《各各他e5目屎--苦難得安慰》

 | | | 轉寄

散赤中ê富有

作者 紀福讚 2006.05.21

有一位香港ê散赤救助人員去非洲飢荒ê地區分發救濟品。嘴乾án行李提出一罐Cola。Tú lim一嘴，發現有二、三十個sán pi-pa ê gín-á，目睭展kah真大蕊，注神teh看伊，真好奇，也真欣羨。伊soah lim bē落去，提hō͘其中ê一個gín-á。想講，伊會家己lim。無phah算，這個gín-á，將這罐Cola分hō͘每一位gín-á，每一人tam一嘴，tam kā真歡喜。這個義工看見散赤中富有ê一面。物質雖然散赤，人性富有。

參加過一個監牢ê敬拜，無琴、無譜、無幾個會曉唱歌。一個帶頭唱「奇異恩典」－－「前我失迷，taⁿ我得tio̍h」，kan-taⁿ會曉唱這句，kap唱「主，我讚美你」。但唱ê人，lóng唱kah真tháu放，真歡喜。唱出作者約翰•牛頓回轉 ê快樂。由犯人轉回做主ê奴僕。環境真散赤，心靈真富有。

記得，貝多芬耳孔無聽見了後，tī維也納音樂廳第一擺奏第九交響曲ê故事。自事業高峰到完全耳孔無聽見ê地步，這是一種散赤ê絕望。今失去謀生、創作、存在ê基本條件，等於失去性命。Tī修道院忍受喪失、散赤ê痛苦。但上帝用心靈ê聲音hō͘伊聽見，伊創作了第九交響曲。肉體、精神散赤，但上帝ê恩賜富有。

這個世代是物質富有ê世俗。好額ê國家享有數十倍幾十年前ê物質生活，文化產品多采多姿，人kap人ê接觸真豐富，但人性soah非常ê散赤。親像一間教會，人真chē，水準koân，會友彼此照顧有夠，但對外面ê世界一點á lóng無關心。注重教會人數ê增多，soah是用犧牲、真理、公義、仁愛去替換、妥協來ê結果。有美ê道理，但無真ê實踐。教會成做一個連環營業ê商業機構，出賣ê產品叫「上帝、耶穌、聖靈」。有真chē人需要這種裝飾－－我是基督徒ê名牌，因為這個時代「食西瓜，倚大邊」，參加基督教ê團體是一個潮流、摩登，會學習tio̍h一寡口頭語－－「信」、「愛」、「盼望」、「赦免」、「好厝邊」、「關心」 .... . . 等，hō͘人聽起來真爽快ê話語，在教會聚會時，聽tio̍h chiah-ê話語，想像家己是chiah-ê話語製作出來ê屬靈產品，親像teh吃迷幻藥真爽快，真súi ê氣氛。所以若有人憨憨想beh講公義、真理，就會破壞美善ê氣氛，就會hō͘人丟石頭。這是屬靈ê富有，真實ê散赤。

法利賽人kap猶太人反對耶穌，想beh毀滅伊ê原因，就是伊指出 in散赤ê真實。指責in ê虛假，假冒偽善，in一直以為家己是上帝ê選民，是一群分別做聖，比普通人學問、道德、生活水準lóng khah koân ê一群社會領袖。但耶穌指出in tī上帝ê面前是散赤ê時，in感覺無面子，最後明知耶穌是彌賽亞，是會當救in脫離心靈散赤ê人，但in反倒轉假造罪名，做假干證，kā伊釘十字架，實在是人性最醜陋ê一面，也是教會siōng烏暗ê一面。用真súi ê罪名－－猶太人ê王，kā人釘十字架。代替上帝對人審判，最後，連上帝也掠來審判，kā釘十字架。這是人性最悲哀ê所在。以為將「真實」kā釘十字架，一切就妥當，無koh有人會受指責，無koh有人tio̍h自我反省，感覺真安全。但soah m̄知in已經將in存在，安全ê根基kap賞賜者，kā釘tī十字架頂，註定永遠散赤。保羅先生講：「Lín知咱ê主耶穌基督ê恩典。伊本好額，為tio̍h lín成做sòng-hiong，beh hō͘ lín tùi伊ê sòng-hiong來成做好額。」（哥林多後書八9）。