《台湾谚语咸酸甜》

 | | | 转寄

一工寒，一工漏，半暝透风吹倒楼

作者 萧平治 2006.08.20

br> 讲起细汉ê故事，使人心情真郁卒， 想beh讲hō͘逐家听，恐惊矣少年--ê会议论， 亲像chit款狗屎干，听听leh是beh创啥？

无讲亦是真艰苦，拜托请lín小忍耐。

四十外冬前，台湾tú好降服后， 日本á转去in兜，国民党tâⁿ-á来到， 万项tng tín 动，向望生活变轻松， 可惜四万换一箍，生活艰难乱chhau-chhau。

食是蕃薯签饭配菜脯，放屎放着chiah大箍， 穿是补了koh再补，beh穿鞋做你免孝孤， tòa --ê竹管厝，壁抹牛屎搅绵hu， 厝顶khàm稻草，有人叫做草厝。

困竹仔眠床，热人真正凉，寒天就hiau-hēng， 脚手冻kah痛，无暖气，用火笼， 草席下底chhu草chhiⁿ，面顶chiah 盖十二斤ê 破棉被， 阿爸、ī -- ā，大兄、二姊，我kap小弟， kheh-kheh做一伙，讲án-ni khah烧烙，实在是不得已。

穿是穿bē烧，困是冷ki-ki， 厝顶若是àu--去，壁缝若是大裂， koh是tn̄g着十二月天，起北风，乌寒兼落雨， 真正有影「一工寒，一工漏，半暝透风吹倒楼」。

少年朋友好佳哉，出世tī chín ê 时代， 食穿富足无烦无恼，m̄知影啥物是悲哀， 奉劝各位少年兄，少年阿姊， 人爱惜福，认真扑拼，认真读册才合理。

【注解】： 1.狗屎干：[陈年往事]。 2.降服：kàng-ho̍k，日本投降。 3.tâⁿ-á来到：[刚刚]来到。 4.tng tín动：[正在变动]。 5.乱chhau-chhau：[乱七八糟]。 6.四万换一箍：大约1950年旧台弊四万箍（元）换新台弊一箍。物资波动真厉害。 7.免孝孤：免想，孝孤本来是讲孝孤魂野鬼，借用做大食，粗鲁食，无情愿hō͘人食ê pháiⁿ听话。 8.tòa--ê：[住的]。 9.绵hu：[棉屑，纸屑]。 10.chhu草chhiⁿ：[垫新鲜的稻草做垫被]。 11.十二斤ê破棉被：古早流行大棉被。 12.ī --ā：阿母。 13. àu--去：[腐坏]。 14.kheh-kheh 做一伙：[挤在一起]。