《BONG报bong2选》

 | | | 转寄

火笼 (Hóe-lang)

作者 林裕凯 2008.01.06

「冬天a，天气án-ni-siⁿ liam-mi热liam-mi kôaⁿ，老大人nah挡ē-tiâu。」阿芬teh 灶跤kā我讲。

「是lah」，我先kā 电烧器开落去，坐the膨椅，开始看报纸。

「讲ē 低kah七、八度leh」我koh回讲。

因为阿芬提醒，我心肝头挂虑着tòa台北ê老母。

「等一下，我来khà电话。」我讲，「In kám ē俭，m̄甘开电烧器？ 」心内ná想，ta̍uh-ta̍uh-á烧气jú来jú chiâu-ûn，报纸khǹg leh，the leh是jú来jú烧。

「Khah紧去khà lah。」阿芬知我ê tōa-chôa性，伊加强口气。

目chiu ǹg电热器相，我听无详细，心内想ê是过年tio̍h the̍h tńg去团圆a。红红ê石英管发出ûn-ûn-á烧烧ê电磁波。灶跤麻油鸡味阵阵传来kǹg鼻空。

「阿芬，你kám知影『hóe-lang』是甚么？」我大声问，人无ngiāu。

「Kám是khǹg teh 眠床跤ê？」伊大声应。

「Kōaⁿ teh手ni̍h ê lah。」

阿芬果然是m̄-bat chit款物件，心肝头sió-khóa-á一丝ê失落感。黄红ê烧管teh我目chiu内ûn-ûn-á thián开渐渐变做红色茫雾，hùn-khoah到身躯sì-kè。火红ê中心是金黄色，看久ē起乌影。我记tî内 ê 火笼内面ê火炭mā仝款是án-ni-siⁿ。

Chit款 kôaⁿ天，阿妈伊lóng ē kōaⁿ一跤火笼。我ē记得hit时，伊60几岁。沿路行沿路hàiⁿ，koh沿路念伊ê歌á。

「.......，我英台来到花园口，手牵山伯跳过沟，... ...」伊ê声音柔软幼甜。

「火笼分我kōaⁿ lah！」我lóng ē tiāⁿ-tiāⁿ假影吵。

「阿凯，你是cha-po͘ gín-á m̄-thang chiah惊kôaⁿ。」仝款柔软幼甜。

「Che火笼是有岁序大人chiah ē-sái用ê。」伊koh kā我讲。

「无lah，我是想beh pû蕃薯lah。」

「Gōng凯」伊lóng文文á笑。

Hit时我tiāⁿ-tiāⁿ斟酌注意到底火笼是藏toh去。M̄-kuh ta̍k遍lóng ài等到年尾chiah看着火笼。Hit-kái，hō͘我siam着。

「阿凯，火笼是m̄是你lòng破ê hohN！」

我看着伊火笼跤soeh一支siù-sôe-á，soah thi̍h-thi̍h thu̍h-thu̍h连讲pe̍h-chha̍t mā bōe-hiáu。

「M̄是lah」我身躯phi̍h-phi̍h-chhoah。

「Ah 无，m̄是你，koh ē有siâng？」

「...」我想bōe出别人，就开始hiⁿ起来。

「Cha-po͘ gín-á bōe-sái hiah爱哭。」

「...」我开始haiⁿ。

「Bōe kiàn-siàu。」

「M̄是我。」我开始哭。

「O-si gín-á，Sià sì-chèng。」

「...」我háu kah大细声，无人phah我，mā无人来kâng惜。

了后，我bōe记得in是án-chóaⁿ kā我弄ê，我hit工暗tǹg就ē笑a。In koh ē用hông听无ê话kā我笑：「Ná哭ná笑āu-pián轿，扛去放屎kah放尿。」

我一直bōe-tàng了解是án-chóaⁿ「cha-po͘ gín-á bōe-sái哭，bōe-sái háu？」

Hit-年，我考tiâu大学。阿妈过身。我真正无háu。

「凯á，kā阿妈跪拜。」

「...」

「凯á kā阿妈讲，ài tńg来。」

「...」

阿妈伊ê后事，我感觉真紧就办了。恍恍惚惚过了十数日。

「凯，你是án-chóaⁿ... 都无发烧leh a。」阿母问我，手先ù家己ê头额， chiah ù我ê。

「无lah。」

「Ah无，你nah ē khong神 khong神？」

「我 teh想tāi-chì。学校ê功课lah。」我已经惯势讲pe̍h-chha̍t a。

Hit ê破去ê火笼，竹bi̍h-á编ê外体，ná像一个铜钟型。中央安hē一个涂烧ê陶碗，顶koân koh choh一个耳，hō͘手thang好kōaⁿ。Hit ê耳已经kōaⁿ kah金滑金滑， iu kah。中央ê碗破去，an-ni就bōe-tàng koh用a。Chit跤火笼就消失形迹去a。若无，我一定会kā 伊保惜起来。

「Gín-á人kha-chhng三斗火bōe 惊kôaⁿ。」

In lóng ē án-ni su̍t gún chiah ê gín-á。是án-chóaⁿ gún hit-chūn hiah好拐？我到chit-má mā是iáu想无。

「凯，你电话是khà a iah bōe？去洗手先来食饭lo͘。」阿芬欢欢喜喜teh hoah，phah断我ê回忆。

「Iáu-bōe，另工买一跤tńg来hō͘你看。」

「甚么？」

「火笼」

「你是讲火笼o?」

「Hāⁿ--no͘。」

「Ài会记得khà电话o͘。」阿芬声音柔软幼甜。