《各各他e5目屎--苦難得安慰》

 | | | 轉寄

憐憫khah贏祭祀

作者 紀福讚 2006.08.27

1995年熱天，台北故宮博物院用一億五千萬ê價錢，買一仙koân 40公分ê「大和佛像」（A.D.77-498）。另外koh預算四億，beh買其他ê佛像。會當看出台灣真正是「錢淹腳目」，外匯存底超過千億美金。奇怪ê現象，就是任何社會福利ê提案，政府各單位lóng會「喝sàn」，甚至，連離島澎湖也因為缺乏基本建設經費，tio̍h考慮廢縣á是規劃做賭城。

1993年加州柏克萊大學ê人口調查研究報告，指出加州有500萬人經常tī散赤iau餓ê狀況，其中兒童佔200萬。因為散赤，chē-chē gín-á自細漢就靠偷提過日子。所以，加州ê犯罪率增高，監獄也愈來愈chē，真chē稅收投資tī獄政，也真chē政客利用這做廣告，捏造家己成做打擊罪犯ê英雄，kan-taⁿ注神tī美國總統ê寶座，全然無顧人ê iau餓kap社會ê破病。

耶穌tī傳道ê時，真看重人肉身實際ê需要，看「人」比祭祀khah要緊。伊tī安息日醫病，tī安息日飢餓ê時，門徒捏麥穗來食，伊ê觀點是「總是lín若知，我ài憐憫，無ài祭祀，.... . 受傷ê蘆竹，伊無beh at折，beh hoa ê火星，伊無phah熄。」（太12：7，20）。耶穌看人ê受苦比「經濟利益」khah要緊，將污鬼對人ê身上趕出進入二千隻豬群中，hō͘ in淹死（可五13）。伊無拒絕有心反悔ê罪人就近伊（路七39），伊討厭假冒偽善ê人（路七44），伊看「憐憫」比chē-chē ê「禮儀」khah要緊（路十八10－14；太二十三23）。所以，伊也看重、肯定hiah-ê有「憐憫心」ê人（太二十五24，二十六13），也嚴厲講：「你kiám m̄ tio̍h憐憫你同做奴僕ê，親像我憐憫你？」（太十八33）。雅各書二章13節講：「因為人無憐憫人，當審判也無得tio̍h憐憫；憐憫贏過審判來誇口。」也講：「獨獨眷顧孤兒寡婦tī in ê患難中，koh家己守，無hō͘世俗bak-tio̍h，這tī父上帝ê面前就是做清氣無lâ-sâm ê敬虔。」（－27）。