《BONG报bong2选》

 | | | 转寄

Pe龙船

作者 Abon 2008.06.08

China人kā台湾人讲「pe龙船」是teh纪念China古早ê「爱国诗人」，in讲肉粽是beh khian落去水底hō͘鱼á食，鱼á chiah bē食「诗人」ê肉！

China人讲ê tò-péng想就tio̍h a！我chiok认真想mā想无台湾人是án-chóaⁿ ài「pe龙船」，有饭m̄食tio̍h-ài缚做「粽」chiah甘愿食。

想几nā冬án-chóaⁿ想to想无。问gún母a,i mā讲无路来，i kan-na 知iáⁿ自古早就leh缚粽，m̄-koh gún chit庄m̄是5日节缚，是7月半缚。我害a，sa无cháng koh加1条！

有1 kái我the̍h肉粽做研究，kā缚好ê粽khian入去鱼橱á饲鱼，粽tìm落去水底，鱼橱á浮1 iân油，鱼á看着粽soah bih到橱á边去，过chi̍t-ē-á chiah有2只khah好胆ê óa来tok。

我tī鱼橱á看kui暗，鱼á粽tok bē行，就当做橱á加1块石头，hit工了kui礼拜lóng真无闲，尾á mā bē记得hit粒粽tī-leh橱á内，尾á想着beh khǹg 1 只船á hō͘鱼á「pe」，惊iáu-bōe到就鼻着臭臊味，惊jú óa jú臭。死a！鱼á lóng péng肚a！Kui-kha鱼橱á臭mi-mo͘，我kā péng肚ê鱼á hô͘起来，水làu hìⁿ-sak，内底nah会加1粒......M̄-tio̍h！hit粒粽koh tī hia hô͘-hô͘。鱼橱á拚好，我决定无kā「肉粽」kap「pe龙船」ê tāi-chì bú hō͘通，无beh koh饲鱼á。

我chah hit粒「粽」去chhōe Banda，kā讲我学China人khian「肉粽」饲鱼á，i 笑kah leh涂kha nòa。我讲「tò-péng想」mā想无，i 笑kah拳头母tǹg壁，tǹg kah隔壁ê死老猴chhoh-kàn-kiāu。

「你bē-sái好好á讲o͘h！m̄知chiah会来chhōe你a！」
「救人o͘h！写台文ê信China人ê siáu话lah！」
「好lah！相信China人是我m̄-tio̍h，我kā你会失礼，紧kā我讲lah！」
「台湾人真害，爱听好听话，连siáu话to信phak-phak，hông拖去cheng to m̄知！」
「紧讲lah！」
我tùi Banda ê头壳siâu taiⁿ落去！
「Kán！Chiok疼neh！你kā我斟酌听o͘！」
「好！」
「不管China有几个诗人，诗人án-chóaⁿ死，kap台湾lóng无tī-tāi！」
「我知a！Tò-péng就是........ che lóng是台湾人本chiâⁿ就有ê！」
「讲你gōng koh无iáⁿ jōa gōng neh。」
「Oh ye！」
「龙船kap Tao ê 1款船á kài sêng，上大只会sái坐20~30个人，m̄-koh chit-má无柴无teh做a，古早in lóng kò船á去Philippines kap亲chiâⁿ sio-chhōe，chit-má mā是koh有出海lia̍h鱼á。」
「树á lóng hō͘ China人chhò了了a！」
「Tī日本人iáu-bōe来chìn前，台湾ê大条港lóng无桥，tùi台南行bē到淡水，坐船á khah chē，hit-chūn台湾人1块枋á就会sái出海。等到日本人起ê纵贯线开通，大细条桥起好势，台湾chiah chiâⁿ做1粒岛，若无lóng是港kap港teh sio通。」
「我泅水lóng泅无siáⁿ会行kong！Án-ne我beh án-chóaⁿ出海？」
「Bē-hiáu坐飞行机o͘h！你kā粽tháu开！」
「无爱lah，臭mi-mo͘！」
「紧tháu，若无，无爱讲a！」
「好lah。」
我kā粽tháu开，粽ha̍h-á hìⁿ-sak，外口层ê饭ùn着水sio-khóa烂烂。
「Kā āⁿ peh出来。」
「OH NO！M-m......bē臭臭neh？」
「Án-ne知a ho͘ⁿh。」
「Siáⁿ！」
我kā粽khǹg tī桌顶，Banda用箸kā peh做2 koeh。

