《台湾谚语咸酸甜》

 | | | 转寄

1-5 初三、四，月眉意；十五、六，月当圆；廿三、四，月暗暝。

作者 萧平治 2011.07.24

教过国小自然科ê 老师，拢有chit 种经验，beh 教hō͘ 学生了解天顶星球运行ê 规则，是一项诚无简单ê 工课，kan-taⁿ 教一下月光月暗ê 变化着好，tī 时看会着月眉仔，tī 时会出半月，tī 时ê 月上圆，台仔顶老师讲kah 喉ta 嘴khoah,学生囡仔犹原大部分「莫宰羊」。

讲--à 莫怪，日头、月娘、地球ê 天体运行，本成着是一种三度空间ê 关联，beh 讲讲bē chhun-chhia,beh kí 阁kí bē 好势，规气用画--ê,愈画愈花，愈画愈看无，连老师都讲kah 雾sà-sà,ah 囡仔beh 哪听有？

Chit-mái ê 教学卡进步，重观察、重实验，所以老师拢会指导学生做长期观察月娘ê 变化，月初ê 月出现tī-toeh ，啥物形--ê ，月中央--leh，ah 月上圆ê 时阵是tī 叨一工？拢爱详细纪录，有影比卡早卡科学。m̄-kú好是好，做khit 来才知无简单，你都知，台湾ê天顶时常都乌chap-chap，日--时beh 看会着日头着无逐工有，向望逐暗beh 天青，免想--ò͘,讲，听无，beh 观察看无月娘，考试beh 按怎？月考总是爱考--a,参考书sa 出来读，测验卷分落去「炼」，暗念、暗记，bē 晓背kah 会晓，管thāi-I 有了解无了解，满分卡要紧，考试100 分，老师gâu教，囡仔gâu读，父母有面子，着是校长、主任kap hit-lō出版社ê 头家，嘛欢喜参咧。

Li-li lo-lo讲chiah 济beh创啥？其实是beh kā恁绍介一句咱祖公留落来ê 智慧：「初三、四，月眉意；十五、六，月当圆；廿三、四，月暗暝。」请你kā 念一遍，阁念一遍，包你一生记tiâu-tiâu,永远bē ka-la̍uh,好听好记阁押韵，真正一兼二顾，bong 蜊仔兼洗裤。

尾仔，阁插一个花仔，你嘛会使得插一句「初七、八，月半圆」tàu 参咧，按呢教囡仔念-- 十分钟，卡嬴读参考书二点钟，敢有影？试看咧你着知。

※注解 (1) tī时：啥么时阵。(2) 喉ta嘴khoah:喉干嘴渴。(3) 莫宰羊：m̄ 知影。(4) bē chhun-chhia:不能透彻了解。(5)kí:指，用手比。(6)tī-toeh:在哪儿。(7)乌chap-chap:乌烟瘴气。(8)sa:拿。(9)背：pōe。(10)管thāi-I:管他的。(11)廿三：jia̍p-saⁿ。(12)记tiâu-tiâu:记得牢牢的。(13)ka-la̍uh:丢失，忘了。(14)bong 蜊仔：摸lah-á。