《BONG报bong2选》

 | | | 转寄

保惜台湾母语是咱ê基本人权 ――2007推展母语杰出贡献tio̍h奖感言

作者 陈丰惠 2009.01.11

欢喜得tio̍h前辈ê推荐，koh-khah欢喜thang tī上有台湾主体意识ê杜部长任内接受教育部对个人投入推展台湾母语事工ê肯定。

Tiāⁿ有人问我讲「是按怎beh行入台湾语文运动ê路？」、「专职做这途，kám有法度生活？」……无m̄-tio̍h，十五冬来确实经过chē-chē考验，有chiâⁿ chē艰苦心ê代志，长期tī收入无稳定ê状态，有时mā会厌懒iah馁志；M̄-koh便若想起台湾母语传承ê气丝仔ná来ná弱ê危机，想起台湾语文运动前辈过去感心ê phah拚，想起中国千百粒飞弹相准台湾koh不时tī国际社会抵制咱台湾ê困境，保卫台湾kap顾守咱语言文化ê勇气就走出来a！

人生在世beh追求甚么？存在ê意义是甚么？初代来台湾ê外国传道师，可比：巴克礼、马雅各、甘为霖、兰大弼、马偕牧师等等，对台湾ê教育、医疗kap语言文化ê行做有真大ê影响，in lóng是值得我学习ê对象；外国人to有án-ne ê疼心a，看tio̍h阿母台湾ê语言文化失落，我kám thang假影目暗臭耳？

Chē-chē人讲：「语言若亡，文化就灭」，m̄-nā án-ne――「若无文字，语言早慢会断种」；Che是我投入台湾母语语文运动ê基本点，台湾母语bē-sái kan-taⁿ停tī口语流传ê层面，tiāⁿ-tio̍h ài推动读kap写ê事工，文字化ná普遍，会晓读、写ê人口ná chē，台湾母语chiah有真正ê活路。

今仔日khiā tī chia，其实反应出基层台湾人民对土地文化保护传承ê意志。个人受tio̍h肯定，事实ài感谢chē-chē前辈kap有志；代先tio̍h感谢白话字启蒙老师――我ê阿公陈水镜kap高雄德生教会朱文泰长老，感谢我ê阿公阿妈、父母kap教会hō͘我细汉有自然学习台语ê环境，koh kā我养饲kap栽培。Mā ài感谢台北义光教会兄姊tī我tú到台北参与社会运动时期ê支援kap照顾，感谢【台文通讯】创办人郑良光信任我，hō͘我处理台湾总连络ê khang-khòe，开始台语文事工ê第一步；感谢陈明仁、廖瑞铭、张复聚等老战友，有恁做伙phah拚chiah会得催生李江却台语文教基金会；感谢基金会董事长林皙阳翁仔某对台语文运动ê奉献，感谢基金会所有董事、同工kap【台文通讯】【台文BONG报】支持者长期sio thīn、sio kēng，感谢基金会主任朱素枝姊久年ê付出kap协助。

保惜台湾母语是咱ê基本人权，咱koh继续拚落去，台湾母语总有一工会出头天。