调，若无藉「断词」ê功能来切分各单位to̍h无法度顺利完成「语音辨识」ê khang-khòe。「白话字」ê设计本来就是以「词」做单位，tī多音节词ê各音节中央用“–”连接，利便读者ê理解kap台语连读变调ê规律，hō͘咱真佩服设计者ê智慧。

Tùi「罗马字」（包括断词、无断词）ê答题人数来看，咱看tio̍h社会上ê「罗马字」普及率相当kē，看m̄-bat罗马字自然mā会影响「汉罗合用字」ê辨读能力。对一般欠缺「罗马字」训练ê人来讲，靠淡薄仔对「英文」ê熟sāi，加减会tàng拼出「汉罗合用字」中ê「罗马字」，而且chiah-ê「罗马字」出现ê所在大部分是tī固定ê「虚词」位置，真容易就看有，这也就是看m̄-bat「罗马字」ê人来看「汉罗合用字」文章会tàng达到beh倚「全汉字」文章ê正确率kap阅读速度ê原因。

另外，tùi表5.3.2.1b各种文字ê阅读速度比较表来看，「汉字」ê阅读速度若像比「罗马字」khah紧，m̄-koh当阮一个一个检查受访者ê资料ê时，lóng总chhōe-tio̍h 28位受访者（占总人数11.97％）tī「罗马字」ê阅读速度上比「汉字」khah紧。Chiah-ê受访者共同ê背景是：阅读「全罗马字」抑是「汉罗合用字」书面语ê频率真koân，有13人是逐天阅读，有10人是一星期阅读2~3摆。可见阅读「罗马字」是会tàng透过训练来增加速度--ê，大多数ê人kan-taⁿ有「汉字」ê阅读经验to̍h掠准「罗马字」读起来khah慢，这是错误ê观念，mā是欠缺公平ê比较。除非整个ê教育制度kap社会资源提供台语「罗马字」有亲像华语「汉字」kāng款ê优势条件，譬如：tùi学龄前开始学认字、小学开始读写；周围有够额ê出版品；社会有认同、肯定；成做法定ê文字；纳入国家考试范围……等等。若无，tī阅读速度ê比较lóng bē-tàng算是客观公正--ê。