「骗siáu ê！你ka-kī mā m̄敢bak着！Koh gia̍h箸peh！」
我笑iáu-bōe煞，Banda就kā三层ngeh ùi嘴nih。
「你teh chhòng siáⁿ！」
「Iáu koh好好，che粽siáⁿ人缚ê?真好食neh！Chit-chām-á无现金thang食饭。」
Bangda kā粽sut了了。
「你害a！Eng暗你就知a！一定chhoah到bîn-á-chài！」
「免惊，粽就是出海beh chah ê便当lah！」
「正(chiàⁿ)ê？浸水mā bē pháiⁿ去？」
「Tio̍h，粽ta-ta khǹg会sái khǹg 2~3礼拜bē pháiⁿ，kiⁿ粽会sái khǹg个外月！」
「张锡铭kap in细hàn ê phāiⁿ 3 kōaⁿ粽就会sái tī山顶bih到贼头lia̍h bē着。」
「Tio̍h a！照Tao ê经验，1 chōa到Philippines ê Batan上紧半工就到a！Khah慢1工mā会到位。1只船á 10个人半工食1顿，20粒就有够，缚khah大粒ê 10粒就会饱。1 kōaⁿ 10粒会无chhái草索á，lín母a 1 kái lóng缚jōa-chē？」

「Gún母a chiok大心肝，lóng缚tàu大粒ê，1 kái lóng缚7~8 kōaⁿ！」
「7~8 kōaⁿ？1 kōaⁿ几粒？」
「无斟酌算neh，kan-na会记得缚好就sì-kòe分人，koh会缚kiⁿ粽，mā是7~8 kōaⁿ。」
「你知iáⁿ巷á口卖肉粽ê A-sáng 1 礼拜卖几粒无？」
「我a̍h知，hit款粽pháiⁿ食kah beh死，chhap i 卖几粒！」
「你hō͘ China人òe了真严重，kan-na会hiáu食。」
「Nah有！我会hiáu写台文neh！」
「我顶kái趣味去kā A-sáng tàu缚，i 1工缚2 kōaⁿ，1 kōaⁿ 30粒，1礼拜14 kōaⁿ 420粒，卖bē了lóng会chhun。准讲lín母a缚7 kōaⁿ，1 kōaⁿ 25粒，lóng总175粒，上无会sái hō͘ 100个人食1顿，lín tau 6只人，会sái食5~8工。」

「I lóng缚hō͘人，m̄-koh mā有人会kōaⁿ来hō͘ gún，ta̍k-pái beh食tio̍h-ài看粽ha̍h-á ioh是siáng tau ê粽。」

「若照Tao人ê速度，5工会sái kò到Philippines ê Manila，ǹg日本去会sái kò到Naha，lín tau ê船á真gâu走o͘h！」
「Tio̍h ah，大家lóng讲gún母a是 '5 kha牛'，sì-kòe pha-pha走。」
「Koh有，tùi 5日节过就开始好天，海顶平平平，无像kôaⁿ天hō͘鬼á风siàn kah ná壁崩落来hit款大涌，chit-chūn出海上好！」
「Án-ne我知a！5日节是teh欢喜台湾人beh出海，缚粽是船á顶beh食ê，台湾真正是海洋国家！」
「China人惊台湾人知iáⁿ台湾人自本就kap in无kâng，会hiáu peh山，会hiáu出海，kā台湾人山禁，koh chòaⁿ讲 'pe龙船' kap粽是ùi in hia来ê，chit款pe̍h-chha̍t害台湾人kap狗kāng款看着水就惊，关tī台湾toh位to bē-sái去。」
「He我知lah，免上课a，lán mā来去kò船á，moa年kò来去日本chhit-thô。」
「你ta̍uh-ta̍uh-á kò，我坐飞行机tiàm日本等你！」