《BONG报bong2选》

 | | | 转寄

北风koh 来挑战日头

作者 甘露 2009.01.18

顶一pái，北风kap 日头sio 拚，结果北风无kā 路nih ê 人ê 衫褪落来，hō͘日头赢去，伊感觉chiâⁿ m̄甘愿，koh 来chhōe日头挑战。

北风：「日头ah，你顶pái 用老奸步赢我，这pái 我一定beh 讨tò-tńg来，你出题，咱koh来拚一pái。」

日头看着北风a hèng-te-te，无beh chhek 北风ê 意，一头koh 想beh 彻底phah 赢北风，就随kā应好：「北风ah，你beh 输几pái chiah会甘愿leh？Kah 你to 敢koh 来挑战，好！这pái 我一定beh hō͘你输kah 服服服。」

日头想着北风顶pái 输，是输leh 无用头壳，用力用m̄-tio̍h所在。这pái伊又koh 出一个难题hō͘北风lo͘h：「北风，你看头前有一支电火柱á，咱来比siáng会tàng kā柱á ê 影chhiâu tín 动，koh 愈chhiâu 愈长，好无？」

北风：「好a，kah 是你出题ê，我就无客气beh 开始a o͘。」

日头：「Mh，好a，m̄-koh 你mā仝款爱保持风度o͘。」

日头出这个题了后，tī 边á 暗暗á 偷笑，想讲稳赢ê:「Hi..hi..hi..」

北风leh？北风这pái kám koh会kap顶一pái仝款，中计失败leh？

北风「hù-ù. . .hù-ù. . .hù-ù. . .」He 影nah会吹bē tín 动leh？怪奇，怪奇a，tio̍h a，爱吹电火柱á chiah tio̍h。

日头：「有进步，有进步，算你khiáu！M̄-koh 你beh按怎吹chiah会sái kā影吹hō͘长leh？He..he..he..你无法度lah。」

日头知影beh hō͘影变长，kan-taⁿ伊chiah 有法度，真hiau-pai kā 北风chhiàng 声。虽bóng 北风hō͘日头án-ne 笑，m̄-koh伊无失志，继续想办法。

北风心内teh 想：「无论是吹影iah 是吹柱á，lóng 无法度hō͘影变长。是beh按怎leh？Ah，有ā！Ha...ha.. ha..日头！看绝招！」

这个时chūn，顶pái 路过hit 个人lia̍h一只鸡á 又koh 行来，北风sái一下力，kā hit 只鸡á 吹去柱á 顶。

路人：「怪事tiāⁿ-tiāⁿ有，koh 是我tú着，鸡ah，鸡ah，鸡á nah会飞去电火柱á 顶leh？」

北风：「He. . .he. . .我赢a，这pái 我赢a！影变长a！影变长a！」

日头：「H–！北风，你免欢喜了siuⁿ 早，hit 只鸡á kan-taⁿ hō͘ 影变长一sut-á niâ，我会sái hō͘电火柱á ê 影加长几nā 倍！」

日头beh 赶紧落西，想beh hō͘柱á 影变长。

北风：「乌云！乌云！去kā日头cha̍h起来！」

日头：「Ah，我苦a！这声输thiám-thiám a，紧bih起来。」

就án-ne，日头这pái 比输koh m̄ 敢认输，bih 几nā 工lóng m̄敢出来。北风「一理通，万理澈」，bē koh 乌白sái 力，后来就变做一个有力量koh 有智慧ê 风a。